1-3. (a) Eutikus melo tea ratik kitem zalem tem sangat. (b) Paulu kitem korta, ani hantuntlean Paulu vixim amkam kitem kolltta?

 PAULU Troasant asa. To sobhentlea zaitea bhav-bhoinnam sangata eka unchlea kuddant asa. Tanchea sangata hi tachi nimanni sanz zaun asli dekhun to tanchea lagim zaito vell uloita, ani atam modian zalea. Tea rumant thodde dive pettlole asat, hea pasot gormi asa ani titlo varo pasun na. Tisrea malliecher aslolea eka zonela lagim Eutikus nanvacho ek tornnatto boslolo asa. Ani Paulu uloita toso taka nhid lagta ani to tisre mallie voilean sokol poddtta.

² Lukas ek dotor aslolean, Eutikus poddlo thoim pavonk ani taka topasunk to ghoddie poilo aslo. Punn Eutikusak modot korunk te kainch korunk xoklenant. Karonn te “taka uklunk gele tednam tankam to melolo” melltta. (Itihas 20:9) Punn uprant ek vizmit zata. Paulu bagon taka veng marta ani thoim hajir zalʼleank mhunntta: “Bovall korinakat, karonn to jivo asa.” Hoi, Paulu Eutikusak jivont korta.​—Itihas 20:10.

³ Hea ghoddnnentlean, Jehova aplea povitr xokte udexim ojapachim kamam korunk xokta mhunn amkam spoxtt toren dison ieta. Eutikus melʼlo ti Pauluchi chuk nasli. Tori astana, hea khas mittinge vellar, bhav-bhoinnam dukhi zalʼlim vo Jehovacher tancho bhavarth unno zalʼlo Pauluk naka aslem. Tea pasot tannem Eutikusak jivont kelo. Hea vorvim tannem tea sobhentlea bhav-bhoinnank bhuzvonn ani ghottai dili. Oxem kelolean, tim urben porgottnni korit ravonk pavtolim aslim. Tor Pauluchea nodren jivit ekdom moladik aslem mhunn amkam spoxtt toren dison ieta. Ani tachim him utram amchea ugddasak ietat, jednam tannem mhunnttlem: “Hanv konnacheach rogtacho zobabdar na.” (Itihas 20:26) Tor Paulu bhaxen jivit moladik mhunn lekhunk, hea odheai-antlean amkam modot mellttoli.

4. Paulu koslea bhirankull poristhitint aslo?

⁴ Fattlea odheai-ant ami polloilʼlem, ki Paulu Efezant eke bhirankull  poristhitint aslo. Karonn to thoim porgottnni kortalo dekhun lok khub ragar zalʼle. Artemis devichi bhokti korunk je konn murteo kortale ani viktale, tannim ek morcha kaddlo. Tea uprant kitem zalem tea vixim Itihas 20:1 sangta: “Bovall thambtoch, Paulun xisank apoun haddle ani tankam urba dilea uprant, voita mhunn sangon to Masedoniak vochonk bhair sorlo.”

5, 6. (a) Paulu Masedoniant kitlo temp ravlo astolo, ani thoinchea bhavam pasot tannem kitem kelem? (b) Paulu bhav-bhoinnank koso lekhtalo?

⁵ Masedoniak voiche vatter aslo tednam, Paulu Troasachea doriachea dhokear thoddo temp ravlo. Tit, zo Korintant aslo, to thoim ietolo mhunn Paulu chintʼtalo. (2 Kor. 2:12, 13) Punn to thoim ieuncho na mhunn Pauluk kollʼllem tednam, to Masedoniak gelo. Ani thoim to sumar ek voros-bhor ravlo. Ani tannem “xisank zaitem sangon urba dili.” a (Itihas 20:2) Thoddea tempan Tit Masedoniant ailo ani Paulun Korintkarank boroilʼli chitt vachun, Korintantlim bhav-bhoinnam kitlim khuxal zalʼlim tem tannem Pauluk sanglem. (2 Kor. 7:5-7) Hem aikon Paulun tankam anik ek chitt boroili. Ti mhunnttlear, 2 Korintkarank.

