Nachdem de David de Goliath tötet het, macht de Saul ihn zum Afüehrer vo sine Chrieger. De David gwünnt vil Kämpf und wird bim Volk sehr beliebt. Immer wenn de David vom Chrieg zruggchunnt, chömmed ihm d Fraue entgege, wo tanzed und singed: «De Saul het Tuusigi tötet und de David Zehtuusigi!» Das macht de Saul eso iifersüchtig, dass er de David wett umbringe.

De David spilt sehr schön Harfe. Wo er einisch em Saul vorspilt, schiesst de Saul en Speer uf ihn. De David cha grad no rechtziitig uswiiche und de Speer trifft d Wand. Immer wider probiert de Saul, de David umzbringe. Drum springt de David devo und versteckt sich i de Wildnis.

De Saul nimmt 3 000 Soldate und zieht mit ihne los, um de David z jage. Ganz zuefällig gaht de Saul i die Höhli ine, wo de David und sini Männer sich verstecked. Em David sini Männer flüschtered: «Das isch dini Chance, jetzt chasch de Saul töte.» Ganz liislig schliicht de David zum Saul here und schniidet ihm es Stückli vo sim Mantel ab, ohni dass de Saul öppis gspürt. De David merkt denn aber grad, dass er kei Reschpekt zeigt het vor em gsalbte König vo Jehova. Drum chunnt er es schlechts Gwüsse über. Er wett au nid, dass sini Männer de Saul agriifed. Dusse vor de Höhli rüeft er em Saul hindenache, dass er ihn hätti chönne töte. Hört de Saul jetzt echt uf, de David z verfolge?

Nei, de Saul verfolgt de David wiiter. Einisch inere Nacht schliicht sich de David mit sim Neffe, mit em Abischai, is Lager vom Saul. Alli schlafed, au de Abner, wo uf de Saul sött ufpasse. De Abischai flüschteret: «Das isch üsi Chance, bitte, cha ich ihn umbringe.» Aber de David seit zu ihm: «Nei, Jehova wird das scho für üs erledige. Mir nehmed nume sin Speer und sin Wasserchrueg und denn göhnd mir wider.»

Denn stiigt de David uf en Berg, wo i de Nöchi isch. Vo dört us gseht er s Lager vom Saul. Er rüeft: «Abner, wiso hesch du din König nid beschützt? Wo isch de Chrueg und de Speer vom Saul?» De Saul kennt d Stimm vom David sofort und rüeft: «Du hättisch mich chönne töte, aber du hesch es nid gmacht. Ich weiss, dass du de nöchscht König vo Israel wirsch.» Nach all dem gaht de Saul hei i sin Palascht. Aber i de Familie vom Saul gits öpper, wo de David gern het.