En Brief vo de Leitende Körperschaft
Ihr liebe Brüedere und Schwöschtere,
Als Diener vo Jehova liebed mir sis Wort, d Bible. Mir sind devo überzügt, dass si gschichtlichi Tatsache beiinhaltet, üs zueverlässig aleitet und zeigt, wie fescht Jehova üs Mensche liebt (Psalm 119:105; Lukas 1:3; 1. Johannes 4:19). Es ligt üs sehr am Herz, andere di koschtbare Wahrheite us Gottes Wort nöcher z bringe. Drum freued mir üs jetzt bsundrigs, euch das Buech z schenke: «Was mir us de Bible chönnd lerne». Mir möchted euch gern no es paar Einzelheite dezue erkläre.
Das Buech isch speziell für Chind. Es cha aber au Erwachsene helfe, d Bible kennezlerne. D Bible isch es Buech für üs alli. Das, was mir vo ihre lerned, cha üs allne helfe, würklich glücklich z sii.
D Gschichte i dem Buech stützed sich uf d Bible und verzelled d Menschheitsgschicht vo Afang a. D Bibelbricht sind so wiit wie möglich in ziitlicher Reihefolg eifach und klar verzellt.
Das Buech verzellt aber nid eifach nume Bibelbricht nache, de Text und d Bilder mached d Bricht lebendig und helfed, üs i d Persone inezversetze.
Es hilft üs z verstah, dass d Bible es Buech über Mensche isch – settigi, wo uf Jehova glost hend und settigi, wo nid uf ihn glost hend. Es motiviert üs, vo ihrem Bispil z lerne (Römer 15:4; 1. Korinther 10:6). S Buech bestaht us 14 Teil. Jede Teil fangt mitere Iileitig a – mit Pünkt, wo mir us de folgende Gschichte chönnd lerne.
Wenn du Chind hesch, chasch du mit ihne zerscht e Gschicht lose und denn d Bilder aluege. Ihr chönnd denn di agfüehrte Verse i de Bible nachelese. Hilf dim Chind z verstah, dass d Lehrpünkt vo dene Gschichte us de Bible sind. Ähnlich cha mers au mache, wenn mer amene Erwachsene hilft, en Überblick über d Bible und ihri Botschaft z übercho.
Mir sind sicher: Das Buech wird allne ufrichtige Mensche helfe – öb gross oder chlii – vo Gottes Wort z lerne und au dena z lebe. Denn chönnd au si Jehova diene – als Teil vo sinere gliebte Familie.
Eui Brüedere
Leitendi Körperschaft vo de Züge Jehovas