ODHEAI 17
‘Tannem Tankam Devachea Utrachi Somzonni Mellonk Modot Keli’
Ami bore xikoupi koxe zaunk zatat ani Bereiantlea lokanchi dekh koxi gheunk zata tem ami hea odheai-ant polloitolim
Ho odheai Itihas 17:1-15-cher adarit asa
1, 2. Filipi thaun Tesalonikent konn provas kortat, ani te kitem chintʼtat astole?
PAULU, Silas ani Timot, Filipi thaun Tesalonikent provas kortat. Tankam dongri vattarantlean sumar 130 kilometr provas korunk zai. Punn Romi lokamnim toiar kelʼlea borea rosteancher te cholonk xoktat. Hea rosteancher zaite lok provas kortat, zoxe soinik, veapari ani kola aslole munis. Toxench thoim zaito bovall asa, zoxem rothanchea chokrancho avaz, toxench lokancho ani zonvarancho bovall. Ho provas korunk tankam titlem sompem naslem, karonn Pauluk ani Silasak, Filipint danddeamnim marlole ani tanche ghave azun pekonk nasle.—Itihas 16:22, 23.
2 Tor provas kortana heach vixim chintun te niraxi zaunk xoktale. Punn borea ghoddnneancher dhean dilolean, tancho provas boro zata aslo. Tor te ghoddie, Filipint bondkhonnichea odhikarean ani tachea familin koso bhavarth dovorlo tea vixim uloile astole. Ani hea toren Devachem Utor porgottunk tancho nichov anik ghott zalo astolo. Punn Tesalonikechea xara lagim pavtat toxe tankam usko zalo astolo. Filipint tankam mar poddlo toso, hea xarantle Judev lok pasun tankam martole kai?
3. Dhiran porgottnni korchea vixim Pauluchea udharonnantlean ami kitem xiktat?
3 Paulun uprant Tesalonikentlea Kristanvank boroilʼlea chittintlean amkam tachim bhavnam dison ietat. Tannem mhunnttlem: “Filipi xarant amkam khub dhumallo dilo ani amchea sangata vaitt toren vagle. Punn itlo dhumallo asonui tumkam Deva vixim bori khobor sangonk ami amchea Devachea modotin dhir ghetlo mhunn tumkam khobor asa.” (1 Tes. 2:2) Tor Filipint kitem ghoddlem tea uprant Tesalonikent voichea vixim Pauluk ghoddie usko zalo astolo mhunn dison ieta. Tor tumi Pauluchim bhavnam somzonk xoktat kai? Bori khobor porgottunk tumkam kednam tori kotthin zalam kai? Jehova apleak ghottai ditolo ani dhirvont zaunk modot kortolo mhunn Paulu Jehovacher patieun ravlo. Tor aiz ami Pauluchea udharonnacher obheas kelolean, amkam-i toxench korunk modot zaunk xokta.—1 Kor. 4:16.
‘Tannem Devachea Utrachi Somzonni Dili’ (Itihas 17:1-3)
4. Paulu Tesalonikent tin sumanam poros chodd dis ravlo astolo mhunn ami kiteak mhunnonk zata?
4 Bible sangta, ki Paulu Tesalonikent aslo tednam, tin sabath meren sobha-ghorant porgottnni kortalo. Punn hacho orth oso nhoi, ki Paulu tea xarant fokot tin suman ravlo, karonn tea xarant ailea uprant kitlea disamnim Paulu sobha-ghorant gelo tem amkam khobor na. Ani Pauluchea chittintlean amkam kollon ieta ki to Tesalonikent aslo tednam, to ani tache sangati tancho khorch bhagounk kam kortale. (1 Tes. 2:9; 2 Tes. 3:7, 8) Titlench nhoi, to tea xarant aslo tednam Filipintlea bhav-bhoinnamnim tankam don pavtti gorjecheo vostu dhaddun dilʼleo. (Filp. 4:16) Tor, Paulu Tesalonikent tin sumanam poros chodd dis ravlo astolo.
