PROSN 3
Mhojim Chintnam Hanv Mummy-Daddyk Koxim Sangum?
TUM KITEM KORIT?
Hi poristhiti polloi: Budvar, donparcho vell. Sotra vorsancho tornnatto Geoff, aplim soglim kamam kabar korun atam matxe suseg gheunk sodhta. To TV chalu korta ani vochon sofacher bosta.
Teach vellar tacho daddy bhitor sorta. Geoffak polloun to bejaar zata.
“Geoffrey! Tujea dhakttea bhavak homework korunk adar korchea svater, tum TV pollounk bosla? Sangta tem kednanch korina tum!”
“Zalem suru” Geoff tonddantuch mhunntta.
Daddy ragan vicharta, “Kitem mhunnttlem tunvem?”
Geoff suskar soddun, dolle gunvddaun, “kaim na!” mhunn sangta.
Hem aikon Daddy taka tiddken sangta, “Toso korun tum mhojea lagim uloinaka!”
Tum Geoffachea zagear aslear kitem korta aslo?
RAV ANI CHINT!
Mummy-daddy lagim ulovop ek ghaddi choloilea sarkem. Ghaddi choloitana, mukhar rosto bond aslear, tum dusre vatten voitolo nhoi?
UDHARONNAK:
Leah nanvachem cheddum sangta, “Daddy lagim ulounk mhaka kotthin zata. Ek-ek pavtt hanv tachea lagim uloit astam, ani thoddea vellan to mhaka vicharta, ‘Aa! Kitem mhunnttalem tum?’”
LEAH LAGIM ATAM TIN VATTO ASAT.
-
1. Daddy-cher tapchem.
Leah bob marun mhunntta, “Daddy hanv tujea lagim uloitam! Aik!”
-
2. Daddy kodden ulovop na.
Leah, daddyk aplea oddchonnea vixim sangpachench soddun dita.
-
3. Boro vell polloun, tea vixim porot ulounchem.
Leah dusre pavtti aplea daddy lagim uloita, vo ulounchem aslem tem taka boroun kolloita.
Leah-n khoinchi vatt vinchunk zai oxem tuka dista?
CHINTUN POLLOI: Leah-cho daddy tea vellar anik kitem chint’talo zait, taka lagon tem kiteak bejar asam tem taka khobor na. Tor, Leah-n Poili vatt vinchlear, tem kiteak bob marun uloilem, hem tachea daddyk somzochem na. Ani, tem hea toren vaglem mhunn to tachem aikocho-i na. Hi vatt vinchun, Leah daddyk man diunchem na. (Efezkarank 6:2) Hi vatt dogaimkui boreak poddchi na.
Rosto bond asa hacho orth oso nhoi ki anik vatt na, tujean dusri vatt gheunk zata, teach toren mummy-daddy lagim ulounk, tunvem dusri vatt sodhunk zata
Dusri vatt vinchun kaddop samkem sompem, punn ti vatt xanneponnachi nhoi. Oxem kiteak? Karonn oddchonnentlean bhair soronk Leah-n daddy lagim ulovop gorjechem. Uloina zalear tacho daddy taka modot korunk xokcho na ani aplea dhuvechea jivitant kitem ghoddtta tem taka khoborui aschi na. Uloinastana ravlear kainch borem zaunchem na.
Tisri vatt vinchun kaddlear, tem aplea mukhar rosto bond asa tem polloun dusro rosto sodhun kaddttolem. Tem aplea daddy kodden dusre pavtt ulovpacho proitn kortolem. Tannem daddyk, boroun pasun sangunk zata.
Leah aplea daddyk boroun sangonk chint’ta zalear, tem aplim chintnam khub chintun boroitolem. Ani tacho daddy tem vachtana, apli dhuv apleak kitem sangonk sodhta tem zannam zatolo. Hea toren to taka boro somzonk pavtolo. Tor, hi tisri vatt vinchlear, Leahk ani tachea daddyk, dogaimkui faido asa. Oxem kel’lean Bible-ant sanglam toxem, “xanti vosounk . . . pavoita te vatten” cholunk tankam modot zatoli.—Romkarank 14:19.
Hea tin vatte bhair Leah anik kitem korunk xokta?
Tujea monant anik kosli-i vatt aslear, ti tunvem borounk zata. Ani ti vatt vinchun kaddlear kitem zatlem, tem-ui boroi.
SPOXTT ULOIAT
Ugddas dovor, thodde pavtt tum kitem mhunntta ani tujim mummy-daddy kitem somzotat tem vegllem asonk xokta.
UDHARONNAK:
Tum bejaar asam hem polloun mummy-daddy tuka ‘kitem zalem’ mhunn vichartat. Tum zobab diun, “Mhaka tea vixim ulounk naka” mhunn sangta.
Punn tujim mummy-daddy tunvem oxem mhunnttlam mhunn somzonk xokta, “Tumi mhaka somzotolim mhunn mhaka disona. Hanv mhojea friend-ank sangtolo.”
Tum oddchonnent asa mhunn tuji mummy-daddy tuka ghoddie modot korunk sodhit. Punn tum tankam sangta, “Tumi chint’ta korinakat, hanv tem polloun ghetam.”
-
Tuji mummy-daddy somzot:
-
Tujean anik kitem mhunnonk zait?
Tumkam Hem-ui Avoddttolem
CHOLCHITR KARTTUN
Mojea Avoi-bapai Lagim Hanvem Koxem Ulounchem ?
Tuka ulounk dison tea vellar tunvem tujea avoi-bapai lagim koxem ulounk zata ?
