5 Jezun zaitea lokank polloile tednam to dongrar gelo ani thoim boslo. Ani tache xis tache lagim aile. 2 Uprant to tankam oxem xikounk laglo:

3 “Devachea margdorxonachi bhuk asa tim munxam khuxal, karonn sorginchem Raj tanchem.

4 “Dukh kortat tim khuxal, karonn tankam bhuzvonn mellttoli.

5 “Khaltim a tim khuxal, karonn tankam prithum daiz mhunn mellttoli.

6 “Nitivontponna khatir jim bhukelʼlim ani tanelʼlim asat tim khuxal, karonn tim dhadoxi zatolim.

7 “Dusreank doia dakhoitat tim khuxal, karonn dusrim tankam doia dakhoitolim.

8 “Kalliz nitoll asa tim khuxal, karonn tim Devak polloitolim.

9 “Xanti korunk vavurtat tim khuxal, karonn dusrim tankam Devachim bhurgim mhunnttolim.

10 “Sarkem tem kortat dekhun dhumallo sostat tim khuxal, karonn sorginchem Raj tanchem.

11 “Tumi mhoje xis dekhun lok tumcho opman korta, tumkam dhumallo dita ani tumchea vixim zaitem khottem ani vaitt uloita tednam tumi khuxal. 12 Tumi sontosbhorit ani odik khuxal zaiat, karonn sorgar tumkam vhoddlo inam mellcho asa. Tannim tumchea adim aslolea provadeank osoch dhumallo dilʼlo.

13 “Tumi hea prithumechem mitt, punn mittachi kharsann geli zalear taka porot kharsann diunk zata? Na. Tem kiteakuch upkarona. Tem rostear uddoitat ani lok tem paim-am ponda maddoitat.

14 “Tumi sonvsaracho uzvadd. Dongrar asa tem xar lipon urona. 15 Lok divo pettoun aidona ponda dhampun dovornant, punn ghorant asat tankam sogleank uzvadd mellonk to eka unch zagear dovortat. 16 Teach bhaxen tumcho uzvadd dusreancher poddom-di, jea udexim tumchim borim kamam polloun, tim sorgar aslolea tumchea Bapachi mhoima kortolim.

17 “Hanv Kaideantlem vo Provadeanchea Pustokantlem kitem-i kaddun uddounk ailam mhunn somzonakat. Hanv tem kaddun uddounk nhoi, punn tem purnn korunk ailam. 18 Hanv tumkam khorench sangtam, mollob ani prithum ghoddie na zait, punn Kaideant aslolem ek lhan okxor vo okxorant aslolem lhan kus poriant purnn zalea xivai urchem na. 19 Tor hea lhanantlea-lhan adneantli konnui ek pasun adnea moddtta, ani dusreankui toxem korunk xikoita zalear, to sorginchea Rajeant bhitor soronk purto ascho na. Punn zo konn heo adnea palltta ani dusreankui toxem korunk xikoita, to sorginchea Rajeant bhitor soronk purto astolo. 20 Hanv tumkam sangtam, tumi xastream ani Farizevam itlinch nitivont asat zalear tumi sorginchea Rajeant kednanch bhitor soronk pavchimnant.

  21 “Adlea kallachea lokank oxem sanglolem tem tumi aikolam, ‘Tunvem jivexim marchem nhoi, karonn zo jivexim marta taka neai-sobhent ubo kortole.’ 22 Punn hanv tumkam sangtam, zo konn aplea kallzant aplea bhavacho rag dhorun ravta taka neai-sobhent zobab diuncho poddttolo. Ani zo munis aplea bhavacho opman korunk kednanch tonddant ieunk zaina toslim vaitt utram uloita zalear taka  sogleant Vhoddlea Neai-sobhent zobab diuncho poddttolo. Ani zo munis aplea bhavak, ‘Are loz naslolea murkha!’ oxem mhunntta, taka Gehenʼnachea b ujeant uddoitole.

