1.  Bollixtt Babilon Mhunnttlear Kitem?

2.  Mesias Konn To Kednam Kollchem Aslem?

3.  Tumi Ilaz Korunk Khoinche Medical Procedure Uzar Kortolim?

4.  Ghov-bailamnim Eka-meka Thaun Vegllim Zaunk Zata Kai?

5.  Festam Ani Porbo

6.  Posortat Toslim Duensam

7.  Business Ani Kaideam Sombondit Vixoi

 1. Bollixtt Babilon Mhunnttlear Kitem?

“Bollixtt Babilon” soglea khottea dhormank suchit korta. (Prokasovnni 17:5) Oxem ami kiteak mhunnttat? Sokol dilʼlea mudʼdheancher dhean dium-ia:

• Ticho probhav sonvsarbhor asa. Bollixtt Babilon ek xindoll bail, ji soglea ‘zomeancher ani raxttrancher’ bosloli asa mhunn Bible-ant dakhoilam. Toxench, ti “prithumechea razancher raj korta” oxem-i sanglam. (Prokasovnni 17:15, 18) Hachea voilean, bollixtt Babilon khoreponnim ek bail zaunk xokona mhunn kolltta. Tor tem ek songotton asonk zai.

• Ti rajkaronn vo veapar dhondeachem songotton nhoi. Babilonacho nas zatolo tednam ‘raza’ ani “veapari” dukh kortole mhunn Bible sangta. Tor, him donui songottonam bollixtt Babilon zaunk xokonant.—Prokasovnni 18:9, 15.

• Ti Devachem nanv piddʼddear korta. Girestkaieche axek ani aplea svarthak lagon tinnem sorkaram lagim ixttagot dovorlea. Taka lagon tika xindoll bail mhunnttlea. (Prokasovnni 17:1, 2) Ti soglea raxttrantlea lokank fosoita. Toxench, tika lagon zaiteancho jiv gela.​—Prokasovnni 18:23, 24.

Porot odheai 13-acho mudʼdho 6 polloum-ia

 2. Mesias Konn To Kednam Kollchem Aslem?

69 satollim sorlea uprant makhlolo vo Mesias ietolo mhunn Bible-ant bhasaunni kelʼli.—Daniel 9:25 vachat.

• 69 satollim kednam suru zalim? 455 K.X.A. hea vorsa. Tednam Rajpal Nehemias “Jerusalem novean bandun” kaddunk gelʼlo.—Daniel 9:25; Nehemias 2:1, 5-8.

• 69 satollim kitlo lamb kall aslo? Bible-antlea thoddea bhasaunneamnim ek dis mhunnttlear ek voros mhunn sanglam. (Lokgonnti 14:34; Ezekiel 4:6) Tor ek satollem mhunnttlear sat vorsam zaun asat. Toxem zalear, 69 satollim mhunnche 483 vorsam zatat (69 satollim x 7 dis).

• 69 satollim kednam kabar zalim? 455 K.X.A. thaun 483 vorsam mezlear amkam 29 K.X. melltta. a Heach vorsa Jezun bautizm ghetlo ani to Mesias mhunn kollon ailem!—Lukas 3:1, 2, 21, 22.

Porot odheai 15-acho mudʼdho 5 polloum-ia

 3. Tumi Ilaz Korunk Khoinche Medical Procedure Uzar Kortolim?

Thodde pavtti eka munxacho ilaz kortana dotor tachench rogot uzar kortat. Zoxem, te eka munxachem rogot kaddun dovortat ani uprant ilaz kortana tem takach ghaltat. Punn Kristanvamnim oslo ilaz ghevop chukichem. Toxench, eka Kristanvan dusreanchem rogot aple kuddint ghevop vo aplem rogot dusreank dan korop pasun chukichem zaun asa.​—Dusri Somurt 15:23.

