De Aposchtel Johannes wird uf de Insle Patmos gfange ghalte. I 16 Visione zeigt ihm Jesus, was i de Zuekunft wird passiere. Die Visione offebared oder zeiged ihm, wie de Name vo Jehova emal gheiliget wird, wie sis Königriich chunnt und wie sin Wille im Himmel und uf de Erde passiert.

De Johannes gseht inere Vision Jehova uf sim herrliche Thron im Himmel. Um ihn ume sind 24 Ältischte, wo wiissi Chleider und goldigi Chrone ahend. Vom Thron chömmed Blitz und Donner. Di 24 Ältischte verbüged sich vor Jehova und beted ihn a. Inere andere Vision gseht de Johannes e grossi Volksmengi. D Lüt chömmed us allne Länder, Völker und Sprache und si beted Jehova a. S Lamm, das isch Jesus, luegt uf di Volksmengi und bringt si zum Wasser vom Lebe. Später inere andere Vision wird Jesus König und regiert mit de 24 Ältischte im Himmel. I de nöchschte Vision kämpft Jesus gege de Drache, das isch Satan, und gege sini Dämone. Jesus gheit si alli us em Himmel use uf d Erde abe.

De Johannes gseht denn inere herrliche Vision, wie s Lamm und di 144 000 uf em Berg Zion stöhnd. Er gseht au en Engel, wo um d Erde flügt. De Engel seit de Mensche: «Hend Ehrfurcht vor Gott und tüend ihn ehre.»

I de nöchschte Vision gseht de Johannes de Chrieg vo Armageddon. I dem Chrieg gwünned Jesus und sini Armee gege s böse Syschtem vo Satan. I de letschte Vision isch im Himmel und uf de Erde vollkommene Fride. D Offebarig zeigt, dass de Tüfel und alli, wo uf sinere Siite sind, für immer vernichtet werded. Alli im Himmel und alli uf de Erde werded denn nur no Jehova abete und sin Name ehre.