⁶ Paulun Efezantlea ani Masedoniantlea bhav-bhoinnank bhett diun “urba” dili mhunn Lukasan sanglem. Hantuntlean, Paulu bhav-bhoinnancho kitlo mog kortalo tem dison ieta! To Farizevam sarko naslo, je dusreank unnea nodren  lekhtale. Punn to bhav-bhoinnam sangata Devachi seva korunk khuxal aslo. (Juanv 7:47-49; 1 Kor. 3:9) Ani tankam khor solʼlo ditana pasun apunn tanchea poros boro, oxem tannem kednanch chintunk na.​—2 Kor. 2:4.

7. Aiz Kristi sobhechea dekhrekh korpeamnim Pauluchi dekh koxi gheunk zata?

⁷ Aiz pasun, sobheche vhoddil ani sorkittachi dekhrekh korpi, Pauluchi dekh gheunk apleachean zata tem soglem kortat. Te eka munxak khor solʼlo ditat tednam pasun taka urba melltta tea toren diunk proitn kortat. Te khoraien vagonk sodhinant. Punn dusreank somzon ghetat ani tankam ghottai diunk sodhtat. Eka onubhovi sorkittachi dekhrekh korpean oxem sanglem: “Amchim choddxim bhav-bhoinnam sarkem tem korunk sodhtat. Punn zaite pavtti tanchea jivitant oxem kitem tori ghoddtta, zaka lagon tim niraxi zatat vo bhietat ani kitem korchem tem tankam somzona.” Tor oslea bhav-bhoinnank, vhoddilamnim zaitea vattamnim ghottai diunk zata.​—Heb. 12:12, 13.

8, 9. (a) Pauluk tarvan Siriek vochpachi ievzonn kiteak bodolchi poddli? (b) Judev lok Paulucho dves kiteak kortale?

⁸ Masedonia thaun Paulu Korintant gelo. b Thoim tin mhoine ravlea uprant, taka Kenkreiant vochonk zai aslem, zoim tannem tarvantlean Sirient vochonk tharailʼlem. Ani bhav-bhoinnamnim dan kelʼle poixe gheun Paulu, Sirie thaun Jeruzalemantlea gorib bhav-bhoinnank diunk sodhtalo. c (Itihas 24:17; Rom. 15:25, 26) Punn tannem jem tharailʼlem tantunt taka thodde bodlav korche poddle. Karonn, Itihas 20:3 mhunntta: “Judevamnim tachea add ek ievzonn keli!”

⁹ Paulun Judev dhorm soddlolo dekhun, Judev lok tacho khub dves kortale. Hachea poilim Paulun Korint xarant porgottnni kelʼli dekhun thoim mha-sobhecho ek fuddari Krispus Kristanv zalʼlo. (Itihas 18:7, 8; 1 Kor. 1:14) Anik eka vellar Korintantlea Judev lokamnim, Akaia nanvachea prantantlo ek Romi odhikari, Galio kodde vochon Paulun kaido moddlo mhunn tacher khotto arop ghatlolo. Punn Galion tachem aikonk na dekhun Judev lok ekdom ragar zale. (Itihas 18:12-17) Tea pasot Paulu laginch aslolea Kenkreia thaun tarvan voitolo mhunn, Korintantlea Judev lokank kollʼllem tednam, tannim taka dhorun jivexim marunk manddnni keli. Tor Paulun tea vellar kitem kelem tem ami polloum-ia.

10. Paulu bhielo mhunn to Kenkreiant vochonk na kai? Somzaiat.

¹⁰ Paulu Kenkreiant voichea bodlek jea vattentlean to aila teach vattentlean, mhunnttlear, Masedoniantlean porot voitolo mhunn tannem tharailem. Karonn to aplea jivachi ani bhav-bhoinnamnim dilʼlea denngeanchi rakhonn korunk sodhtalo. Punn he vatten pasun cholon provas korop dhokeachem aslem. Karonn oslea rosteancher zaite chor lipon ravtale. Toxench, provas korpi ravonk xoktale te zage pasun surokxit nasle. Tori astana, Kenkreiant voichea  bodlek, hea vattentlean provas korop odik borem zatolem mhunn Paulun chintlem. Ani ho provas kortana to eklo naslo, punn tachea borabor tache sangati asle. Te mhunnttlear, Sopater, Aristarkus, Sekundus, Gaius, Timot, Tikikus, ani Trofimus.​—Itihas 20:3, 4.

