D Israelite müend jetzt also i de Wüeschti bliibe. Mit de Ziit fanged de Korah, de Dathan, de Abiram und 250 anderi Männer a rebellisch tue. Si wend em Moses nüm folge. Si säged zum Moses: «Mir hend gnueg vo euch! Wiso muesch usgrechnet du üse Afüehrer sii und de Aaron de Hohe Prieschter? Jehova isch doch mit üs allne und nid nume mit euch!» Das gfallt Jehova gar nid. Für Jehova isch das, wie wenn die Männer direkt gege ihn würded rebelliere.

De Moses seit em Korah und sine Lüt: «Chömmed morn zu de Stiftshütte und nehmed eui Sache zum Räuchere im Füürbehälter mit. Jehova wird üs denn zeige, uf welere Siite er isch.»

Am nöchschte Tag göhnd de Korah und di 250 Männer zu de Stiftshütte und fanged a ihres Räucherwerk z verbrenne, wie wenn si Prieschter wäred. Da seit Jehova zum Moses und zum Aaron: «Göhnd weg vom Korah und sine Männer.»

Zu de gliiche Ziit sind de Dathan und de Abiram i ihrne Zelt. Si hend em Moses nid gfolget und sind nid zu de Stiftshütte gange. Da seit Jehova allne Lüt, si sölled weggah vo de Zelt vom Korah, em Dathan und em Abiram. D Israelite mached das sofort. De Dathan und de Abiram stöhnd mit de Familie vor ihrne Zelt. Plötzlich macht Jehova en Riise-Spalt im Bode und si werded vo de Erde verschluckt. Grad nachher chunnt bi de Stiftshütte es Füür vom Himmel abe und tötet de Korah und sini 250 Männer.

Jehova seit zum Moses: «De Afüehrer vo jedem Stamm söll dir sin Stab bringe und dört schribsch sin Name druf. Ussert bim Stab vom Stamm Levi. Dört schribsch nid Levi, sondern Aaron druf. Nachher leisch alli Stäb i d Stiftshütte. De Stab vo dem Maa, wo ich uswähle, de wird denn blüeh.»

Am nöchschte Tag gaht de Moses d Stäb go hole und zeigt si de Afüehrer. Am Stab vom Aaron hets Blüete und riifi Mandle dra. Eso zeigt Jehova nomal: Er möcht, dass de Aaron de Hohe Prieschter isch.