23 “Tum tuji bhett vedixim gheun voita tednam tuka ugddas ieta ki tujea bhavak tujea add kitem tori asa, 24 tor tuji bhett thoinch vedixim dovor ani poilo vochun tujea bhava lagim xanti kor ani uprant ieun tuji bhett bhettoi.

25 “Zor konnui tujea add kes korunk voita zalear, to neai-sobhent voichea poilinch tachea lagim xanti kor. Na zalear to tuka neai-korpeachea hatant ghalit ani neai-korpi tuka tea munxachea hatant ghalit zo tuka bondkhonnint uddoitolo. 26 Hanv tuka khorench sangtam, tum tacho ek-ek poiso farik kori poriant bondkhonnintlo kosoch bhair soronk pavcho na.

27 “‘Tunvem pordvar korcho nhoi’ oxem sanglolem tem tumi aikolam. 28 Punn hanv tumkam sangtam, zo munis eke bailek vaitt nodren polloit ravta, jea vorvim tachea monant pozddim chintnam ietat, tannem tea baile sangata aplea kallzant pordvar kelo. 29 Zor tuzo uzvo dollo tuka patkant uddoita zalear, to umttun kadd ani bhair uddoi. Tuji akʼkhi kudd Gehenʼnant c uddoilʼlea poros tuzo ek sandho na zalear odik borem. 30 Toxench zor tuzo uzvo hat tuka patkant uddoita zalear to katrun bhair uddoi. Karonn tuji akʼkhi kudd Gehenʼnant d uddoilʼlea poros tuzo ek sandho na zalear odik borem.

31 “Oxem-i sanglolem asa: ‘Zo munis aplea bailek divors dita, tannem tika divors potr diunchem.’ 32 Punn hanv tumkam sangtam, zo munis aplea bailek onoitik kuddicho sombond e soddun her koslea-i karonnak lagon divors dita zalear, to tika pordvar korpachea tallnnent ghalta. Ani zo munis oxe ritin divors zalʼle baile lagim kazar zata to-ui pordvar korta.

33 “Ani adlea kalla voilea lokank oxem-i sanglolem tumi aikolam: ‘Tumi ghetla to soput moddum nakat. Tumi Jehovak f dilʼlem utor pallat.’ 34 Punn hanv tumkam sangtam: Tumi soputuch ghenakat, zaum sorgacho karonn tem Devachem xinvason; 35 zaum prithumecho karonn ti tachi paim dovorpachi monnoi; zaum Jeruzalemacho karonn tem vortea Razachem xar zaun asa. 36 Toxench tumi tumchea matheacho soput gheum nakat, karonn tumi tumcho ekui kens kallo vo dhovo korunk xokonant. 37 Tumchem ulovop ‘Hoi’ zalear hoi, ani ‘Na’ zalear na zaum di, karonn hachea bhair tumi kitem-i uloitat tem noxttea thaun ieta.

38 “Oxem mhunttlolem tem tumi aikolam: ‘Dolleak dollo ani dantak dant.’ 39 Punn hanv tumkam sangtam: Tumkam vaitt kortolea add zhogodd nakat. Konnui tujea uzvea polear thapott marit zalear taka tuzo dusro-i polo dakhoi. 40 Konnui tumkam neai-sobhent vhoron, tumchem khomis gheunk sodhit zalear taka tumcho kottui diat; 41 ani konnui odhikari tumkam aplem ojem ubarun ek mil cholonk laita zalear tumi tachea sangata don mil cholat. 42 Tumchea lagim konnui kitem-i magot zalear taka diat ani  konnui tumchea lagim udar magot zalear taka diunk fatti soronakat.