11. Amchea jivachi rakhonn korunk ami kitem kortat, ani hea vixim Jezun amkam koslem udharonn dovorlam?

¹¹ Paulu bhaxen aiz Kristanvam pasun, porgottnnent astana aplea jivachi rakhonn korunk apleachean zata tem soglem kortat. Thoddea vattaramnim porgottunk voitana, tim her bhav-bhoinnam sangata vo dog-dog zannam voitat. Tancher ek-na-ek dis dhumallo ietoloch mhunn tankam khobor asa. (Juanv 15:20; 2 Tim. 3:12) Punn tim mudʼdom zaun aplo jiv dhokeant ghalinant. Hea vixim Jezuchem borem udharonn asa. Eka vellar Jeruzalemant tache virodhi taka fatraunk sodhtale tednam, “Jezu liplo ani Devmondira thaun bhair soron gelo.” (Juanv 8:59) Anik eka vellar Judev lok taka jivexim marunk manddnni kaddttale “tednam thaun Jezu Judevam modem ukteponnim bhonvona zalo, punn to vattar soddun, to ranvott vattara lagim aslolea . . . xarant gelo.” (Juanv 11:54) Aplea jivachi rakhonn korunk, Jezun apleachean zatalem tem soglem kelem. Karonn taka Devachi khuxi korunk zai asli. Ani aiz Kristanvam pasun toxench kortat.​—Mt. 10:16.

12, 13. (a) Paulun Eutikusak jivont kelo tednam, sobhek koxem dislem? (b) Amcho mogacho konnui morta tednam, Bible-antlea khoinchea bhorvonxeak lagon amkam bhuzvonn melltta?

¹² Paulu ani tache sangati, Masedoniantlean sangata provas kortat. Ani uprant te veg-vegllea rostean voitat. Punn Troasant te porot mellttat mhunn dison ieta. d Hea vixim Lukasan oxem boroilem: “Ami . . . panch disam bhitor tanche kodde Troasant pavle.” e (Itihas 20:6) Ani heach zagear tannem Eutikus nanvachea tornnatteak jivont kelʼlo, zachea vixim ami hea odheai-achea survatek polloilʼlem. Eutikusak porot jivont polloun hea sobhentlea bhav-bhoinnank koxem dislem astolem tem chintat. Bible amkam sangta: “Tankam utramnim sangonk zaina itli bhuzvonn mellʼlli.”​—Itihas 20:12.

¹³ Aiz oslim vizmitam zainant tem khorem. Tori astana, zanchim mogachim mortat tankam Bible-ant aslolea jivontponnachea bhorvonxeak lagon ‘utramnim sangonk zaina titli bhuzvonn melltta.’ (Juanv 5:28, 29) Hea vixim chintat: Eutikus opurnn aslolean to porot melo. (Rom. 6:23) Punn Devachea Rajeant jivont zatolim tankam, sasnak jieuncho bhorvonso mellttolo. Toxench, jim Jezu sangata sorgar raj choloitolim, tankam piddʼddear zaina tosli kudd mellttoli.  (1 Kor. 15:51-53) Tor ami makhlolim vo “dusrim menddram” zaum, amkam sogleank jivontponnachea bhorvonxeak lagon ‘utramnim sangonk zaina titli bhuzvonn melltta.’—Juanv 10:16.

14. Paulu Efezantlea vhoddilank Miletusant mellʼllo tednam kitem sanglem?

¹⁴ Paulu ani tache sangati, Troasa thaun Asosant gele. Thoim thaun te Mitelin, Kios, Samos, ani Miletusant gele. Pauluk Jeruzalemant Paskanchi Porob suru zaunche poilim pavonk zai aslem dekhun, he pavtti provas kortana, to Efezant ravonk na. Punn Efezantlea vhoddilam lagim ulounk tannem tankam Miletusant mellonk sanglem. (Itihas 20:13-17) Te thoim pavle tednam Paulun mhunnttlem: “Hanvem Asiant paim dovorlo tea disa thaun tumchea modem hanvem mhojem jivit koxem sarlam tem tumi ekdom bore bhaxen zannant. Hanv Somiacho gulam zaun ekdom khaltikaien tachi seva korit ravlom ani Judevamnim mhojea add kelʼlea ievzonneank lagon hanvem khub dukham golloilim ani zaitea porikxencho fuddo kelo. Tumkam boreak poddtta toslem kitench sangonk hanv fatti soronk na ani toxench sogleam mukhar ani ghoran-ghor vochon tumkam xikounkui hanv fatti soronk na. Punn poschatap korun Deva koddem porot ieunk ani amchea Somi Jezucher visvas dovrunk hanvem Judev ani Grik lokank pasun ekdom bore bhaxen sakx dili.”​—Itihas 20:18-21.

