1-3. (a) Pauluk ani tachea sangateank, povitr xokte udexim koslem margdorxon mellʼllem? (b) Hea odheai-ant ami kitem polloitolim?

 BAILANCHO ek zomo Masedoniachea, Filipi xara thaun bhair sorta. Ani tea zomeantleo bailo, Gangites mhunnttat tea lhan nodi lagim pavtat. Tanchea sonvoim-e pormonnem tea nodichea deger boson tim Israelachea Deva lagim magnnem kortat ani Jehova tankam polloita.​—2 It. 16:9; St. 65:2.

² Tea mhunnosor, Filipichea udenti vatten thaun 800 kilometr poros pois aslolea Listrachea vattara thaun, Paulu, Silas, ani Timot bhair sortat. Hea Galasiechea dokxinne vatten aslolea xara thaun bhair soron te fatramnim bandlolea Romachea mukhel rostea lagim pavtat. Ho rosto Asiachea eka prantant pavta. Hea vattarant, Asiachea her prantam poros chodd lok asa. Tor thoim, ani vatter aslolea Efez ani her xaramnim vochon porgottnni korunk te urben asat. Karonn thoim hozaramnim lokamnim Krista vixim azunui aikonk na. Tori astana, ho provas suru korchea poilinch, Jezu povitr xokte udexim tankam addaita ani thoim porgottnni korunk dina. Hem to koxem korta tem amkam Bible-ant sangonk na. Punn Jezu tankam kiteak addaita? Karonn Paulun ani tachea sangateamnim, Asia Minor-antlean provas korun Aegean Doria par korun, Gangites nodi lagim vochon porgottnni kelʼli Jezuk zai. Ani heach pasot Jezu povitr xokte udexim Pauluk ani tachea sangateank margdorxon dita.

³ Masedoniak vochonk Jezun Pauluk ani tachea sangateank jea ritin margdorxon dilem, tantuntlean amkam thoddim mhotvachim lisanvam xikonk mellttat. Tor hea odheai-ant, sumar 49 K.X.-ant, Pauluchi dusri mixinori bhonvddi suru zali tednam ghoddlolea thoddea ghoddnneam vixim ami polloitolim.

4, 5. (a) Paulu ani tache sangati Bithinia lagim pavle tednam kitem zalem? (b) Paulu ani tachea sangateamnim koslo nirnnoi ghetlo, ani tacho porinnam kitem zalo?

⁴ Pauluk ani tachea sangateank, Asiant porgottnni korunk mellona dekhun te dokxinne vatten Bithiniachea xaramnim vochonk sodhtat. Thoim pavonk tankam, Frigia and Galasiechea dhulʼlichea rostea voilean provas korcho poddtta. Ani hea vatten chodd lok ravonaslo. Punn te Bithiniachea lagim pavtat tednam, Jezu povitr xokte udexim tankam porot addaita.  (Itihas 16:6, 7) Hea vellar te ghoddie chintunk poddle astole. Karonn kitem porgottchem ani koxem porgottchem hem tankam khobor aslem. Punn khoim porgottchem tem tankam khobor naslem. Poilim te Asiant porgottnni korunk sodhtale. Punn thoim tankam porgottunk mellonk na. Tea uprant te Bithiniant vochonk sodhtat. Punn thoim pasun porgottnni korunk Jezu tankam addaita. Tori astana, Paulu soddun dina. Punn porgottunk ek zago mello poriant to provas korit ravta. Tannim ghetlolo nirnnoi sarko naslo oxem amkam disonk xokta. Karonn tannim Troasachea dhokear pavonk 550 kilometr ostome vatten provas kelo. Ani te eka xarantlean dusrea xarant gele. Hea vattarantlean te Masedoniant voitat tea vatter pavle. (Itihas 16:8) Ani atam tisre pavtti Paulu eka vattarant porgottunk sodhtalo tednam Jezun taka addaunk na.

⁵ Paulu ani tache sangati Troasant pavle tednam, Bore Khobrechem Pustok boroupi Lukas tanchea sangata gelo. Fuddem kitem zalem tea vixim to oxem sangta: “Uprant ratchea vellar Paulun ek dorxon polloilem. Tantunt Masedoniantlo ek munis ubo ravon taka oxi vinoti kortalo: ‘Masedoniant ieun amkam modot kor.’ Hem dorxon polloilea borabor ami rokddech Masedoniant vochonk bhair sorle. Karonn thoinchea lokank bori khobor sangonk Devan amkam apoileat mhunn ami somzole.” a (Itihas 16:9, 10) Tor atam khoim porgottnni korunk zai tem Pauluk kollon ailem. Ani te charui zann Masedoniak vochonk rokddech bhair sorle. Khorench, apnnem provas korpacho ordea vatteruch soddunk na mhunn Paulu kitlo khuxal zalo astolo nhoi!

