1-3. Apostl Paulu Korintant kiteak aila, ani taka kosleo oddchonneo asat?

 50 K.X. kabar zaunk ailam ani apostl Paulu Korintant asa. Hea xarant khub boro veapar-dhondo cholta ani thoim Grik, Romi, ani Judev lok asat. a Punn Paulu hanga kam korunk vo veapar-dondo korunk ieunk na. To Korintant anik eka mhotvachea karonnak lagon aila. Tem mhunnttlear, Devachea Rajea vixim porgott korunk. Punn Pauluk ravonk ek zago zai. Tori astana, to dusreancher bhar ghalunk sodhina. Apunn Devachem utor porgott korta dekhun, dusreamnim apleo gorzo purnn korcheo oxem to chintina. Tor to atam kitem kortolo?

² Paulu tombu korunk zannam. Hem kam itlem sompem nhoi. Tori astana, apleo gorzo purnn korunk, to hem koxtti kam korunk toiar asa. To ghoddie chintʼta astolo, itlo lok aslolean hea xarant apleak ek kam ani ravonk zago mellttolo kai? Hem soglem tachea motint asa tem khorem. Punn to porgottnnechem kam fattim ghalina jem taka khub mhotvachem asa.

³ Paulu Korintant thoddo temp asa ani thoim taka porgottnnent boro ies mellʼlla mhunn dison ieta. Tor amchea vattarant Devachea Rajea vixim bore bhaxen sakx diunk ami Pauluchi dekh koxi gheunk zata, tem ami hea odheai-ant polloum-ia.

4, 5. (a) Korintant astana Paulu khoim ravlo, ani tannem koslem kam kelem? (b) Paulu tombu korpachem kam koso xikonk pavlo astolo?

⁴ Paulu Korintant pavon thoddea vella uprant, Akuila ani Prisila nanvachea eka Judev zoddpeak mellʼllo, jim khub udar kallzachim aslim. Somraz Klaudiusan “soglea Judevank Rom soddun vochonk hukum dilʼlo.” (Itihas 18:1, 2) Tednam tim Korintant ieun ravonk laglim. Tannim Pauluk fokot aplea ghorant ravonk dilem itlench nhoi, punn aplea sangata kam pasun korunk dilem. Hea vixim Bible-ant tankam oxem sanglam: “Tim ani Paulu ekech torechem kam kortalim dekhun to tanchea ghora ravonk gelo ani tanchea borabor kam korunk laglo. Tim tombu korpachem kam  kortalim.” (Itihas 18:3) Jea meren Paulun Korintant porgottnni keli, tea meren to Akuila ani Prisilager ravlo. Tanchea ghorant ravtana ghoddie Paulun thoddeo chitti boroileo, jeo uprant Bible-acho bhag zaleo. b

⁵ Paulun, “Gamalielachea paim-am koddem” boson xikxonn ghetlolem. (Itihas 22:3) Tor to tombu korpachem kam koso korunk pavlo? Poilea xekddeantlea Judev lokanchea bhurgeamnim unch xikxonn ghetlear pasun ek kola xiklear tantunt kainch vaitt na, oxem te chintʼtale mhunn dison ieta. Tor Paulu Silisiantlea Tarsusa thaun aslo. Ani ho zago cilicium mhunnttat tea kopddeak lagon khub famad aslo. Ho kopddo tombu korunk uzar kortale. Tor Paulu tornnatto aslo tednam, to chodd korun hi kola xiklo astolo. Punn tombu korpachem kam sompem naslem. Karonn tombu korchea poilim, eka munxan to kopddo vinnunk vo katrunk zai aslo ani uprant xinvonk zai aslo. Ani hem korop khub kotthin aslem, karonn ho kopddo ekdom koddok astalo.

6, 7. (a) Tombu korpachem kamam vixim Pauluchem chintop kitem aslem, ani Akuila ani Prisilachem chintop tachea sarkem aslem mhunn amkam koxem kollon ieta? (b) Aiz Kristanvam Akuila, Prisila ani Pauluchi dekh koxi ghetat?

