Hi poristhiti polloi: Karen ek parttiek gel’lem asam ani thoim pavon taka 10 mintam pasun zaunk nam. Titleanuch ek vollkhicho avaz tachea kanar poddtta.

Karen fattim vollon polloita zalear, tachem friend Jessica don beer-acheo battleo aplea hatamnim gheun asa. Jessica Karena fuddem ek battli dovrun mhunntta, “atam tum bhurgem uronk nam, ghe ani mhoja kor.”

Karen pieunk sodhina, punn motint chint’ta, ‘Jessica mhojem friend, ani hanvem naka mhunnttlear taka vaitt distolem. Ani dusrem mhunnttlear, tem ek borem cheddum. Tem pieta zalear hanvem-i pielear kainch vaitt nam. Hem fokot beer, drugs nhoi.’

Tum Karen-achea zagear aslear kitem korta aslem?

Oslea poristhitint xanneponnan nirnnoi gheunk, tum konn ani tum kitem manta hem zannam zalear tuka adar zatolo, ani tujean boro nirnnoi gheunk zata. Dusrim kortat mhunn tum korchem na, tuje nirnnoi tum khud ghetolem.—1 Korintkarank 9:26, 27.

Oxi ghottai tuka koxi mellttoli? Hem zannam zaunk fuddlea prosnanche zobab zannam zavop gorjeche.

Tuka kosle bore gunn asat ani te tunvem koxe uzar korunk zata tem zannam zalear svotacher tuzo visvas vaddttolo.

BIBLE-ANTLEM UDHARONN: Apostl Paulun boroil’lem: “Sundor bhaxen uloupak hanv huxar nhoi . . .  punn zannvai mhaka komi nam.” (2 Korintkarank 11:6) Devachea utrachi taka bori zannvai asli dekhun dobhav ailo tednam pasun Paulu thir ravlo. Dusreamnim tacheo vaitt khobro keleo, tednam-i to niraxi zaunk na.—2 Korintkarank 10:10; 11:5.

TUJEA VIXIM ZANNAM ZAV: Tujea lagim kosli kola asa ti sokol boroi.

Atam, tuzo ek boro gunn boroi. (Udharonnak, tum kallji gheupi? udar monachem? patieupa sarkem? vellar aplem kam korpi?)

Tuka zaite bore gunn asot, punn tujea unneponnacher tabo dovorna zalear tuji bori vollokh tum hogddaunk xokta.

BIBLE-ANTLEM UDHARONN: Paulu aplim unneponnam zannam aslo. To mhunntta, “Devache Somurti pasot mhojem mon anondan bhoron ieta punn mhojea mon’xasoimbant ek veglloch nem hanv polletam: mhojea gineanan hanv manun ghetam te Somurticher to zhuz korta ani mhojea mon’xa-soimbant asa tea patkachea nemacho mhaka koidi korta.”—Romkarank 7:22, 23.

TUJEA VIXIM ZANNAM ZAV: Tunvem koslea unneponnacher tabo dovrunk zai?

Tum eka ghaddient boson, driver-ak ti ghaddi petrol sompo porian ekach zagear gunvddait rav mhunn sangtolem kai? Nam. Toxem korop pixeponnuch nhoi punn marog-ui poddttolem!

Lisanv: Amchea jivitant dhei aslear ami tea ghaddie bhaxen ekach zagear gunvot ravchimnant. Tuje dhei tharaun dovorlear, tuka khoim ani koxem vochonk zai tem tuka khobor astoli.

BIBLE-ANTLEM UDHARONN: Paulu boroita, “Hanv dhanvtam to dolleam mukhar hetu dovrinastana dhavonam.” (1 Korintkarank 9:26) Paulun aplem jivit varear soddunk na, tannem dhei dovorle ani te melloupak to vavurlo.—Filipkarank 3:12-14.

TUJEA VIXIM ZANNAM ZAV: Tujea monant aslole tin dhei, je tum hea vorsa bhitor melloun gheunk sodta te boroi.

Tum jem kitem manta tantunt thir na zalear tunvem kitem korpachem tem tuka kainch kollchem na. Ek xedd’ddo poristhiti pormonnem rong bodolta, toxem tum sangateanchea dobhava khal vagtolem.

Punn jednam, tum kitem manta tacher adarun tuje tharav gheta, tednam tum tuji vollokh samballtta. Dusreancho tujer porinnam zaunk dina.

BIBLE-ANTLEM UDHARONN: Daniel provadean tornnattponnaruch ‘aplea kallzant ghott tharav’ kel’lo ki to Devache kaide sodanch pallttolo. To aplea avoi-bapai thaun pois aslo torui tannem aplo tharav bodlunk na. (Daniel 1:8) Oxem korun tannem apli vollokh samball’lli. Apunn kitem manta tea pormonnem to jielo.

TUJEA VIXIM TUM ZANNAM ZAV: Tuje thir tharav kitem? Udharonnak: Tum Devak manta? Hoi zalear, kiteak? Dev asa mhunn kosle purave tuka khatri ditat?

Devan dil’le noitik dorje tujea boreak mhunn tum manun gheta? Hoi zalear, kiteak?

Xevottak, tum konnam bhaxen zaunk sodhta—Ek pan, jem sadea varear pasun uddon voita, vo eka zhadda bhaxen jem kitlem-i vhodd vaddoll ailear pasun umtton poddona? Tuji vollokh ghott kelear tum tea zhadda bhaxen zatolo. Ani tednam, hanv konn? hea prosnak tum khatren zobab diunk xoktolo.