6, 7. (a) Pauluchea bhonvdde vellar jem ghoddlem tantuntlean ami kitem xiktat? (b) Pauluchea onubhovantlean amkam kosli khatri melltta?

⁶ Hea ghoddnne thaun ami kitem xiktat? Hea vixim chintat: Paulu Asiant vochonk bhair sorlea uprantuch ani Bithinia lagim pavlea uprantuch, toxench to  Troasant pavlea uprantuch Jezun taka margdorxon dilem ani taka Masedoniant vochonk sanglem. (Kol. 1:18) Teach bhaxen, aiz Kristi sobhecho mukheli zaun Jezu amkam heach toren margdorxon dita. Udharonnak, ami pioneer seva kortolim, vo porgottnnaranchi chodd goroz asa tea vattarant vochon seva kortolim mhunn ami dhei dovorla astolo. Punn to dhei mellon gheunk ami goroz tim panvlam ghetlea uprantuch Jezu povitr xokte udexim amkam margdorxon ditolo. Oxem ami kiteak mhunnonk zata? Hea udharonnacher dhean diat: Ek gaddi chalu aslearuch, tacho driver ti gaddi uzvean vo dhavean vhoronk xokta. Teach bhaxen, ami amchi porgottnni korunk khub vavr kortat zalearuch amchi porgottnni vaddounk Jezu amkam margdorxon diunk xokta.

⁷ Punn ami dovorlole dhei mellon gheunk ami xokonant zalear kitem? Jehovachi povitr xokti amkam margdorxon dina mhunn ami soddun diunk zai kai? Na. Pauluk pasun tannem dovorlole dhei mellon gheunk sompem naslem mhunn ugddas dovrat. Tori astana, tannem porgott korunk zai to vattar mello poriant to vavr korit ravlo. Tor ami pasun, “khub seva korchi mhunn ek vhoddlem dar” mello poriant vavr korit ravonk zai. Oxem kelearuch, Jehova amchea vavracher besanv ghaltolo mhunn ami khatri dovrunk zata.​—1 Kor. 16:9.

8. (a) Filipi xar koxem aslem tem somzaiat. (b) Paulu ‘magnneachea zagear’ xikoitalo tednam kitem ghoddlem?

⁸ Paulu ani tache sangati Masedoniachea prantant pavle tednam, te Filipi xarant gele. Hea xarant zaite Romi lok ravtale ani tankam Romi nagrikponn asa mhunn tankam khub gorv bhogtalo. Filipi xarant zaiteo vostu Rom xara bhaxen asleo ani thoim zaite retired zalʼle Romi soinik ravtale. Xarachea darvonttea bhair eka lhanxea nodichea deger “magnnem korunk ek zago” astolo oxem tankam dislem. b Tor Sabathachea disa te thoim gele ani zaiteo bailo Devachi bhokti kortaleo teo tankam mellʼlleo. Tor xis thoim bosle ani tanche lagim ulounk lagle. Tednam Lidia nanvachi ek bail “dhean diun aikotali” ani “Jehovan tichem kalliz purnn toren ugoddlem.” Tea mixinori bhavam koddlean Lidia jem kitem xikloli, tem tichea kallzak laglem ani tinnem ani tichea ghorabean bautizm ghetlo. Uprant, tinnem Pauluk ani tachea sangateank aplea ghorant ravonk dilem. c​—Itihas 16:13-15.