5. Apunn xikoitalo tea vixim lokank khatri zaunk Paulun kitem kelem?
5 Porgottnni korunk dhir mellʼllea uprant, Paulu sobha-ghorant ektthovlolea lokam lagim ulounk laglo. Aple sonvoim-e pormonnem “tannem Judevank Devachea Utrachi somzonni mellonk modot keli. Kristan dukh sosop ani melʼleantlo jivont zavop gorjechem aslem” hem tannem Devachea Utrantlean spoxttponnim somzailem. Uprant tannem mhunnttlem: “Jea Jezu vixim hanv tumkam sangtam, toch ho Krist.” (Itihas 17:2, 3) Dhean diat, aplim aiknnarim fokot ojap zalʼlim Pauluk naka aslem. Punn tim jem kitem aikotat tacher tannim bariksannen niall kelʼlo taka zai aslo. Karonn tankam Devachea Utrachi mahiti asa ani tim Devachea Utrak man ditat mhunn to zannam aslo. Punn tankam sarki somzonni nasli. Tor Paulun tankam somzonni dili ani Nazaretkar Jezuch, bhasailʼlo Mesias vo Krist mhunn tannem tankam Devachea Utrantlean purave dile.
6. Aplea xisank xikoitana Jezun Devachem Utor koxem uzar kelem, ani tacho porinnam kitem zalo?
6 Dusreank xikoitana Paulun Jezuchi dekh ghetli. To sodanch Devachea Utrantlean tachea xisank xikoitalo. Udharonnak, Jezun porot-porot tachea pattlavdarank sanglem, ki Devachea Utra pormonnem munxachea Putan tras sosun moronk poddttolem ani uprant to jivont zatolo. Tor jivont zatoch, Jezu aplea xisank dixtti poddlo. Ani taka polloun Jezu sangtalo tem soglem khorem aslem mhunn tachea xisank dubhavnastana puravo mellʼllo astolo. (Mt. 16:21) Punn Jezun tankam Devachea Utracher visvas dovrunk anikui karonnam dilim. To aplea xisank koso xikoitalo tem amkam Bible-ant vachunk melltta. Bible-ant sanglam, “Tannem Moizesachea pustokam thaun tem Provadeanchea pustokam poriant, mhunnche akʼkhea Devachea Utrant tachea vixim jem kitem boroilʼlem, tea soglea utrancho orth tankam bariksannen somzailo.” Hacho porinnam kitem zalo? Te xis ekdom ojap zale ani ekamekak mhunnonk lagle: “Vatter to amchea lagim uloitalo tednam ani bariksannen Devachea Utrancho orth somzaitalo tednam tachem aikon amchim kallzam lastalim nhoi?”—Lukas 24:13, 27, 32.
7. Ami dusreank Bible-antlean xikovop kiteak gorjechem?
7 Khorench, Devachea Utrak xokti asa. (Heb. 4:12) Tor Jezu, Paulu ani her apostlam bhaxen, ami Devachem Utor uzar korun dusreank xikoitat, tankam Bible-antlean sarki somzonni ditat ani ami Devachea Utrantlean xikoitat mhunn tanchi khatri vaddounk sodhtat. Karonn ami sangtat to sondex amcho nhoi, punn Devacho zaun asa. Tor Bible-antlo sondex patieupa sarko asa dekhun ami dusreank xikoitat tednam amcho bhavarth pasun ghott zata. Taka lagon, Paulu bhaxen, dusreank dhiran to sondex sangonk amkam modot zata.
“Thoddea Lokamnim Bhavarth Dovorlo” (Itihas 17:4-9)
8-10. (a) Paulun Tesalonikentlea lokank porgottlem tednam tannim kitem kelem? (b) Thoddea Judev lokank Pauluchi nattkai kiteak zali? (c) Pauluchea virodheamnim kitem kelem?
8 Jezun mhunnttlolem: “Ek sevok aplea dhonia poros vhodd nhoi. Tannim mhaka dhumallo dila zalear, te tumkam-i dhumallo ditole; tannim mhojem utor pallʼllam zalear, te tumchem-i utor pallttole.” (Juanv 15:20) Him utram khorim mhunn Pauluk kollon ailʼlem. Karonn taka-i dhumalleancho fuddo korunk poddlolo. Atam Tesalonikent, thoddeamnim Pauluchem aikolʼlem. Punn thoddeamnim tacho virodh kelo. Zannim aikolʼlem, tanche vixim Lukasan oxem boroilʼlem: “Tantuntlea thoddea lokamnim [Judevamnim] bhavarth dovorlo [Kristanv zale] ani te Paulu ani Silasa vatten aile. Tea bhair, Devachi bhokti korpi Grik lokanchea eka vhodd zomean pasun bhavarth dovorlo. Tantunt thoddeo famad bailo-i asleo.” (Itihas 17:4) Tor, Devachea Utrachi bori somzonni mellʼllea mhunn he nove xis khub khuxal asle.
