1-3. (a) Kristi sobhent kiteak futt poddonk xoktali? (b) Itihas pustokachea hea ghoddnnecher obheas kelʼlean amkam koso faido zatolo?

 PAULU ani Barnabas poili mixinori bhonvddi korun, Antiokachea Siria xarant aileat ani te khub khuxal asat. Karonn Jehovan, “Judev nhoi tea lokank bhavarth dovrunk vatt ukti keli.” (Itihas 14:26, 27) Itlench nhoi, Antiokant pasun soglim zannam khuxal asat. Karonn “khub lokamnim” bori khobor aikolea ani zaite Videxi lok Kristanv zaleat.​—Itihas 11:20-26.

² Punn Judeiant aslolim Kristanvam novea xisam vixim aikotat tednam, soglinch zannam khuxal nant. Soglea Kristanvamnim sunot korunk zai oxem thoddeank dista, punn herank oxem korchi goroz na mhunn dista. Tor Judev Kristanvamnim ani Videxi Kristanvamnim eka-meka sangata koxem vagonk zai, ani Moizesa udexim dilʼlo Kaido tannim pallunk zai kai? Hea vixim sobhent itlo vad-vivad zalo ki bhav-bhoinnam modem futt poddonk xoktali. Tor bhavamnim kitem kelem?

³ Itihas pustokantlea hea ghoddnnentlean amkam zaitim mhotvachim lisanvam xikonk mellttat. Amchea disamnim xanti piddʼddear korta toslem kitem-i zalem zalear, amchea modem aslolo ekvott samballunk hea ghoddnnentlean amkam modot zatoli.

4. Thodde Judev Kristanv azunui koslem chintop gheun boslole, ani taka lagon amchea mukhar koslo prosn ieta?

⁴ Lukasan boroilem: “Judeia thaun thodde lok Antiokak aile ani thoinchea bhavank oxem xikounk lagle: ‘Jea meren tumi Moizesa udexim dilʼlea kaidea pormonnem sunot korinant, tea meren tumkam soddvonn mellonk xokona.’” (Itihas 15:1) ‘Judeia thaun ailole he munis,’ Kristanv zaunchea poilim Farizev asle vo na tem amkam khobor na. Punn tanchem chintop Farizevam bhaxenuch aslem mhunn amkam dison ieta, je gorje bhair kaideank favo na titlem mhotv ditale. Ani tannim sanglem tem Jeruzalemantlea vhoddil ani apostlam thaun aslem mhunn te ghoddie dakhounk sodhtale. Punn videxi lokamnim sunot korchi goroz nasli mhunn Devan Pedruk kolloilʼlem. (Itihas 15:23, 24) Tori astana, 13 vorsam uprant pasun sunot korunk zai mhunn thodde Judev Kristanv kiteak mhunnttale? a—Itihas 10:24-29, 44-48.

5, 6. (a) Sunot korunkuch zai mhunn thoddea Judev Kristanvank kiteak distalem? (b) Sunoticho korar Abrahama sangata kelʼlea koraracho bhag aslo kai? Somzaiat. (Futtnott polloiat.)

 ⁵ Sunot korunkuch zai mhunn Judev Kristanvank zaitea karonnank lagon distalem. Ek mhunnttlear, ho kaido tankam svota Jehovan dilʼlo. Ani sunot kelʼlean te Jehova lagim ek lagxilʼlo sombond zoddunk pavtale. Toxench, Jehovan Abrahamak ani tachea ghoranneantlea soglea cheddeank ani dadleank sunot korunk lailʼli. Uprant, tannem hoch kaido Izraelitkarank dilʼlo. b (Lev. 12:2, 3) Titlench nhoi, Moizesa udexim dilʼlea Kaidea pormonnem ek porki, zo Izraelitkaranchea festam-porbamnim, zoxem to Paskachea jevnnant vantto gheunk sodhtalo zalear, tannem pasun sunot korunk zai asli. (Sutt. 12:43, 44, 48, 49) Tor, sunot korunk naslolo ek munis nitoll na ani Devachi seva korunk purto na mhunn Judev lok chintʼtale.​—Iz. 52:1.

⁶ Tor Kristanv zalʼlea Judevank aplem chintop Jehovachea chintpa sarkem korunk bhavarthachi ani dhirachi goroz asli. Karonn atam Somurtichea korara bodlek novo korar pallunk zai aslo. Judev dhormant zolm ghetlolo konn eklo, apxinch Devachea porjecho bhag zainaslo. Ani zaite Judev Kristanv, Judevam modem ravtale dekhun Jezuk Mesias mhunn manun gheunk ani sunot korunk naslolea lokam sangata mellon Jehovachi bhokti korunk tankam khorench dhirachi goroz asli.​—Jer. 31:31-33; Lukas 22:20.