15. Ghoran-ghor porgottnni kelʼlean kosle-kosle faide asat?

 ¹⁵ Paulu bhaxen ami veg-veglleo vatto uzar korun porgottnni kortat. Zoxem, vatter, bazarant vo bus stop-ancher ami lokam lagim uloitat. Punn ghoran-ghor porgottnni korop, Jehovachea Sakxeanchem mukhel kam zaun asa. Karonn hea toren dor-ekleak porot-porot bori khobor aikonk sondhi melltta. Tor Dev bhedbhav korina mhunn kollon ieta. Anik ek karonn mhunnttlear, ami ghoran-ghor voitat tednam khaltea lokank tanche gorje pormonnem ami modot korunk xoktat. Titlench nhoi, ghoran-ghor gelʼlean amcho bhavarth ghott zata ani amchi sosnikai vaddtta. Khorench, “sogleam mukhar ani ghoran-ghor” porgottnni kelʼlean lok amkam khorim Kristanvam mhunn vollkhonk pavtat!

16, 17. Paulu dhirvont aslo mhunn koxem kolltta, ani aiz Kristanvam tachi dekh koxi ghetat?

¹⁶ Paulu porot Jeruzalemant voitolo tednam, taka koslea dhokeancho fuddo korunk poddttolo tea vixim taka khobor na mhunn tannem Efezantlea vhoddilank somzailem. Punn tannem tankam mhunnttlem: “Toripunn, mhozo jiv mhaka molacho oxem hanv matui chintina. Punn koxe-i bhaxen mhoji dhanvodd ani mhoji seva purnn kelʼli mhaka zai. Hi seva mhaka Somi Jezun dilʼli ki hanvem Devachea favo naslolea doiechea bore khobre vixim bore bhaxen sakx diunchi.” (Itihas 20:24) Khorench, Paulu khub dhirvont aslo! Tachea jivitant kitem-i zaum, tachi bholaiki bigddom vo taka dhumallo ieum, to Devachi khuxi korit ravlo.

¹⁷ Aiz pasun Kristanvank zaitea trasancho fuddo korcho poddtta. Thoddea desamnim sorkaran amchea kamacher bondi ghatlea. Thoddeank dhumalleacho fuddo korcho poddtta, heranchi bholaiki bigoddtta, vo mansik duensacho fuddo korcho poddtta. Tea bhair, tornnatteank iskolant tanchea sangateam koddlean vaitt tem korunk dobhav ieta. Punn tanchi poristhiti kitem-i zaum, Paulu bhaxen “bore khobre vixim bore bhaxen sakx” diunk tannim nichov kela.

18. Apunn konnacheach rogtacho zobabdar zaina zaunk Paulun kitem kelem, ani Efezantlea vhoddilamnim Pauluchi dekh gheunk kitem korunk zai aslem?

¹⁸ Efezantle vhoddil Pauluk mellʼlle tednam tannem tankam spoxttponnim solʼlo dilo, ani tannem aplea sobhentlea bhav-bhoinnanchi koxi kallji ghetli tem Paulun tanchea ugddasak haddlem. Poilem mhunnttlear, hi tanchea sangata chodd korun tachi nimanni bhett mhunn tannem tankam sanglem. Uprant tannem mhunnttlem: “Hanv konnacheach rogtacho zobabdar na mhunn aichea disa tumi govai asat. Karonn hanv Devachea khuxe vixim sogleo vostu tumkam sangonk fattim soronk na.” Tor Efezantlea vhoddilamnim Pauluchi dekh gheun konnacheach rogtacho zobabdar zaina zaunk kitem korunk zai aslem? Paulun tankam fuddem mhunnttlem: “Tumcher ani akʼkhea hinddacher dhean diat. Karonn povitr xokten tumkam tanchi dekhrekh korpi mhunn nemleat. Devan aplea Putachea rogtan vikti ghetlolea sobhechi tumi gonvllea bhaxen kallji gheunchi mhunn tumkam nemleat.” (Itihas 20:26-28) Toxench, sobhent “zulum korpi kole” ietole ani “xisank aplea vatten voddun vhoronk chukicheo vostu  xikoitole” mhunn Paulun tankam xittkaunni dili. Tor vhoddilamnim kitem korchi goroz asli? Paulun tankam fuddem mhunnttlem: “Zagrut ravat, ani hanv tin vorsam meren dis ani rat, dukham golloun tumchea modlea dor-ekleak suchounneo di-it ravlam mhunn ugddas dovrat.”​—Itihas 20:29-31.