9 Punn Tesalonikentlea thoddea Judevank Pauluchi nattkai zali ani te tachea add aple dant korkoraunk lagle. Karonn, “Grik lokanchea eka vhodd zomean” Pauluchem aikolʼlem. Tea Judev lokamnim Grik videxiank, Hebrev versam xikoilʼlim, karonn tannim Judev dhorm apnnailʼlo tankam zai aslo. Punn atam okosmat he Grik lok Pauluchea vatten zalʼle ani tem-ui zalear sobha-ghorant. Taka lagon Judev lok khub ragar zale.
“Te Paulu ani Silasak dhorun zomea mukhar haddunk sodhtale.”—Itihas 17:5
10 Fuddem kitem zalem tea vixim Lukas oxem sangta: “Judev nattkaien bhorle ani tannim bazarantlea tovnas munxank ektthaim korun ek zomo kelo ani akʼkhea xarant bovall kelo. Te zobordosten Jasonachea ghorant ghusle, karonn te Paulu ani Silasak dhorun zomea mukhar haddunk sodhtale. Punn te tankam mellonk nant dekhun tannim Jason ani thoddea dusrea bhavank dhorle. Ani tankam voddit xarachea odhikaream lagim gheun gele. Te oxe bob marunk lagle: ‘He munis zannim akʼkho sonvsar voir-sokol kela te hanga-i pavleat. Ani hea Jasonan tankam aplea ghorant asro dila. He munis Somrazachea kaideam add voitat ani mhunnttat ki ek dusro raza asa, zachem nanv Jezu.’” (Itihas 17:5-7) Tor hea zomeantle lok jem kitem kortat tacho Paulucher ani tachea sangateancher kitem porinnam poddttolo aslo?
11. Tesalonikentlea Judevamnim Paulu ani tachea sangateancher kosle arop ghatle, ani te konnachea add voitat mhunn te sangonk sodhtale? (Futtnott polloiat.)
11 Tesalonikentle Judev Paulu ani Silasak tea xarantlean dhanvddaunk sodhtale. Taka lagon tannim thoinchea lokanchea zomeak ektthailo, zo ekdom ragabhorit aslo ani tankam konnuch addaunk xokonaslo. Magir Judevamnim tea ‘xarant bovall kelea’ uprant, Paulun ani tachea sangateamnim gombhir oprad keleat mhunn tannim odhikareank sangon tancher arop ghatle. Tancho poilo arop mhunnttlear, Paulu ani tachea sangateamnim, “akʼkho sonvsar voir-sokol kela.” Punn khorem mhunnttlear, Tesalonikent zalʼlea bovallak lagon, Paulu ani tache sangati zobabdar nasle. Tancho dusro arop ekdom chodd gombhir aslo. Paulu ani tache sangati, Jezu mhunnttlolea eka raza vixim lokank sangon, te somrazachea kaidea add voitat mhunn Judevamnim tancher boglantt ghatlem. a
12. Tesalonikechea Kristanvancher ghatlolea hea khottea aropak lagon porinnam khub vaitt zaunk xoktalo mhunn amkam koxem kolltta?
12 Dhormik fuddareamnim Jezucher pasun osloch ek arop ghatlolo mhunn ugddas korat. Tannim Pilatak oxem mhunnttlolem: “Ho munis lokank sorkara add vochonk uksaita . . . ani apunn Krist ani raza mhunn sangta.” (Lukas 23:2) Tea vellar, Pilat ghoddie bhielo ani tannem Jezucher mornnachem formonn marlem. Karonn tannem oxem korunk naslem zalear, Pilat Romi somrazak ovisvaxi zala ani dusrea eka Razak tenko dita mhunn Romi somraz chintʼtolo aslo. Tor teach bhaxen, Tesalonikentlea Kristanvancher ghatlolea aropak lagon, porinnam khub vaitt zaunk xoktalo. Itihas pustoka vixim aslolea eka pustokant oxem sanglam, “Ho arop ekdom gombhir aslo. Ani konnui munis somrazacho ghat korunk sodhta mhunn tankam kollon ailem zalear, te taka choddxe pavtt jivexim martale.” Tor Judevanche he vaitt ievzonnek ies mellttolo aslo kai? Hea vixim fuddem polloum-ia.