43 “Oxem mhunnttlolem tumi aikolam: ‘Tujea xezareacho mog kor ani dusmanacho dves kor.’ 44 Punn hanv tumkam sangtam: Tumchea dusmanancho mog korit ravat, ani tumkam dhumallo ditat tanchea pasot magnnem korit ravat. 45 Hea toren tumi tumchea sorginchea Bapachim bhurgim mhunn dakhoun diunk xoktolim. Karonn to borea toxench vaitt munxancher aplo suria ude-so korta. Toxench nitivont ani onitivont munxancher paus dhaddtta. 46 Tumi tumcho mog kortoleanchoch mog kortat zalear tumkam kitem inam mellttolo? Tax vosul korpi pasun toxench korinant kai? 47 Ani tumi fokot tumchea bhavankuch zap kortat zalear tumi vhoddlem-xem kitem kortat? Judev naslole lok pasun oxench korinant kai? 48 Taka lagon tumcho sorgincho Bap sompurnn asa toxim tumi-i sompurnn g zaiat.

6 “Chotrai dhorat! Dusreamnim pollounchem mhunnon tanchea hujir borim kamam korinakat; na tor tumchea sorginchea Bapa koddlean tumkam kosloch inam mellcho na. 2 Munxam koddlean man mellche khatir sobha-ghoramnim ani rosteancher dhongi turturim vazoitat toxe tumi dan h ditat tednam korinakat. Hanv tumkam khorench sangtam, tankam tancho purnn inam mellʼllo. 3 Punn tum dan dita tednam, tuzo uzvo hat kitem dita, tem tujea davea hatak kollonk zaina, 4 hea toren tunvem kitlem dan dilam tem konnakuch kollchem na. Ani tednam tuzo Bap, zo tujem dor ek kam polloita to tuka inam ditolo.

5 “Toxench tumi magnnem kortana, dhongeam sarkim zaum nakat. Apleak lokamnim pollounchem mhunn tankam sobha-ghoramnim ani mukhel rosteancher ravon magnnem korunk avoddtta. Hanv tumkam khorench sangtam, tankam aplo purnn inam mellʼllo. 6 Punn tum magnnem kortana, tujea rumant vochon dar bond kor ani konnuch pollounk xokona tea tujea Bapa lagim magnnem kor. Ani tednam tuzo Bap zo tujem dor ek kam polloita, to tuka inam ditolo. 7 Magnnem kortana, sonvsarachea lokam bhaxen tinch-tinch utram porot-porot mhunno nakat, karonn apnnem zaitim utram uzar kelim zalear, Dev aplem magnnem aikotolo oxem tankam dista. 8 Tor tumi tanchea sarkim zaum nakat, karonn tumkam kiteachi goroz asa tem tumi magchea poilinch tumcho Bap zannam.

9 “Tor tumi oxe toren magnnem korat:

“‘Amchea Bapa sorginchea, tujem nanv povitr zaum. i 10 Tujem Raj ieum. Tuji khuxi sorgar zata, toxi sonvsarant zaum. 11 Aichea disa pasot amkam unddo di; 12 ani ami amchea add patok keloleank bhogxileant toxem, tum-ui amchim patkam bhogos. 13 Ani amkam tallnneant poddonk dium naka, punn noxtteachea hatantlim vattai.’ j

14 “Tumi dusreancheo chuki bhogxit zalear, tumcho sorgincho Bap tumkam-i bhogxitolo; 15 punn tumi dusreancheo chuki bhogxinant zalear, tumcho Bap tumcheo-i chuki bhogxicho na.

16 “Tumi upas kortat tednam, dhongeam bhaxen tumi dukhi asat mhunn dakhounchem bond korat, karonn apunn upas kortat mhunn dakhounk tim aplem tondd mhellem dovortat. Hanv tumkam khorench sangtam, tankam aplo purnn inam mellʼllo. 17 Punn tum upas korta tednam, tujea matheak tel lai ani tujem tondd dhu, 18 oxem kelʼlean tum upas korta mhunnon lokank nhoi, punn tuzo Bap zaka konn pollounk xokona taka kollon ietolem. Tednam, tuzo Bap zo tujem dor ek kam polloita, to tuka inam ditolo.

