Mogall bhav-bhoinnimno:

Jehova ani lokam pasot mog amkam Jezuchi hi adnea pallunk fuddem kaddtta. Ti mhunnttlear, “vochat ani soglea raxttrachea lokank mhoje xis korat, ani tankam . . . bautizm diat.” (Mt. 28:19, 20; Marku 12:28-31) Amkam lokam pasot khoro mog asa zalear, “sasnachem jivit favo” asloleank ami modot korunk pavtolim.​—Itihas 13:48.

Poilim ami nomune tonddpatt korunk ani lokank prokaxonam diunk dhean ditalim. Punn atam ami lokam lagim anik bore toren ulounk sodhtat. Tankam avoddtta tea vixoi-acher uloun, ami tankam mog dakhounk sodhtat. Taka lagon, amchea aiknnareank kitem goroz asa tem zannam zaun tea vixoi-acher ami tanchea lagim uloitolim. Oxem korunk hi pustika amkam koxi modot kortoli?

Hea pustikent 12 odheai asat, zantunt ek-ek korun oslea gunnam vixim sanglam je amkam lokank mog dakhounk ani xis korunk gorjeche asat. Dor eka odheai-ant Jezu vixim vo poilea xekddeantlea eka porgottnnara vixim ek ghoddnni dilʼli asa, zannim sevent hantuntle umkech gunn dakhoile. Tor lokam lagim uloitana tonddpatt kelʼle nomune sangonk nhoi, punn ami tankam mog koso dakhounk zata tacher ami dhean ditolim. Amkam sevent he sogle gunn gorjeche asat tem khorem, punn lokam lagim ulovop suru kortana, porot bhett vo Bible obheas kortana he umkech gunn amkam itle kiteak gorjeche asat tem ami polloitolim.

Dor ek odheai vachtana, dhean diat ki amchea vattarantlea lokank he gunn koxe dakhounk zatat. Toxench, Jehova ani lokam pasot tumcho mog anikui vaddounk vavr korat. Karonn tednanch ami lokank xikounk ani xis korunk pavtolim.

Tumchea sangata kam korunk amkam khub khuxalkai bhogta. (Zef. 3:9) Tumi lokam pasot zo mog dakhoit asat ani xis korunk vavr korit asat taka lagon Jehovan tumkam zaitim besanvam dium!