7. ‘Judeia thaun ailolea thoddea lokank’ kitem somzonk na?

⁷ Punn Devache dorje bodlonk nasle. Karonn Moizesa udexim dilʼlea Kaideant aslolim mullavim totvam, novea korarant pasun aslim. (Mt. 22:36-40) Ani sunoti vixim Paulun uprant oxem boroilem: “Bhitorlean Judev to khoro Judev ani khori sunot Devachea boroilʼlea kaidea pormonnem zata ti nhoi, punn povitr xokte pormonnem kallzachi sunot zata ti.” (Rom. 2:29; D.S. 10:16) Punn, ‘Judeia thaun ailolea thoddea lokank’ tem somzonk na. Ani Devachea lokamnim sunot kelʼli Jehovak zai, oxem tankam distalem. Tor te aplem chintop bodlunk toiar astole kai?

8. Sunoticho vixoi Jeruzalemantlea Sonchalon Monddolla mukhar vhoronk kiteak tharailo?

⁸ Lukasan fuddem oxem boroilem: “Hea vixoi-acher Paulu ani Barnabasa lagim tancho [“Judeia thaun” ailolea lokancho] vad-vivad zalo ani te borech zhogoddle. Dekhun hea vixim Paulun ani Barnabasan, ani toxench anik thoddea bhavamnim Jeruzalemantlea apostlam ani vhoddilam lagim vochon ulounchem mhunn manddavoll keli.” c (Itihas 15:2) “Vad-vivad zalo ani te borech zhogoddle,” hea utrantlean  Antiokantlea sobhentlea bhav-bhoinnank sunoticho vixoi khub gombhir aslo mhunn kollon ieta. Ani bhavam lagim to suttavo korunk zaunk na. Tor sobhechi xanti ani ekvott samballunk bhavamnim ho vixoi “Jeruzalemantlea apostlam ani vhoddilam” mukhar vhoronk tharailo, je tea vellar Sonchalon Monddoll aslem. Tor Antiokantlea vhoddilam thaun aiz ami kitem xiktat?

9, 10. Antiokantlea bhavamnim, toxench Paulu ani Barnabasan aiz amkam ek bori dekh koxi dovorlea?

⁹ Ami xikonk zata tem ek mhotvachem lisanv mhunnttlear, ami Jehovachea songottnnecher visvas dovrunk zai. Hea vixim chintat, tea vellar Sonchalon Monddollache sogle bhav Kristanv zaunche poilim Judev asle mhunn Antiokache bhav zannam asle. Tori astana, sunoti vixim aslolo prosn te Devachea Utracher adarit suttave kortole mhunn tannim tea bhavancher visvas dovorlo. Punn Antiokantle bhav tancher visvas kiteak dovrunk pavle? Karonn Jehova tache povitr xokte udexim ani Kristi sobhecho Mostok, Jezu Krista udexim tankam margdorxon ditolo mhunn sobhek khatri asli. (Mt. 28:18, 20; Ef. 1:22, 23) Tor aiz pasun koslo-i vixoi suttavo korunk amkam kotthin zata zalear, ami Devachea songottnnecher ani Sonchalon Monddollacher visvas dovrun hea Antiokachea bhav-bhoinnanchi dekh gheum-ia.

¹⁰ Toxench, khaltikai ani pasiens dakhovop kitlem mhotvachem tem-ui ami xiktat. Ugddas korat, Pauluk ani Barnabasak, raxttrantlea lokam lagim dhaddunk povitr xokte udexim vinchun kaddlole. Tori astana, sunoti vixim aslolo ho vixoi, thoinchea-thoinch Antiokant suttavo korunk tankam odhikar asa mhunn tannim chintunk na. (Itihas 13:2, 3) Karonn Paulun uprant boroilem: “Hanvem thoim [Jeruzalemant] voichem mhunn Somian mhaka ugddapem kelʼlem.” (Gal. 2:2) Tor hantuntlean tannim povitr xokte udexim mellʼllolem margdorxon apnnailem mhunn amkam kollon ieta. Aiz pasun sobhechi xanti ani ekvott piddʼddear korunk xokta tosli poristhiti ieta tednam, sobhentle vhoddil khaltikai ani pasiens dakhoitat. Vad-vivad korchea bodlek vo apunnuch sarko mhunn dakhoun diunchea bodlek, Jehovachem chintop kitem asa tem zannam zaunk te proitn kortat. Tor te Bible-acho obheas kortat ani visvaxi chakran kitem margdorxon dilam tea vixim sodh kortat.​—Filp. 2:2, 3.