⁶ Tombu korpachem kamant Paulun chodd mhotv diunk na. Hem kam to aplo khorch bhagounk kortalo. Karonn apunn porgottnnechem kam kortalo mhunn to bhav-bhoinnam koddlean ‘kainch gheunk’ sodhinaslo. (2 Kor. 11:7) Akuila ani Prisila tombu korpachem kam koxem lekhtalim? Kristanv zalʼlean, kama vixim tanchem ani Pauluchem chintop ek-sarkem aslem mhunn kainch dubhav na. Karonn 52 K.X.-ant, Paulu Korint soddun gelo tednam, Akuila ani Prisila tachea borabor  Efezant gelim, zoim bhav-bhoinnam tanchea ghorant mittinge pasot ektthaim zatalim. (1 Kor. 16:19) Uprant Akuila ani Prisila, Romant gelim ani porot Efezant ailim. Hea zoddpean Devachem Raj poilea zagear dovorlem dekhun, dusreank modot korunk tannim apleachean zata tem soglem kelem, ani tea pasot “videxi raxttrantleo sogleo sobha” tancheo upkari asleo.​—Rom. 16:3-5; 2 Tim. 4:19.

⁷ Aiz Kristanvam Akuila, Prisila ani Paulchi dekh ghetat. Tim aplo khorch bhagounk ani dusreancher “vojem ghalchem nhoi” mhunn khub vavr kortat. (1 Tes. 2:9) Zaitim pioneer-am sumanak thodde dis vo vorsak thodde mhoine kam korun aplo khorch bhagoitat, karonn porgottnnechem kam tankam chodd mhotvachem zaun asa. Oxem korun, tim amkam ek borem udharonn dovortat. Toxench, Akuila ani Prisila bhaxen aiz zaitim bhav-bhoinnam, sorkittachi dekhrekh korpeak aplem dar uktem kortat. Oxem korun tim ‘dusreanchi kallji ghetatʼ tednam, tankam urba ani khub khuxalkai melltta.​—Rom. 12:13.

8, 9. Paulu urben porgottʼttalo tea vellar Judevamnim virodh kelo tednam Paulun kitem kelem, ani tea uprant to khoim porgottnni korunk laglo?

⁸ Paulu fokot apleo gorzo purnn korunk tombu korpachem kam kortalo mhunn amkam kollon ieta. Karonn uprant, Silas ani Timot Masedonia thaun udar kallzan taka dennim gheun aile, jea vorvim tacheo sogleo gorzo purnn zaleo. (2 Kor. 11:9) Tor to rokddoch “anikui nettan porgottnni korunk laglo,” vo soglo vell porgottnni korunk laglo. (Itihas 18:5) Tori astana, Paulu urben porgottnni kortalo tednam, Judev lok taka virodh kortale. Ani Krist tankam salvar korunk xokta to sondex te nakartale. Tanchea hea vagnnukek lagon apunn zobabdar na mhunn Paulu dakhoun diunk sodhtalo. Hea pasot tannem aple kopdde fafddun taka virodh kortale tea Judevank oxem mhunnttlem: “Tumchem rogot tumcheach mathear ieum. Hantunt hanv zobabdar na. Atam thaun hanv videxi lokam koddem voitolom.”​—Itihas 18:6; Ez. 3:18, 19.

⁹ Tor atam Paulu khoim porgottnni kortolo aslo? To Titius Justusachea ghora porgottnni korunk suru korta, zannem ghoddie Judev dhorm apnnailʼlo astolo. Tachem ghor sobha-ghorachea kuxik aslem. (Itihas 18:7) Ani tannem aplea ghorant porgottnni korunk dili. Tor Paulun sobha-ghorant porgottnni korop bond keli ani to Justusachea ghorant porgottnni korunk laglo. To Korintant aslo te meren to Akuila ani Prisilager ravlo punn tannem porgottnni Justusachea ghorant chalu dovorli.