Punn, blood test, hemodialysis, hemodilution, cell-salvage korop vo na, toxench heart-lung bypass machine uzar korop vo na, tem dor eka Kristanvan tharaunk zata. Koslea-i blood test-ant, medical procedure-ant vo tumcher chalu asa tea therapy-nt rogtacho koso vapor zatolo tem dotora lagim vicharun, tumi nirnnoi gheunk zata. Osli ek podʼdot uzar kortana dor ek dotor veg-veglle toren tumchem rogot vaprunk xokta. Tor, dotor kosli podʼdot uzar kortolo ani tantunt kitem-kitem mellon asa tem tumi bariksannen vicharun, to ilaz gheuncho vo na to nirnnoi gheunk zata. Hea prosnam vixim chintat:

• Ilaz vo operation kortana mhojea kuddintlem rogot bhair soron machine-ant thoddo vell urta zalear tem rogot porot mhojea kuddint gheunk mhojem ontoskornn mhaka sotaitolem kai?—Dusri Somurt 12:23, 24.

• Ilaz ghetana vo operation kortana zor mhojea kuddintlem rogot bhair kaddlem, tantunt thoddo bodol kelo ani tem porot mhojea kuddint ghatlem vo ilaz ghetana ghaveacher lailem zalear kitem? Oslo ilaz ghetlo zalear mhojem ontoskornn mhaka sotaitolem kai?

Porot odheai 39-acho mudʼdho 3 polloum-ia

 4. Ghov-bailamnim Eka-meka Thaun Vegllim Zaunk Zata Kai?

Ghov-bailamnim eka-meka thaun vegllim zaunchim nhoi ani vegllim ravonk poddlear pasun, tannim dusrea lagim kazar zaunchem nhoi mhunn Bible sangta. (1 Korintakarak 7:10, 11) Punn, thoddea karonnank lagon thoddim Kristanvam eka-meka thaun vegllim ravonk xoktat.

• Ghorcheancho samball korina: Ek ghov aplea ghorcheancho samball korina. To tankam kainch poixe vo jevnnam-khannacheo vostu dina.—1 Timotak 5:8.

• Aplea sangateak khubuch marta: Kazari sangateak itlo marta ki tachi bolaiki piddʼddear zaunk xokta vo tancho jiv dhokeant poddunk xokta.—Galasiekarank 5:19-21.

• Jehovah lagim ixttagot piddʼddear korta: Kazari sangateak Jehovachi seva korunk dina.—Itihas 5:29.

Porot odheai 42-acho mudʼdho 3 polloum-ia

  5. Festam Ani Porbo

Kristanvam Jehovak manvonant toslim festam vo porbo korinant, na mhunn tantunt bhag ghenant. Punn thoddea poristhitinim kitem korchem tea vixim eka Kristanvan aplea ontoskornna pormonnem nirnnoi gheunk zai. Tor atam ami thoddeo poristhiti polloum-ia.

• Konnui tumkam wish kortat. Hea vellar tumi tankam, “Thank you” mhunnonk zata. Ani tumi hem fest vo porob kiteak monoinant, hem tim vichartat tednam tumi tankam sangonk zata.

• Tuzo kazari sangati zor Jehovacho sakxi na, to tuka aplea soireager jevnnak apoita. Voichem vo na tem tumi tumchea ontoskornna pormonnem tharaunk zata. Punn thoim, Devak manvonant tosleo chali-riti astoleo zalear, tumi tantunt bhag gheunchimnant mhunn tumi tankam adim-fuddench sangonk zata.

• Festam-porbam vellar tumcho boss tumkam bonus dita. Tunvem bonus gheunk zaina kai? Na toxem nhoi. Punn tumi chintunk zata, tumcho boss tumkam to bonus festam-porbek lagon dita vo tujea borea vaurak lagon dita?

• Festam-porbechea vellar konnui tumkam gift dita. Tim oxem mhunnot: “Tum hem fest vo porob monoina mhunn hanv zannam, punn hanv tuka ho gift diunk sodhtam.” To munis tumkam gift kiteak diunk sodhta tem tumi chintunk zata. Tumcho bhavarth ghott asa vo na tem to pollounk sodhta kai? Vo taka tumcho mog asa mhunn to tumkam udar kallzan kitem tori diunk sodhta? Hem chintun to gift gheuncho vo na tem tumi tharaunk zata. Ami koslo-i nirnnoi ghetat tednam amchem ontoskornn nitoll urchem ani Jehova sangata amchi ixttagot bori urchi mhunn ami ugddas dovrunk zai.​—Itihas 23:1.