11, 12. Jehovacher patieun ravop kiteak gorjechem?

 ¹¹ Thodde pavtti umkeach vixoi-acher anik somzonni mellonk amkam Jehovacher patieun ravonk poddot. Udharonnak, Kornelak makhun sumar 13 vorsam uprant, Videxi Kristanvamnim sunot korchi goroz na mhunn Jehovan spoxttponnim kolloilem. Hea vixim kollounk Jehova itlim vorsam kiteak ravlo astolo? Judev Kristanvank aplea chintpant bodol korunk Jehova tankam goroz titlo vell diunk sodhtalo. Tannem Abrahama sangata kelʼlo sunoticho korar Judevank khub mhotvacho aslo. Karonn te Abrahamacho khub mog kortale ani taka khub man ditale. Toxench, 1,900 vorsam poriant te ho korar pallit ailole. Tor okosmat ho korar pallchi goroz na mhunn manunk tankam khub kotthin aslem!—Juanv 16:12.

¹² Apli dekh gheunk Jehova amchea sangata pasiens ani doiall ritin vagta. Ho amkam ek vhodd sueog zaun asa! To jem kitem xikoita tem sodanch amchea faideak asta. (Iz. 48:17, 18; 64:8) Tor songottnnent vo thoddea versam vixim amche somzonnent bodol zata tednam amkam dista tench sarkem asa, hem chintop ami pois korunk zai. (Up. 7:8) Tumkam pasun oxem dista zalear, Itihas 15-nt xiklolim lisanvam bariksannen niall korat ani tumchea jivitant tim apnnaunk Jehova lagim modot magat. d

13. Ami amchea sevent Jehovachea pasiensachi dekh koxi gheunk zata?

¹³ Ami Bible xikoitat te lok apli chukichi patienni ani Bible-acher adarit nant teo chali-riti soddunk toiar nant tednam, ami Jehovachea pasiensachi dekh gheunk zai. Devachea povitr xoktechea adaran tannim aplea jivitant bodlav korunk, ami pasiensan tankam modot korit ravonk zai. (1 Kor. 3:6, 7) Toxench, ami tanchea pasot magnnem korunk zai. Ani tankam sogleam-von bore ritin modot korunk Jehova amkam sarkea vellar vatt dakhoitolo.​—1 Juanv 5:14.

14, 15. (a) Antiokantlea bhav-bhoinnamnim Paulu, Barnabas, ani tanchea sangateank man koso dakhoilo? (b) Paulu ani tachea sangateamnim Finisia ani Samariachea bhav-bhoinnank urba koxi dili?

¹⁴ Lukas fuddem boroita: “Sobhentlim bhav-bhoinnam thoddi vatt meren tankam pavounk ailim, ani uprant he bhav Finisia ani Samariantlea vattarantlean gele. Ani thoim Judev nhoi te lokank koxe toren svota bodlun Devak lagim sorleat tea vixim bhavank bariksannen sanglem. Hem aikon te khub khuxal zale.” (Itihas 15:3) Tor Paulu, Barnabas, ani tachea sangateank thoddi vatt meren pavounk vochon tim bhav-bhoinnam tancho kitlo mog kortalim, tankam kitlo man ani tenko ditalim, toxench Jehovachem besanv tancher aslolem tankam zai aslem mhunn tannim dakhoun dilem. Hea toren tannim amkam anik ek bori dekh dovorlea. Ti mhunnttlear, ami pasun amchea Kristi bhav-bhoinnank ani “chodd korun uloupant ani xikoupant khub vavr kortat” tea vhoddilank man diunk, ami amchean zata tem soglem korunk zai.​—1 Tim. 5:17.