10. Paulun fokot raxttrantlea lokam lagim ulounk nichov korunk na mhunn amkam koxem kollon ieta?

¹⁰ Apunn videxi lokam lagim uloitolo mhunn Paulun sanglem tednam konnui Judev vo Judev dhorm apnnailolo munis aikonk sodhtalo zalear, tankam to porgott korcho na oso tacho orth naslo. Karonn Bible sangta: “Sobha-ghoracho odhikari Krispus ani tachea akʼkhea ghorabean Paulucho sondex aikolo ani Somiacher bhavarth dovorlo. Korintantlea zaitea lokamnim pasun ho sondex aikon bhavarth dovorlo ani bautizm ghetlo.” (Itihas 18:8) Tor sobha-ghorantle zaite Judev Kristanv zale mhunn amkam kollon ieta. Korintant novi sobha suru zali toxi, bhav-bhoinnam mittinge pasot Titius Justusachea ghorant mellon ietalim. Aple sonvoim-e pormonnem Lukasan, Itihas pustokantleo ghoddnneo eka-fattlean-ek ghoddleo toxeo boroileo zalear, Paulun aple kopdde fafddoilea uprant, te Judev ani Judev dhorm apnnailole lok Kristanv zale mhunn dison ieta. Tor konnui aplem aikonk sodhtalo tankam Paulu porgott korunk toiar aslo mhunn amkam kollon ieta.

11. Apunn Kristanv mhunn sangtat tea lokank porgottnni kortana Jehovache Sakxi Pauluchi dekh koxi ghetat?

¹¹ Aiz zaito lok oslea igorzancho bhag zaun asat, je apunn Kristacho pattlav kortat mhunn sangtat. Ani zaitea vorsam thaun tea igorzancho tancher probhav poddla. Sonvsarbhor hea igorzamnim chodd ani chodd lokank haddunk tanche mixinori zaito vavr kortat. Punn hea igorzancho bhag zaun apunn Kristanv mhunnttat tea lokank Deva sangata aslolea tanchea ixttagoti poros, riti-rivazo ekdom chodd mhotvacheo asat. Ani tanchech bhaxen, poile xekddeantle  Korintantle Judev asle. Punn Paulun tankam Devachea Utrant kitem asa tem somzonk modot keli. Teach bhaxen, aiz ami pasun Bible-ant kitem asa tem lokank somzaun tankam modot korunk sodhtat. Punn ami oxem kortat tednam, tannim amkam virodh kelo vo tanchea dhormik fuddareamnim amcher dhumallo haddlo zalear pasun, ami lokank modot korop bond korinant. Karonn “tankam Devachi seva korunk urba asa, punn ti urba sarkea gineana pormonnem na.” Ani tanchea modem zaitim zannam asat jim Deva vixim zannam zaunk sodhtat mhunn ami ugddas dovortat. Tor ami hea lokank sodhchi goroz asa.​—Rom. 10:2.

12. Jezu thaun mellʼllolea dorxonantlean Pauluk kosli khatri mellʼlli?

¹² Korintant ravon porgottnni korchi vo na hea vixim Pauluchea monant dubhav ailʼlo zalear, jea rati Jezu taka dorxonant dixtti poddlo tednam Pauluk apnnem kitem korunk zai tem sarkem kollon ailem. Karonn Jezun taka sanglem: “Bhienaka, porgott korit rav ani vogi ravonaka. Karonn hanv tujea sangata asam ani konnuch tujer holʼlo korun tuka luksonn korcho na. Hea xarant mhoje anik zaite lok asat zankam ektthaim korunk zai.” (Itihas 18:9, 10) Hea utrantlean Pauluk khorench ghottai mellʼlli astoli. Karonn Jezu taka tachea dusmana koddlean rakhtolo mhunn taka khatri mellʼlli. Toxench, tea xarant anikui zaite khalte kallzache lok asat mhunn taka kollon ailem. Tor Paulun kitem kelem? Bible sangta: “Paulu dhedd voros meren thoinch ravlo ani tankam Devachem utor xikoit ravlo.”​—Itihas 18:11.

13. Pauluk neai korpachea zagear gheun voitale toxe, taka kosli ghoddnni ugddas aili astoli, ani Istevak ghoddlem toxem tachea sangata ghoddchem na mhunn taka kiteak khatri asli?