9. Aiz zaitea zannamnim Pauluchi dekh koxi ghetlea, ani tankam koslim besanvam mellʼlleant?

⁹ Lidian bautizm ghetlo tednam Paulu ani tache sangati kitle khuxal zale astole tem chintat! Paulun ‘Masedoniant vochon’ dusreank modot korunk apounnem svikar kelem mhunn to khub khuxal zalo astolo. Toxench, khaltea kallzachea bailanchea magnneancho zobab diunk, Jehovan apnnak ani aplea sangateank uzar kelo mhunn to khub khuxal zalo astolo. Aizui tornnattim toxim zannttim, ankvar toxim kazarim bhav-bhoinnam porgottnnaranchi chodd goroz asa thoim vochon seva kortat. Tankam zaiteo oddchonneo asat tem khorem, punn Lidia bhaxen lok Bible-achem sot apnnaitat tednam tankam khuxalkai melltta, jea udexim tankam oddchonneancho fuddo korunk modot zata. Tor porgottnnaranchi chodd goroz asa  thoim ‘vochonk,’ tumi tumchea jivitant bodlav korunk zatat kai? Tumi oxem kelem zalear, Jehova tumkam besanvam ditolo. Hea vixim amkam Aaron nanvachea eka bhavachem udharonn asa. To sumar 25 vorsancho aslo tednam, Central Amerikant gelo. Dusrea desant vochon seva kelolea heram bhaxen taka kitli khuxalkai mellʼlli, tea vixim to oxem mhunntta: “Bhailea desant vochon seva kelolean, Jehova sangata mhoji ixttagot ghott korunk mhaka modot zali. Ani sevent mhaka khub khuxalkai melltta. Hanv atam atth Bible obheas ghetam!”

10. Paulu ani tachea sangateam add lokank uksaunk noxttea dutan kitem kelem?

¹⁰ Filipintlo lok bori khobor aikotat ani bautizm ghetat tem polloun, Soitan ani tache noxtte dut kitle ragabhorit zaleat tem chintat. Karonn, adim te hea vattarant ekdom sompeponnim aplem kam korunk xoktale. Punn atam, Paulu ani tache sangati, Soitanak ek addkholl koxe zaun asle. Tor Soitan ani tachea noxttea dutamnim tancho virodh korcho mhunn, lokank uskaunk apleachean zata tem soglem kelem mhunn kainch dubhav na. Zoxem eka vellar, Paulu ani tache sangati magnnem korpachea zagear voitale tednam tankam ek chakorn mellʼlli. Ticher fuddar sangpi ek noxtto dut boslolo. Tea udexim tiche dhoni zaite poixe zhoddttale. Tor tinnem Pauluk ani tachea sangateank polloile tednam, ti tanchea fattlean geli ani mottea avazan bob marun oxem mhunnonk lagli: “He munis Sogleant Vortea Devache sevok zaun asat. Te tumkam soddvonnechi vatt porgott kortat.” Tor, tea noxttea dutamnim tika ghoddie oxem mhunnonk lailem astolem karonn te dakhoun diunk sodhtale ki tea chakornicho sondex ani Pauluchi xikounn ekach Deva koddlean ietali. Hea ritin lok Kristachea khorea pattlavdarancho sondex aikounche nasle. Punn Paulun tea chakornicher boslolea noxttea dutak bhair kaddlo.​—Itihas 16:16-18.

11. Paulun tea chakornicher boslolo noxtto dut kaddlea uprant, Paulu ani Silasa sovem kitem ghoddlem?

¹¹ Tea chakorni udexim tankam poixe zoddunk mellona mhunn tichea dhoniamnim polloilem tednam te khub ragar zale. Tannim Pauluk ani Silasak voddit bazarant vhele, zoim Romi odhikareamnim tancher kes choloili. He neai korpi, Judev lokancho dves kortat ani te Romi mhunn tankam gorv bhogta, hem tiche dhoni zannam asle. Tor te Judev munis xarantlea lokank tras ditat ani Romi lokamnim pallunk zainant tosleo riti-rivazo xikoitat mhunn te sangonk lagle. Hacho kitem porinnam zalo? Bazarant aslolo “lokancho zomo tanchea [Paulu ani Silasachea] add zalo” Ani nogor odhikareamnim “tankam danddeamnim marche mhunn” hukum dilo. Tea uprant, Pauluk ani Silasak bondkhonnint ghatle. Bondkhonnichea odhikarean tankam bhitorlea bondkhonnint ghatle ani tanche paim lakhddachea khoddeant ghatle. (Itihas 16:19-24) Tea odhikarean bondkhonnichem dar bond kelem tednam thoim itlo kallokh aslo, ki Paulu ani Silas eka-mekak pollounk pasun xokonasle. Punn Jehova hem soglem polloitalo.​—St. 139:12.

12. (a) Dhumallea vixim Jezuchea xisank koxem dislem, ani kiteak? (b) Soitan ani tache lok aiz kosleo naddbudheo uzar korun amcher dhumallo haddttat?