¹⁵ Paulu ani tache sangati Jeruzalemant voitana Finisia ani Samariechea bhav-bhoinnank mellttat. Ani te tankam, zaite Videxi lok Kristanv koxe  zale tea vixim bariksannen onubhov sangtat. Hea vorvim, te tea bhavank urba ditat. He onubhov aikolʼle te thodde bhav Kristanv zaunchea poilim Judev asle, je Istevak tachea bhavarthak lagon jivexim marlea uprant, Jeruzalemantlean dusrea vattaramnim pollon gelʼle. Tor aiz pasun sonvsarbhor, ani khas korun amchea bhavank dhumallo sosunk poddtta tea zageamnim, porgottnnechea kamacher Jehova koxem besanv ghalta tea vixim ami ripott aikotat tednam amkam kitli urba melltta nhoi! Tor mittingemnim, zomatimnim ani odhivexonamnim osle ripott ietat te aikonk, ani amchea masikamnim vo jw.org-cher ietat teo jivitacheo kanneo vachunk amchean zata tem soglem korum-ia!

16. Adlea Kristanvank sunoticho vixoi khub gombhir aslo mhunn koxem kollon ieta?

¹⁶ Dokxinne vatten 550 kilometr provas korun, Antiokantlean ailole bhav Jeruzalemant pavle. Tanchea vixim Lukasan oxem boroilem: “Te Jeruzalemant pavle tednam sobhen, apostlamnim ani vhoddilamnim khuxalkaien tankam ieukar dilo. Ani Devan tanchea udexim kelʼlea soglea kamam vixim Paulun ani Barnabasan tankam sanglem.” (Itihas 15:4) Punn, “Farizevanchea zomeantlea thoddea lokamnim zannim bhavarth dovorlolo, tantuntle thodde aplea zagea voile utthon ube ravle. Ani tannim mhunnttlem: ‘Judev nhoi to lok zannim bhavarth dovorla tanchi sunot korunk zai ani Moizesan dilʼle Kaide pallche mhunn tankam adnea diunk zai.’” (Itihas 15:5) Khorench, sunot korchi vo na, ho tankam ek gombhir vixoi zaun aslo ani to suttavo korunk zai aslo.

17. Jeruzalemant aslolea Sonchalon Monddollant konn asle, ani tanchea sangata kam korunk “vhoddilank” kiteak nemlole?

¹⁷ Mhonnʼnneo 13:10 mhunntta: “Budh ghetat tanche thaim xanneponn asta.” Hea totvacher adarit, “apostl ani vhoddil hea [sunotichea] vixoi-acher ulounk ektthaim zale.” (Itihas 15:6) Apostl ani vhoddilamnim soglea sobham pasot nirnnoi ghetlo tech bhaxen, aiz Sonchalon Monddoll korta. Punn “vhoddil” apostlam sangata kiteak kam kortale? Ugddas dovrat, apostl Jakobak jivexim marlolo ani thoddea vella pasot apostl Pedru bondkhonnint aslo. Tor oxench kitem dusrea apostlam sangata ghoddlem zalear, sobhentle her makhlole bhav sobhechi dekhrekh korpachem kam fuddem vhorot ravonk xoktole asle.

18, 19. Pedrun khoinchim mhotvachim utram mhunnttlim, ani tachea utrantlean kitem kollon ieta?

¹⁸ Lukasan fuddem boroilem: “Tannim hea vixoi-acher bariksannen chintlem  ani tanchea modem khub ulovop zalem. Tea uprant Pedru ubo ravlo ani tannem mhunnttlem: ‘Bhavamno, Judev nhoi tea lokamnim mhojea tonddantlean bori khobor aikonchi ani bhavarth dovorcho mhunn Devan tumchea modlo survatekuch mhaka vinchlo hem tumi bore bhaxen zannant. Ani Dev, zo kallzam vollkhota, tannem tankam povitr xokti diun, zoxi amkam maniotai dilea toxi tankam-i maniotai dilea mhunn sakx dilea. Tannem amchea modem ani tanchea modem kainch bhedbhav korunk na, punn tanchea bhavarthak lagon tanchim kallzam xudʼdh keleant.’” (Itihas 15:7-9) Eka pustoka pormonnem vers 7-antlea, “bariksannen chintlem ani tanchea modem khub ulovop zalem,” hea utrank uzar kelʼlea Grik utracho orth mhunnttlear, “bariksannen choukoxi korop vo bhasabhas korop.” Tor tanchem chintop veg-vegllem aslem. Tori astana, tea vixoi-acher ukteponnim ulounk ani tea vixim tanchim bhavnam ani chintop kitem aslem tem sangonk te toiar asle mhunn amkam hantuntlean kollon ieta.

