De Moses verspricht em Pharao, dass er nüm chunnt, aber bevor er gaht, seit er no: «Um Mitternacht wird jede Erschtgeboreni in Ägypte sterbe – egal, öbs de Sohn vom Pharao oder de Sohn vomene Sklav isch.»

Jetzt müend d Israelite es bsundrigs Esse choche. Jehova seit zu ihne: «Tüend es eijährigs Schaf- oder Geissböckli schlachte und sprützed e chli vom Bluet an eui Türrähme. S Fleisch müend ihr brate und nachher zäme mit ungsüretem Brot esse. Ihr müend d Sandale scho alege und parat si zum Gah. Hüt Nacht wird ich euch befreie.» Chasch du dir vorstelle, wie ufgregt d Israelite sind?

Um Mitternacht chunnt de Engel vo Jehova zu jedem Huus z Ägypte. Bi dene Hüüser, wo kei Bluet am Türrahme hend, stirbt de ältischt Sohn. Aber dört, wos Bluet am Türrahme het, gaht de Engel dra verbii. I dere Nacht stirbt i jedere ägyptische Familie es Chind, aber bi de Israelite keis einzigs.

Au em Pharao sin Sohn stirbt. Das isch für de Pharao z vil. Sofort laat er de Moses und de Aaron zu sich la cho und seit: «Göhnd, verschwinded! Göhnd eue Gott go abete! Nehmed eui Tier mit und göhnd endlich!»

Es isch Vollmond, wo d Israelite Ägypte verlönd. Si laufed Familie für Familie und Stamm für Stamm. Es sind 600 000 israelitischi Männer, zäme mit ihrne Fraue und Chind. Es chömmed au no vil anderi Lüt mit, wo Jehova diene wend. Endlich sind d Israelite frei.

Jehova wett, dass si nie vergessed und immer dra denked, dass er si befreit het. Drum sölled si vo jetzt a jedes Jahr das bsundrige Esse mache. Es heisst Passah, das bedütet «a Öppisem verbii gah».