¹² Thoddim vorsam poilim, Jezun aplea pattlavdarank oxem mhunnttlem: “Te tumkam-i dhumallo ditole.” (Juanv 15:20) Tor Paulu ani tache sangati Masedoniant aile tednam tankam dhumalleacho fuddo korcho poddttolo mhunn tankam khobor  asli. Punn hachem karonn tannim Jehovachi maniotai hogddailea oxem naslem. Tache bodlek Soitan tancher ragar asa dekhun zata mhunn tankam khobor asli. Tor Filipint uzar kelem toxem aiz pasun Soitan naddbudhi uzar korun aplea lokam udexim amkam dhumallo dita. Iskolant toxench kamachea zagear, khotte virodhi amchea add khotteo khobro korun amkam dhumallo ditat. Thoddea desamnim dhormik virodhi korttant amchea add eke ritin oxem mhunnon arop ghaltat: ‘He Sakxi amchea lokank tras ditat. Te lokank “osleo riti-rivazo xikoitat” jeo lokank kotthin lagtat.’ Thodde zann amchea bhav-bhoinnank khub martat ani bondkhonnint ghaltat. Hem soglem Jehova polloita.​—1 Ped. 3:12.

13. “Taronn mellonk hanvem kitem korunk zai tem mhaka sangat,” oxem tea bondkhonnichea odhikarean kiteak mhunnttlem?

¹³ Tea disak ghoddlole ghoddnne vixim Paulu ani Silas ghoddie thoddo vell poriant chintit ravle astole. Punn te chodduch vell hea vixim chintit ravonk nant. Karonn modianir ‘magnnem korun ani git gaun te Devachi vakhannʼnni korunk’ lagle. Tednam okosmat ek vhoddlo bhuimkamp zalo, jea udexim bondkhonnichi buniad pasun halʼli ani bondkhonnichim soglim daram uktim zalim. Tea vellar bondkhonnicho odhikari zago zalo ani sogle koidi pollon gele astole mhunn to bhielo. Tor apleak xikxa favo zatoli mhunn tannem, “apli tolvar kaddli ani to aplo jiv kaddunk sodhtalo.” Tednam Paulun taka mottʼttean ulo korun oxem mhunnttlem: “Tuzo jiv kaddinaka, karonn ami sogle hangach asat!” Tednam, tea bondkhonnichea odhikarean, Paulu ani Silasak mhunnttlem: “Taronn mellonk hanvem kitem korunk zai tem mhaka sangat.” Paulu ani Silas taka taronn diunk xokonasle tem khorem. Karonn fokot Jezu taka salvar korunk xoktalo. Tor tannim taka zobab diun oxem mhunnttlem: “Somia Jezucher visvas dovor. Tednam tuka . . . taronn mellttolem.”​—Itihas 16:25-31.

14. (a) Paulu ani Silasan bondkhonnichea odhikareak koxi modot keli? (b) Paulun ani Silasan khuxalkaien dhumallo soslo mhunn tankam koslem besanv mellʼllem?

¹⁴ Salvar zaunk kitem korunk zai, tem tea bondkhonnicho odhikari khorench zannam zaunk sodhtalo kai? Hoi. Ani Paulukui hem sarkem dison ailem. Karonn to odhikari ek videxi aslo ani taka Devachea Utra vixim kainch khobor nasli. Tor ek Kristanv zaunk, tannem Devachea Utrantlim sotam zannam zaun tim manun gheunk zai aslim. Tor Paulun ani Silasan vell ghetlo ani taka “Jehovachem utor” sanglem. Te taka itle mon lavun xikoitale, ki tankam mar poddlolo mhunn pasun te ghoddie visorle astole. Punn tea bondkhonnichea odhikarean tanchea fattik zalʼle ghave polloile ani te dhuile. Tea uprant, tannem ani tachea akʼkhea ghorabean “rokddoch bautizm ghetlo.” Khorench, Paulun ani Silasan khuxalkaien dhumallo soslo mhunn tankam kitlem borem besanv mellʼllem nhoi!—Itihas 16:32-34.

15. (a) Aiz zaitea Jehovachea Sakxeamnim, Paulu ani Silasachi dekh koxi ghetlea? (b)  Amchea vattarantlea lokank ami porot-porot bhett kiteak diunk zai?

¹⁵ Paulu ani Silasa bhaxen, aiz zaitea Jehovachea Sakxeank, tanchea bhavarthak lagon bondkhonnint ghatleant. Tori astana, tannim bori khobor porgott korunk bond korunk na. Ani taka lagon Jehovan tankam besanvam dileant. Udharonnak, eka desant zoim amchea kamacher bondi asa, thoim 40 ttokʼke Jehovachea  Sakxeank, bondkhonnint astana sot mellʼllem! (Iz. 54:17) Dhean diat, ki bhuimkamp zalea uprantuch, tea bondkhonnichea odhikarean modot magli. Tech bhaxen, aiz ami lokank Devachea Rajeachi bori khobor sangtat tednam, thodde pavtti te aikonk sodhinant. Punn tanchea jivitant okosmat kitem-i vaitt ghoddtta tednam, te bori khobor aikonk toiar zatat. Tor ami amchea vattarantlea lokank porot-porot mellttat tednam, tankam goroz asta tea vellar ami tankam modot korunk toiar asat mhunn ami tankam dakhoun ditat.