¹³ Paulu Korintant ravon sumar ek vorsa uprant, Jezu aplea sangata asa mhunn tachi khatri anikui ghott zali. “Judev ektthaim zaun Pauluchea add gele ani taka zhoddtti kortat tea zagear gheun gele,” zaka beʹma mhunnttale. (Itihas 18:12) Thodde sangtat ki ho zago zomni thaun voir, sopatt, ani dhovea ani nillea marble-acho aslo. Toxench, tacher sobit akar kantoilole asle. Ho zago Korintantlea bazara laginch aslo. Beʹma-chea mukhar lokancho vhodd zomo mellon ieunk  xoktalo titlo vhodd zago aslo. Thodde itihaskar mhunnttat, ki ho neai korpacho zago sobha-ghorachea ani toxench Justusachea ghora laginch aslo. Pauluk beʹma lagim gheun voitale toxe, poilo Kristi martir, Istevak fatramnim marlolo tea ghoddnnecho Pauluk ugddas ailo astolo. Tea vellar Pauluk, Saulu mhunn vollkhotale ani tannem “Istevak jivexim marun uddounk . . . maniotai dilʼli.” (Itihas 8:1) Tor oxench kitem Paulu sangata ghoddttolem kai? Na. Karonn Jezun taka bhas dilʼli ki konnuch tujer holʼlo korun tuka luksonn korcho na.​—Itihas 18:10.

14, 15. (a) Judevamnim Paulucher koslo arop ghatlo, ani Galion ti kes kiteak bond keli? (b)  Sostenesak kitem ghoddlem, ani tacho porinnam ghoddie kitem zalo astolo?

¹⁴ Pauluk zhoddtti kortat tea zagea mukhar vhelo tednam kitem zalem? Tea vellar, Galio neai korpi aslo, zo Akaiacho razpal aslo ani Romi totv-gineani Senekacho vhoddlo bhav aslo. Tednam Judevamnim oxem mhunnon Paulucher arop ghatlo: “Ho munis lokank oxe toren Devachi bhokti korunk uksaita ji kaidea add asa.” (Itihas 18:13) Tor, Paulun kaido moddun thoddea Judevank Kristanv zaunk uskailʼle mhunn te tacher khotto arop ghaltat. Punn Paulun kosloch ‘onʼneai vo vhodd oprad’ korunk na mhunn Galiok khobor asli. (Itihas 18:14) Ani to Judevanchea kosleach vad-vivadamnim modem poddonk sodhinaslo dekhun Paulu aplea vatten kitem-i mhunnchea poilinch Galion poilich ti kes bond keli. Hem polloun te aropi itle ragar zale, ki tannim tancho soglo rag Sostenesacher kaddlo. Sostenes ghoddie Krispusachea zagear sobha-ghoracho odhikari zalʼlo astolo. Tannim Sostenesak dhorlo ani “zhoddtti kortat tea zagea mukhar vhoron taka marunk lagle.”​—Itihas 18:17.

¹⁵ Punn to zomo Sostenesak martalo tednam Galion taka kiteak addaunk na? Pauluchea add ailʼlea hea zomeacho Sostenes fuddari aslo ani taka favo tench mellttalem mhunn Galion ghoddie chintlem astolem. Hea pasot tannem tea zomeak addaunk na. Zaitea vorsam uprant Paulun Korintkarank poili chitt boroili tednam to Sostenes nanvachea eka bhava vixim uloita. To hoch Sostenes aslo kai? Hea vixim amkam khobor na. (1 Kor. 1:1, 2) Punn to hoch Sostenes aslo zalear ani tannem tea zomeant fuddakar ghetlolo zalear pasun hea ghoddnnek lagon kitem tori borem zalem oxem dista. Karonn tachea jivitant ghoddlolea hea vaitt ghoddnneank lagon taka ghoddie Kristanv zaunk modot zali.

16. Jezun Pauluk mhunnttlolim utram ugddas dovrun porgottnni korunk amkam koso dhir melltta?

¹⁶ Ami hea odheai-ant polloilem toxem, Judevamnim Paulucho sondex nakarlea uprant, Jezun taka oxem mhunnttlem: “Bhienaka, porgott korit rav ani vogi ravonaka. Karonn hanv tujea sangata asam.” (Itihas 18:9, 10) Tor him utram ami ugddas dovrunk zai, khas korun lok amcho sondex nakarta tednam. Karonn, Jehova Dev dusreanchea kallzant kitem asa tem zannam ani to khaltea kallzanchea lokank aplea sorxim voddun haddtta. (1 Sam. 16:7; Juanv 6:44) Tor, ami porgottnnechem kam korit ravonk zai. Dor vorsa hozaramnim lok ani dor disa xemboramnim lok bautizm ghetat. Tor ‘soglea raxttrantlea lokank Jezuche xis korunk’ dilʼli adnea ami pallttat zalear, ami Jezuchi hi khatri ugddas dovrunk zata, “Sonvsarachea xevottachea vella poriant hanv tumchea sangata asa.”​—Mt. 28:19, 20.