 19 “Svota khatir prithumer girestkai ektthaim korchi bond korat, thoim kidd ani kollom lagta ani chor ghor foddun chorun vhortat. 20 Tachea bodlek, svota khatir sorgar girestkai ektthaim korat, zoim kidd ani kollom lagona ani chor ghor foddun chorun vhorona. 21 Karonn, jea zagear tuji girestkai astoli, thoinch tujem mon astolem.

22 “Dollo kuddicho divo. Tor, tunvem tuzo dollo ekach vostucher lavun dovorlo zalear, tuji akʼkhi kudd uzvaddit zatoli. 23 Punn tuzo dollo nattkaien bhorlolo k asa zalear, tuji akʼkhi kudd kallkhant buddttoli. Tujea kuddik uzvadd diupi tuzo dollo kallkhant asa zalear, tum kitlea chodd kallkhant astolo nhoi!

24 “Konnuch don dhonianchi seva korunk xokona; karonn to ekleacho dves kortolo ani dusreacho mog kortolo, vo ekleak chittkun ravtolo ani dusreachi beporva kortolo. Tumi ekach borabor Devachim ani toxench Girestkaiechim gulamam zaunk xokonant.

25 “Dekhun hanv tumkam sangtam: Tumi kitem khatolim vo tumi kitem pietolim mhunn tumchea jiva pasot usko korop bond korat, vo tumi kitem nhestolim mhunn tumchea kuddi pasot usko korop bond korat. Jevnna poros jiv ani nhesnna poros kudd molachi nhoi? 26 Mollbar uddttat tea suknneancher dhean diat, tim roinant, lunvnant ani gudanvamnim bhorun dovornant, tori astana tumcho sorgincho Bap tankam khaunk dita. Tor tumi tanchea poros chodd molachim nhoi? 27 Usko korun aplem jivit ilʼlexem pasun vaddounk tumchea modlea konnacheanui zait kai? 28 Toxench, kitem nheschem mhunn tumi usko kiteak kortat? Ranantlea fulam koddlean xikat, tim koxim vaddttat; tim tor koxttui korinant, vo sutui toiar korinant; 29 Hanv tumkam sangtam, Solomona lagim soglem aslolem tednam pasun to hanchea bhaxen sobit nhesonk xoklo na. 30 Ranantlim zhaddam jim aiz asat ani faleam ujeant uddoitolim, tankam zor Dev itlo sobit nhesoita zalear, are unnea bhavarthachea munxamno, to tumkam nhesoucho na? 31 Taka lagon, ‘Ami kitem khatolim?’ vo, ‘Kitem pietolim?’ vo, ‘Kitem nhestolim?’ hacho kednanch usko korinakat. 32 Hea soglea vostu fattlean sonvsarache lok dis-rat dhanvtat. Punn tumkam hea soglea vostunchi goroz asa mhunn tumcho sorgincho Bap zannam.

33 “Tea pasot, tumi tachem Raj ani tachem nitivontponn sodanch poilea zagear l dovrat, ani heo sogleo vostu to tumkam ditolo. 34 Tor faleanchea disa vixim kednanch usko korum nakat, karonn faleanchea disache aplech uske astole. Aichea disak aichech uske puro.

7 “Dusreanchi nit korop bond korat ani Dev tumchi nit korcho na; 2 karonn jea toren tumi dusreanchi nit kortat, teach toren tumchi-i nit zatoli, ani jea mapan tumi dusreank meztat, teach mapan tim-ui tumkam meztolim. 3 Tor tum tujea dolleantlea pattiecher dhean dinastana tujea bhavachea dolleantlem kisor kiteak polloita? 4 Tujea dolleant ek patti astana, ‘Mhaka tujea dolleantlem kisor kaddunk di,’ oxem tujean tujea bhavak koxem mhunnonk zata? 5 Are dhongea! Poilim tujea dolleant asa ti patti kadd, ani uprant tujea bhavachea dolleantlem kisor koxem kaddchem tem tuka sarkem dixtti poddttolem.