Porot odheai 44-acho mudʼdho 1 polloum-ia

 6. Posortat Toslim Duensam

Bible sangta: “Tuzo mog korta toso tujea xezareacho mog kor.” Amkam zor posorta toslem duens asa vo tem amkam zalam mhunn dista zalear, amkam lokancho mog asa dekhun tem duens dusreank posorna zaunk ami chotrai dovrunk zai.—Romkarank 13:8-10.

Hem ami koxem korunk zata? Ami dusreank hat diunchem nhoi, tankam veng marchi nhoi vo kiss diuncho nhoi. Toxench, dusrim amkam tanche familiche surokxitaie pasot aplea ghorant apoinant zalear, ami tanchem vaitt dhorchem nhoi. Tea bhair, bautizm gheunche poilim ami hea vixim vhoddilanchea sohokariak sangonk zai. Karonn, oxem kelʼlean dusrim bautizm gheunchim asat tim surokxit urtolim. Titlench nhoi, ami kazar zaunk tharaitat zalear ami svota zaun blood test korchi goroz asa. Hem soglem ami kortat tednam amkam dusreanchi kallji asa ani ami ‘fokot amchea faidea vixim nhoi, punn dusreank kitem faideachem zatolem tem-ui chintat’ mhunn dakhoitolim.—Filipkarank 2:4.

Porot odheai 56-acho mudʼdho 2 polloum-ia

 7. Business Ani Kaideam Sombondit Vixoi

Poixeam ani business-am sombondit je agreement asat te ami boroun dovrunk zai. Te agreement ami sobhentlea bhav-bhoinnam sangata keleat zalear pasun ami tem boroun dovorlear borem. (Jeremias 32:9-12) Tori punn, Kristanvam modem poixeank lagon vo her karonnak lagon oddchonneo ieunk xoktat. Oxem zata tednam tannim tem rokddench, xantin ani tanchea modem suttavem korunk zai.

Punn, konnem-i tumkam nagoilim vo fott marun tumchem nanv piddʼddear kelem zalear tumi kitem kortolim? (Matev 18:15-17 vachat.) Jezun amkam tin panvlam sanglim:

1. Tumi tem tumcheach bhitor suttavem korunk proitn korat.​—Vers 15 polloiat.

2. Toxem korun suttavem zaina zalear, sotant ghott aslolea eka vo dogam bhav-bhoinnank gheun tem suttavem korunk proitn korat.​—Vers 16 polloiat.

3. Tori punn, tem suttavem zaina zalear, sobhentlea vhoddilanchi modot gheiat.​—Vers 17 polloiat.

Choddxea poristhitinim ami amchea bhav-bhoinnancher kortt-kesi korcheo nhoi. Karonn toxem kelear, Jehovachem ani bhav-bhoinnachem nanv piddʼddear zaunk xokta. (1 Korintkarank 6:1-8) Punn thoddea poristhitinim kortt-kexeo ghoddie korcheo poddttat. Divors gheunk, bhurgem konna sangata ravtolem tacho nirnnoi korunk, divors ghetlea uprant mellonk zai te poixe gheunk, insurance claim korunk, tumi eka khateant ghatlole poixe tumkam porot mellonant vo kaidea pormonnem tumkam mellpak zai tem mellona tednam tumi kortt-kes korunk zata. Ek Kristanv osleo kesi korttant vhoron xantponnim suttaveo korunk sodhta tednam to Bible-antlim totvam moddina.

Toxench, konnem-i bolotkar, bhurgeancher otʼteachar kela vo konnem-i ekleak dhomkaila vo holʼlo, chorio, khun kela vo oxem kitem-i kelam zalear, ek Kristanv pulisank complain korta tednam to Bible-antlea totvam add vochona.

Porot odheai 56-acho mudʼdho 3 polloum-ia