17, 18. Efezant vochonk bhair sortana, Paulu kitem chintunk laglo astolo?

¹⁷ Galion ghetlolea nirnnoiank lagon Korintantlea nove sobhent xanti zaunk pavli vo na tem amkam khobor na. Punn Bible amkam sangta, ki Korinta thaun voichea poilim Paulu thoim “thodde dis ravlo.” 52 K.X.-ant, Kenkreia doriachea dhokea thaun Siriek vochonk tannem ek ievzonn kaddli. Hem Korinta thaun sumar 11 kilometr udente vatten asa. Kenkreia soddun voichea poilim Paulun “ek angvonn kelʼli dekhun . . . tannem aple kens katorle.” c (Itihas 18:18) Uprant to Akuila ani Prisilak gheun Aegean doriantlean, Asia Minorachea Efezant vochonk bhair sorlo.

¹⁸ Paulu Kenkreia thaun bhair sortana, Korintant mellʼllolea borea onubhova vixim tannem chintlem astolem. Taka khuxal zaunk zaitim karonnam aslim. Dhedd voros poriant tannem Korintant porgottnni keli dekhun taka ies mellʼllo. Korintant poilech pavtti Kristi sobha suru zalʼli ani bhav-bhoinnam Justusachea ghorant, mittingek mellon ietalim. Paulun Justusak, Krispus ani tanchea ghorabeak ani toxench zaitea zannank sotant ieunk modot keli dekhun to tancho khub mog kortalo. Uprant, Paulun tanchea pasot aple chittint, tinch ‘apli chitt zaun asa,ʼ ji aplea kallzacher boroilea oxem mhunnttlem. Ami pasun zankam sotant ieunk modot kortat tancho ami khub mog kortat. Tim bhav-bhoinnam eke ritin “amchi chitt zaun asa” ani tankam polloun ami khub khuxal zatat.​—2 Kor. 3:1-3.

19, 20. Efezant pavtanch Paulun kitem kelem, ani Jehovache sevent chodd vavr korunk chintʼtat tednam ami Paulu thaun kitem xikonk zata?

¹⁹ Efezant pavlea uprant, Paulun rokddench aplem kam suru kelem. To “sobha-ghorant gelo ani thoinchea Judevank somzonni diunk laglo.” Punn hea vellar to Efezant chodd temp ravonk na. Thoinchea bhav-bhoinnamnim taka rav mhunn sanglem, punn “to thoim ravonk toiar zaunk na.” (Itihas 18:19) Thoinchean bhair sortana tannem Efezkarank sanglem, “Jehovak zai zalear hanv tumchea lagim porot ietolom.” (Itihas 18:20, 21) Efezant anikui zaitea lokank porgottnni korunk zai mhunn Paulu zannam aslo ani taka thoim porot ieunk zai aslem. Punn tannem soglem Jehovachea hatant soddlem. Pauluchea hea udharonnantlean ami kitem xikonk zata? Jehovache sevent chodd vavr korunk ami kitem kortolim tem ami chintunk zai. Punn Jehovachi khuxi zannam zaunk ami vavr korunk zai ani to dita tea margdorxonacher sodanch patieun ravonk zai.​—Jak. 4:15.

²⁰ Akuila ani Prisila Efezant ravlim. Ani Paulu tarvar boson Sezariant gelo. Uprant thoim thaun to “voir vochon” ghoddie Jeruzalemant gelo. Ani thoinchea sobhentlea bhav-bhoinnank mellʼllo. Khorench, tache dusre mixinori bhonvddent taka ies mellʼllo. Tea uprant, to Siriechea Antiokant gelo. Hea zagear to mixinori bhonvddi korinaslo tednam ravtalo. (Itihas 18:22-acher aslolo study note nwtsty-E polloiat.) Punn tachi xevottachi mixinori bhonvddi koxi astoli kai?