13, 14. (a) Tesalonikentlea zomea lagim porgottnnechem kam addaunk kiteak zaunk na? (b) Paulu Jezu bhaxen chotur koso aslo, ani ami tachi dekh koxi gheunk zata?
13 Tesalonikentlea zomea lagim porgottnnechem kam bond korunk zaunk na. Hachem ek karonn mhunnttlear, tankam Paulu ani Silas mellonk nant. Toxench, anik ek karonn mhunnttlear, Paulu ani Silasacher ghatlole khotte arop sarke mhunn tea xarantlea odhikareank khatri zaunk na. Tor tannim Jason ani her bhavam koddlean “zaite poixe ghetlea” uprant, tankam vochonk dilem. (Itihas 17:8, 9) Ani Paulun kitem kelem? Tannem, “sorpa bhaxen chotur ani parveam bhaxen sadim” zaunk Jezun dilʼlo solʼlo manun ghetlo. (Mt. 10:16) Ani to dhiran dusrea zagear porgottnni korunk gelo. Tor aiz Kristanvamnim Pauluchi dekh koxi gheunk zata?
14 Aiz khottea dhormache fuddari pasun, lokanchea zomeank amchea add uksaitat. Ami sorkara ani desa add voitat ani sorkarak ghat kortat oxem te amcher arop ghaltat. Ani sorkaran amkam dhumallo dilʼlo tankam zai. Te oxem kortat karonn Pauluchea disantlea virodheam bhaxen, amchi vaddavoll polloun tankam nattkai zata. Punn ami Kristanvam chotur ravtat. Ami tea ragixtt ani somjikai naslolea munxam lagim vad-vivad korinant. Punn amchem kam xantin korunk sodhtat. Ani choddxe pavtti poristhiti bodolta tednam tea zagear porot ieun porgottnni kortat.
“Bereiantle Lok Tesalonikechea Lokam Poros Uktea Monache Asle” (Itihas 17:10-15)
15. Bereiantlea lokank Paulun bori khobor porgott keli tednam tannim kitem kelem?
15 Paulu ani Silasak surokxit dovrunk bhavamnim tankam, Tesalonike thaun sumar 65 kilometr pois aslolea Bereiant dhaddle. Thoim pavlea uprant, Paulu sobha-ghorant gelo ani thoim hajir zalʼleam lagim ulounk laglo. Lok hanga bori khobor aikonk sodhtat tem polloun, Paulu kitlo khuxal zalo astolo tem chintat. Bereiant aslolea Judevam vixim Lukasan oxem boroilem: “Tesalonikechea lokam poros te uktea monache asle. Karonn tannim utor khub urben manun ghetlem ani tannim aikolam tem khorem asa kai na tem pollounk te dor disak Devachem Utor bariksannen topastale.” (Itihas 17:10, 11) Tor hacho orth, Tesalonikentle Kristanv sotacho mog korinasle oxem nhoi. Karonn uprant Paulun tankam oxem boroilem: “Ami Devache upkar attovop bond korinant, karonn tumi amche koddlean Devachem utor aikolem tednam tem munxanchem nhoi, punn Devachem utor mhunn somzon manun ghetlem. Ani tem khorench Devachem utor zaun asa ani tem utor tumcher, mhunnche, bhavarth dovortoleancher probhav ghalta.” (1 Tes. 2:13) Tor Bereiantle lok Tesalonikechea lokam poros “uktea monache” koxe asle?
16. Bereiantlea lokank “uktea monache” kiteak mhunnttlole asat?
16 Bereiantlea lokamnim aikolʼlo sondex tankam novo aslo. Punn tannim Paulucheo khoddeo kaddunk nant vo tache lagim vad-vivad korunk na. Toxench, Paulu sangtalo titlem-i tannim dolle dhampun manun gheunk na. Punn Paulu uloitalo tednam tannim poilim dhean diun aikolem. Tea uprant tannem sanglam tem khorench Devachea Utrantlean asa kai na mhunn tannim topasnni keli. Toxench, tim fokot sabathachea disa nhoi punn dor disa Devachea Utracho obheas kortalim ani tim “khub urben” oxem kortalim. Jim novim sotam tim xiklolim, tim somzonk tannim vell ghetlo. Tea uprant, tannim khaltikaien goroz te bodlav kele. Ani “zaitea zannamnim bhavarth dovorlo.” (Itihas 17:12) Hea soglea karonnak lagon, Lukas tankam, ‘uktea monachim’ oxem mhunntta!