6 “Povitr vostu sunneank ghali nakat ani tumchim motiam dukranchea fuddem uddoi nakat, na zalear tim motiam tim aplea paim-am ponda maddoitolim ani porot tumchea angar ieun tumkam pinzun uddoitolim.

7 “Magot ravat ani tumkam tem mellttolem; sodhit ravat ani tumkam tem  gavtolem; darar marit ravat ani tumkam tem ugoddttolem; 8 karonn zo konn magta taka melltta, ani zo konn sodhta taka gavta, ani zo konn darar marta, taka tem ugoddttolem. 9 Tumchea modem oso konn asa, zo aplea putan unddo maglear, fator kaddun ditolo? 10 Vo nustem magot zalear, taka sorop kaddun ditolo? 11 Tumi patki asonui, aplea bhurgeank boreo vostu diunk zannant zalear tumcho sorgincho Bap aplea lagim magtoleank tachea poros ekdom chodd boreo vostu diuncho na kai?

12 “Dekhun, dusreamnim tumkam zoxem kelʼlem zai, toxench tumi-i dusreank korat. Karonn Kaideant ani Provadeanchea Pustokant hench sanglolem asa.

13 “Oxir darvontteantlean bhitor sorat karonn rund darvontto ani vhoddlo rosto mornnak pavoita, ani tachea voilean zaito lok voita; 14 punn jivitak pavoita to darvontto oxir ani rosto barik asa, ani tachea voilean khub thoddo lok voita.

15 “Khottea provadeam thaun chotur ravat, je menddranchem rup gheun tumchea lagim ietat, punn bhitorlean krur kole koxe asat. 16 Tanchim follam polloun tumi tankam vollkhotole. Kantteanchea zhaddanchi konnem-i drakxam vo anjiram kaddleant tem tumi polloilam? 17 Teach bhaxen, borem zhadd borem foll dita, punn kidd laglolem zhadd kuslolem foll dita. 18 Borem zhadd kuslolem foll diunk xokona, ani kidd laglolem zhadd borem foll diunk xokona. 19 Borem foll dina tem dor ek zhadd katrun ujeant uddoitat. 20 Tor tumi tanchim follam polloun tankam vollkhotolim.

21 “Mhaka, ‘Somia, Somia,’ mhunnttat tim soglinch sorginchea Rajeant bhitor sortolinch oxem na. Punn sorgar aslolea mhojea Bapachi khuxi kortat tinch tea Rajeant bhitor sortolim. 22 Tea disa zaito lok mhaka oxem mhunnttolo: ‘Somia, Somia, ami tujea nanvan sondex porgottunk na kai, tujea nanvan ami lokancher boslole noxtte dut kaddunk na kai, ani tujea nanvan ami zaitim vizmitam korunk na kai?’ 23 Tednam hanv tankam spoxtt sangtolom: ‘Khotteponn kortoleamno! Hanv tumkam vollkhoch na! Mhojea sorxilʼle pois sorat!’

24 “Tor, jim konn mhojim utram aikotat ani tim pallttat tim eka xannea munxa bhaxen asat zannem aplem ghor khoddpacher bandlem. 25 Paus poddlo, buddtti aili, vadoll ailem ani tea ghoracher marlem. Tori tem moddlem na, karonn tem khoddpacher bandlolem aslem. 26 Punn jim konn mhojim utram aikotat punn tim pallinant tim eka pixea munxa bhaxen asat zannem aplem ghor renvencher bandlem. 27 Paus poddlo, buddtti aili, vadoll ailem ani tea ghoracher marlem. Tednam tem ghor kosollʼllem, ani sarkem kabar zalem.”

28 Jezuchem ulovop somplem tednam lok tachi xikovpachi rit polloun ekdom ojap zale, 29 karonn to tankam xastream bhaxen xikoi naslo punn odhikar aslolea munxa bhaxen xikoitalo.