¹⁹ Pedruchea mhotvachea utrantlean tannem thoim aslolea sogleanchea ugddasak haddlem ki sunot zaunk naslolea Videxi lokank, tem mhunnttlear, Kornelak ani tachea familik 36 K.X.-ant, poilech pavtt povitr xokte udexim makhle tednam to thoim aslo. Tor Judev ani Videxi lokam modem Jehova ontor korina zalear, munxank ho odhikar konnem dila? Toxench, Pedrun aplea utrantlean dakhoun dilem, ki ek munis Moizesa udexim dilʼlo Kaido palltta mhunn nhoi, punn tannem Kristacher bhavarth dovorla dekhun tachi bhokti Devak manvotali.​—Gal. 2:16.

20. Sunot korunk zai mhunn sangtale te “Devachi porikxa” koxe kortale?

²⁰ Devan spoxtt ritin kitem sanglolem ani tannem apli povitr xokti koxi uzar keli tem monant dovrun Pedrun oxem mhunnttlem: “Tor amchea purvozank vo amkam pasun jem vhoronk zhodd zata, toslem vojem hea xisancher dovrun tumi Devachi porikxa kiteak kortat? Tachea bodlek, Jezu Kristachea favo naslole doien amkam taronn melltta toxem tankam-i melltta mhunn amkam bhavarth asa.” (Itihas 15:10, 11) Sunot korunk zai mhunn sangtale tannim khorem mhunnttlear, Devan tankam Jezu Krista udexim favo nasloli doia dakhoilea mhunn upkari asonk zai aslem. Karonn tanchea lagim svota zaun Moizesa udexim dilʼlo Kaido pallunk zainaslo dekhun tankam moronn favo aslem. (Gal. 3:10) Punn toxem korunk te Videxi Kristanvank sangtale. Hea toren te “Devachi porikxa” kortale vo Devachem pasiens piddʼddear kortale.

21. Barnabasan ani Paulun kitem mhunnttlem jea udexim bhavank sarko nirnnoi gheunk modot zali?

²¹ Chodd korun, Pedruchim utram aikon tache aiknnare chintunk poddle. Karonn thoinche “sogle lok vogi ravle” mhunn Bible amkam sangta. Uprant, “Devan tanchea udexim Judev nhoi tea lokam modem vizmitam ani ojapanchim kamam kelim” mhunn Barnabasan ani Paulun sanglem. (Itihas 15:12) Xekim, sunoti vixim Devachem chintop kitem asa tem zannam zaunk apostlank ani vhoddilank sarko nirnnoi gheunk modot zali.

22-24. (a) Aiz Sonchalon Monddoll poilea xekddeantlea Sonchalon Monddollachi dekh koxi gheta? (b) Sogle vhoddil Jehovak zai toxem korunk sodhtat mhunn tannim koxem dakhounk zata?

²² Aiz pasun Sonchalon Monddollache vangddi, Devachea Utrantlean margdorxon  sodhtat ani povitr xokti mellonk kallzantlean magnnem kortat. (St. 119:105; Mt. 7:7-11) Te Devachea chintpa pormonnem nirnnoi gheunk sodhtat. Heach pasot, mittinge vellar te khoinchea mudʼdeancher uloitole tea vixim, dor eka Sonchalon Monddollachea vangddeak adim-fuddench volleri melltta. Oxem kelolean, te poilinch tea mudʼdeam vixim chintunk xoktat ani magnnem korunk xoktat. (Mho. 15:28) Toxench, mittinge vellar eka umkeach vixoi-acher tanchem chintop kitem asa tea vixim te eka-meka lagim ukteponnim ani respedan uloitat. Hea vellar te zaite pavtti Bible uzar kortat.

²³ Sobhechea vhoddilamnim pasun tanchi dekh gheunk zai. Ani mittinge vellar ek gombhir vixoi koso suttavo korcho tem tankam kollona zalear, tannim thoinchea Xakha Ofisachi vo Xakha Ofisan nemlolea prothinidichi, zoxem sorkittachi dekhrekh korpeachi modot gheunk zata. Goroz poddlear Xakha Ofis, Sonchalon Monddollak chitt boroitolem.

²⁴ Khorench, songottnne thaun ani sobhe thaun melltta tem margdorxon ap-khuxen pallttat tankam ani khaltikai, visvaxiponn ani pasiens dakhoitat tankam, Jehova zaitim besanvam dita. Ami oxem kelear, fuddlea odheai-ant polloitolim toxim, Jehova amkam xanti ditolo, toxench sobhent ekvott samballunk ani vaddavoll korunk to amkam modot kortolo.