17. Ami Bereiantlea bhav-bhoinnanchi dekh kiteak gheunk zai, ani ami sotant zaitim vorsam aslear pasun ami oxem kiteak korit ravonk zai?
17 Bereiantlea bhav-bhoinnanchea sobhava vixim Devachea Utrant boroilʼlem astolem ani tanchem udharonn amkam faideak poddttolem mhunn tannim ghoddie tea vellar chintunk na astolem. Paulun tanchea vixim jem kitem chintlolem, ani tannim kitem kelʼlem Jehovak zai aslem, toxench tannim kelem. Tech bhaxen, aiz pasun ami lokank Devachem Utor uzar korun tancho bhavarth ghott korunk urba ditat. Bereiantlea bhav-bhoinnamnim, zo sobhav dakhoilo tosloch sobhav ami sot xiklea uprant pasun dakhoit ravonk zai. Ani vell voita toso, ami Jehova thaun xikot ravonk toiar asonk zai ani tachi xikounn rokddich amchea jivitant apnnaunk zai. Ami oxem kelear, Jehovak zai toso amkam akar diunk ani tachem proxikxonn gheunk ami toiar astolim. (Iz. 64:8) Ani Jehova amkam aplea kamant uzar korit ravtolo, toxench ami taka khuxal korit ravonk pavtolim.
18, 19. (a) Pauluk Bereia thaun bhair kiteak sorchem poddlem, punn to kitem korit ravlo ani ami tachi dekh koxi gheunk zata? (b) Paulu fuddem khoim ani konnak porgottnni korcho aslo?
18 Paulu Bereiant chodd temp ravonk na, karonn Itihas pustokant amkam oxem sanglolem asa: “Paulu Bereiant Devachem utor porgottʼtta mhunn Tesalonikechea Judevamnim aikolem tednam, te thoinchea lokank uksaunk ani tras korunk aile. Tednam bhavamnim rokddoch Pauluk doria deger dhaddlo. Punn Silas ani Timot Bereiantuch ravle. Pauluk pavounk ailʼle bhav taka Athena poriant gheun aile. Tankam porot dhaddttana Paulun tankam Silas ani Timotak zata titlea begin Athenant ieiat mhunn sangonk lailem.” (Itihas 17:13-15) Tor hantuntlean amkam kollon ieta, ki Pauluchea virodheamnim soddun diunk naslem. Bhavamnim porgottnnechem kam bond kelʼlem tankam zai aslem. Ani hea pasot te tankam tras korit asle. Tannim Pauluk Tesalonikentlean bhair kaddlo, punn te itleanuch dhadoxi zaunk nant. Te Bereiant aile ani te thoim pasun Pauluk tras diunk sodhtale, punn tankam ies mellonk na. Karonn, aplo porgottnnecho vattar vhodd asa mhunn zannam zalʼlean, Paulu dusrea vattarant porgottnni korunk gelo. Tor aiz ami pasun konnakuch amchem porgottnnechem kam bond korunk diunk zaina!
19 Paulun Tesalonikent ani Bereiant aslolea Judevank ekdom bore bhaxen sakx dili. Ani oxem kortana, dhiran porgottnni korop ani lokank Devachea Utrachi sarki somzonni divop kitlem gorjechem tem Paulu zannam zaunk pavlo astolo. Ani hem aiz amkam-i kollon ailam. Punn fuddem, Paulu jea lokank porgottnni korcho aslo tea lokanchi patienni sarkich veglli asli. Te lok mhunnttlear, Athenant aslole videxi. Tor Paulucho sondex aikon te lok kitem kortole asle tem ami fuddlea odheai-ant polloum-ia.
a Bible-achea eka sodh korpea pormonnem, Romi somrazan ek oslo kaido kaddlolo, jea vorvim fuddarak ek novo raza vo sorkar ieuncho asa mhunn konnench lokank sangonk zainaslem. Ani khas korun to raza vo sorkar Romi somrazacho zago ghetolo vo tanchi nit kortolo aslo zalear. Tor Paulu porgottnni kortana, Romi somrazachea hea kaidea add gelo mhunn, tachea virodheamnim tacher khotto arop ghatlo. “ Itihas Pustokant Sanglole Somraz,” hem boks polloiat.