16. Pauluk ani Silasak marle tachea dusrea sokallim poristhiti koxi bodolʼli?

¹⁶ Pauluk ani Silasak marle tachea dusrea sokallim, nogor odhikareamnim tankam bondkhonnintlean soddounk hukum dilo. Punn Paulun mhunnttlem: “Ami Romi nagrik. Tori astana tannim amcho guneanv asa kai na hem pollounchea poilinch amkam sogleam mukhar mar ghatlo ani amkam bondkhonnint uddoile. Ani atam konnak kollonastana amkam bhair sorun vochat oxem mhunnttat? Na. Ami oxem korchenant! Tannim svota ieun amkam hanga thaun bhair gheun voichem poddttolem.” Tor Paulu ani Silas, he dogui munis Romi nagrik asle mhunn tea odhikareank kollʼllem tednam, “te khub bhiele.” d Karonn, te Romi nagrikank aslolea kaidea add gelʼle. Tor atam poristhiti bodolʼloli. Tannim xisank sogleam hujir mar ghatlolo ani atam tannim sogleam hujir apli chuk vollkhon gheunk zai asli. Tor tannim Filipichem xar soddun voichem mhunn tea odhikareamnim tanche lagim vinoti keli. Ani Paulu ani Silas toxem korunk toiar zale. Punn tache poilim tannim vell gheun thoinchea novea xisank urba dili. Ani tea uprantuch te xarantlean bhair sorle.

17. Paulu ani Silasan dhir dakhoilo tem polloun novea xisank koslem mhotvachem lisanv xikonk mellʼllem?

¹⁷ Paulu ani Silasan apunn Romi nagrik mhunn sanglolem zalear tankam ghoddie mar poddchonaslo. (Itihas 22:25, 26) Punn bore khobre pasot tras sosunk poddttole mhunn tannim aplo hokʼk uzar kela, oxem Filipintlea novea xisank distolem aslem. Ani tea xisancher dhumallo ailo zalear, tankam oxi rakhonn mellchinasli. Karonn te Romi nagrik nasle. Tor dhumallo sosun, Paulu ani Silasan hea novea xisam pasot ek bori dekh dovorli. Kristachea pattlavdaramnim dhumallea vellar pasun thir ravonk zata mhunn tannim dakhoun dilem. Toxench, Paulu ani Silas Romi nagrik asle dekhun, nogor odhikareamnim kaido moddla mhunn manun gheunk tannim tankam sanglem. Hea vorvim te odhikari hea fuddem kaide pallttole asle ani Kristanvank bexttoch dhumallo diunche nasle.

18. (a) Aiz Kristi sobheche dekhrekh korpi apostl Pauluchi dekh koxi ghetat? (b) Amchea disamnim ‘bori khobor porgottcho hokʼk rakhonk’ ami kitem kortat?

¹⁸ Aiz pasun Kristi sobheche dekhrekh korpi, amkam margdorxon ditat ani tem margdorxon te svota pallttat. Sobhentlea bhav-bhoinnamnim jem kelʼlem tankam zai tench te pasun khuxen kortat. Apostl Paulu bhaxen Jehovachi bhokti korit  ravonk kaidea vatten amkam koslo adar asa tem ami zannam zaun ghetat, ani goroz poddlear desant aslolea lhan-vhodd korttamnim ani ontoraxttri korttamnim pasun vochon ami amcho hokʼk rakhunk proitn kortat. Ami oxem kortat tednam ami kaido bodlunk sodhinant, punn apostl Paulu bhaxen, ‘bori khobor porgottcho hokʼk rakhonk ani kaidea pormonnem maniotai melloun gheunk sodhtat.’ Zoxem apostl Paulun hea ghoddnnechea sumar dha vorsam uprant, Filipichea sobhek boroilem. (Filp. 1:7) Tori astana korttan koslo-i nirnnoi gheum, apostl Paulu ani tachea sangateam bhaxen, povitr xokti amkam vhorta thoim “bori khobor sangonk” ami nichov kelʼlo asa.​—Itihas 16:10.