ODHEAI 6
Meloleam Passot Kitem Bhorvonso Asa?
1. Meloleam vixim kitem bori khobor asa?
Jezu prithumecher astana, tacho ixtt Lazar morta, zo Jeruzalea lagim Betania ganvant ravtalo. Ani Jezu Betanient pavlo tedna Lazar morun char dis zal’le. Lazaracheo bhoinneo Marta ani Maria sangata, Jezu tache somadhixim veta. Rokddoch thoim zaito lok ektthaim zata. Uprant, Jezu mel’lea Lazarak novean jivont korta. Tedna, Marta ani Maria kitlim khuxal zali tem tumchean chintunk zata kai?—Juanv 11:21-24, 38-44 vachat.
Jehova meloleank jivont korun hea prithumecher novean jieunk ditolo, hi bori khobor Marta adinch zannam asli.—Job 14:14, 15 vachat.
2. Melea uprant amchem kitem zata?
Devan Adanvak sanglem: “Tum dhul’l ani porot tum dhul’lint vetoloi.”—UTPOTI 3:19.
Munxank dhul’liche rochleat. (Utpoti 2:7; 3:19) Amche kuddint morona toslo otmo nam. Ami melea uprant, amche kuddicho khoincho-i bhag jivo urona. Amcho mendu kam korunk xokona dekhun amchim sogllim chintnam somptat. Heach khatir melea uprant, Lazaran apleak kitem ghoddlem tea vixim kainch sangunk nam, karonn mel’lea munxak kainch khobor asona. —Stotram 146:4; Upodexok 9:5, 6, 10 vachat.
Munis melea uprant, Dev tankam norkant hulpaita kai? Dev munxank norkant zolloita hi xinkounn ek fott zaun asa, karonn Bible amkam sangta ki mel’lea munxank kainch kollona. He fottkire xinkounne udhexim, Devachea nanvank okman ieta. Munxank ujeant hulpaunche vixim chintunk porian Devak kanttallo ieta.—Jeremias 7:31 vachat.
Melea Uprant Amchem Kitem Zata? ho viddeo polloiat
3. Melolim amche lagim ulounk xokta kai?
Meloleanchean ulounk zaina, nam mhunn aikunk zaina. (Stotram 115:17) Punn thodde devdut Devache khuxe add geleat ani te melolea munxanchem dhong gheun lokam thaim uloitat. (2 Pedru 2:4) Ami meloleam-xim ulounk proitn kel’lo Jehovak naka.—Dusri Somurt 18:10, 11 vachat.
4. Novean konn jivont zatole?
Lakh’anim melole lok, he prithumecher novean jivont zatole. Devachi vollokh naslolean zannim vaitt kortubam adarlim tosle-i lok jivont zatole.—Stotram 37:29; Itihas 24:15 vachat.
Novean jivont zaloleank, Deva vixim sot xinkunk ani Jezuchi adnea pallun, tacher bhavart dovortat mhunn dakhounk, sondhi mellttoli. (Prokasovnni 20:11-13) Zor tim Devachea adnea pormonnem cholot zalear, tankam prithumecher sodankal khuxalkaien jieunk mellttolem.—Juanv 5:28, 29 vachat.
5. Meloleank novean jivont korchi manddavoll, Jehova vixim amkam kitem dakhoun dita?
Meloleank novean jivont korchi manddavoll korunk, Jehovan aplea ekleach putak amche passot jiv bolidan korunk prithumecher dhaddun dilo. Hem amkam Jehova Devacho vorto mog ani doia dakhoun dita. Mel’lim novean jivont zatolim tedna, tumi chodd korun konnank pollounk axetat?—Juanv 3:16; Romkarank 6:23 vachat.