19. Jezuche thoddech apostl urlole tednam dhorm-broxtt korpeamnim kitem kelem, ani tea uprant kitem zalem?

¹⁹ Jezuche thodde apostl jive asle tednam, “zulum korpi kole” sobhent bhitor sorle. Tanche vixim sumar 98 K.X.-ant, apostl Juanvan oxem boroilem: “Atam pasun Kristache zaite virodhi aileat . . . Te amchea modlech bhair soron geleat, punn te amchea bhaxen nasle, karonn te amchea bhaxen asle zalear te amchea sangatach ravta asle.” (1 Juanv 2:18, 19) Jezu moron sumar 200 vorsam uprant, dhorm-broxtt korpeanche fuddari sobhent apnnakuch khas ani dusream poros vorte mhunn lekhtale. Anik sumar 100 vorsam uprant, Romi Somraz Constantine-an, khottea Kristi dhormak kaidea pormonnem maniotai dili. He dhorm-broxtt korpeanche fuddari ‘chukicheo vostu xikounk lagle’ ani apunn “Kristanv” mhunn dakhounk Bible-antlea xikounne sangata tannem khotti xikounn ani riti-rivazo misoll keleo. Ani aiz igorjent pasun osleoch khotteo xikounneo xikoitat ani riti-rivazo pallttat tem dison ieta.

20, 21. Paulun kosloch svarth nastana bhav-bhoinnanchi seva koxi keli, ani aiz Kristi vhoddil tachi dekh koxi ghetat?

²⁰ Paulu oslea dekhrekh korpeam bhaxen naslo, zannim uprant sobhentlea bhav-bhoinnancho faido ghetlo. Tachea bodlek, tannem svota kam korun apleo gorzo purnn keleo. Karonn to sobhecher bhar ghalunk sodhinaslo. Tannem tachea bhav-bhoinnanchi seva kelʼli ani hea sevek lagon tannim taka farik kelʼlem Pauluk naka aslem. Heach toren kosloch svarth nastana, bhav-bhoinnanchi seva korunk, Paulun Efezantlea vhoddilank urba dili. Tannem tankam mhunnttlem: “Tumi osoch vavr korun oskotank modot korchi ani Somi Jezuchim him utram sodanch ugddas dovorchim: ‘Gheunchea poros diunk chodd khuxalkai melltta.’”​—Itihas 20:35.

²¹ Aiz Kristi vhoddil Paulu bhaxen asat. Te igorzanchea fuddaream bhaxen nant, je girest zaunk lokam koddlean poixe ghetat. Punn te, ‘sobhechi kallji gheunk’ Devan tankam dilʼli zobabdari somzotat ani kosloch svarth nastana bhav-bhoinnanchi seva kortat. Je gorvixtt asat ani dusream koddlean man sodhtat, tankam sobhent kosloch zago na. Oslea gorvixtt munxank ani “chodd man” sodhtoleank xevottak kosloch man mellchona.​—Mho. 25:27; Mho. 11:2.

22. Efezantle vhoddil Paulucho itlo mog kiteak kortale?

²² Pauluk sobhentlea bhavancho khoro mog aslo dekhun, te-ui tacho khub mog kortale. Efez xar soddun vochpacho tacho vell pavlo tednam, “te sogle dukhamnim roddonk lagle, ani Pauluk veng marun tacho umo gheunk lagle.” (Itihas 20:37, 38) Aiz Paulu bhaxen, jim bhav-bhoinnanchi seva korunk aplo vell, takot ani poixe uzar kortat tancho ami khub valor kortat. Paulun mhunnttlolem: “Hanv konnacheach rogtacho zobabdar na.” Tachea udharonnacher niall kelʼlean, to apli boddai korinaslo ani aplea vixim vaddoun-choddoun sangonaslo, punn sot uloitalo mhunn amkam kollon ieta.​—Itihas 20:26.