‘અમને લાગ્યું કે, જાણે અમને પ્રેમના વરસાદમાં ભીંજવી નાખવામાં આવ્યા છે.’ યહોવાના સાક્ષીઓના નિયામક જૂથના સભ્ય સ્ટીવન લેટે એક મહત્ત્વનો પત્ર વાંચ્યો પછી, યુક્રેઇનના એક બહેને એ શબ્દો દ્વારા પોતાની લાગણી દર્શાવી. મે ૧૦ અને ૧૧, ૨૦૧૪માં ભાઈ લેટે યુક્રેઇનની મુલાકાત લીધી હતી. એ સમયે લગભગ ૧,૬૫,૦૦૦ સાક્ષીઓએ ભાઈ લેટની ટૉક સાંભળી હતી. એ બહેન એમાંના એક હતાં.

શાસ્ત્ર આધારિત પ્રવચનો અને એ પત્રના વાંચનનો પાંચ ભાષાઓમાં અનુવાદ કરવામાં આવ્યો હતો. એ કાર્યક્રમનું યુક્રેઇનના લગભગ ૭૦૦ પ્રાર્થનાઘરમાં વીડિયો પ્રસારણ કરવામાં આવ્યું હતું.

એ જ તારીખોમાં, નિયામક જૂથના બીજા એક સભ્ય માર્ક સેન્ડરસને એ જ પત્ર રશિયામાં વાંચ્યો હતો, જે ત્યાં યોજાયેલા કાર્યક્રમનો એક ભાગ હતો. બેલારુસ અને રશિયાના ૨,૫૦૦ કરતાં વધારે મંડળોમાં એ કાર્યક્રમનું ૧૪ ભાષામાં પ્રસારણ કરવામાં આવ્યું હતું. ૧,૮૦,૪૧૩ લોકોએ એ કાર્યક્રમનો આનંદ માણ્યો હતો.

નિયામક જૂથે એ પત્ર રશિયા અને યુક્રેઇનનાં મંડળોને લખ્યો હતો. ભાઈ સેન્ડરસને એ પત્ર રશિયન ભાષામાં વાંચ્યો હતો. એ પત્રથી લોકોને એટલું ઉત્તેજન મળ્યું કે, રશિયાની શાખા કચેરી આમ લખવા પ્રેરાઈ: ‘નિયામક જૂથ અમારા વિસ્તારનાં ભાઈ-બહેનો માટે આટલો રસ દાખવે છે, એ તેઓના દિલને સ્પર્શી ગયું છે. અમને બધાને લાગ્યું કે, જાણે નિયામક જૂથે અમને બાથમાં લઈને એક મોટું આલિંગન આપ્યું છે.’

એ પત્રનો મુખ્ય હેતુ એવાં ભાઈ-બહેનોને દિલાસો અને હિંમત આપવાનો હતો, જેઓના વિસ્તારોમાં રાજકીય ઉથલપાથલ ચાલતી હતી. એ પત્ર તેઓને રાજકીય બાબતોમાં તટસ્થ રહીને ‘દુનિયાનો ભાગ ન’ બનવા ઉત્તેજન આપતું હતું.—યોહાન ૧૭:૧૬.

ભાઈ-બહેનો તટસ્થ રહી શકે માટે, નિયામક જૂથે તેઓને કયું ઉત્તેજન આપ્યું? તેઓને પ્રાર્થના, અભ્યાસ અને મનન દ્વારા યહોવા સાથે સારો સંબંધ જાળવી રાખવા ઉત્તેજન આપ્યું. શ્રોતાઓને એ યાદ અપાવવામાં આવ્યું કે, ભલે તેઓ ગમે એવી કસોટીનો સામનો કરે તેઓ યશાયા ૫૪:૧૭ના શબ્દો પર ભરોસો રાખી શકે છે. એ કલમમાં યહોવાએ વચન આપ્યું છે કે, “તારી વિરુદ્ધ વાપરવા માટે ઘડેલું કોઈ પણ હથિયાર સાર્થક થશે નહિ.”

પત્રના અંતે નિયામક જૂથે આમ કહ્યું: ‘અમે તમને બધાને ખૂબ જ પ્રેમ કરીએ છીએ. યાદ રાખજો કે, તમે હંમેશાં અમારા મનમાં છો અને અમે તમારા વતી યહોવાને આજીજી કરીએ છીએ.’

ભાઈઓની એ મુલાકાત વિશે યહોવાના સાક્ષીઓની યુક્રેઇનની શાખા કચેરીએ આમ લખ્યું: ‘નિયામક જૂથે જે રીતે અમારી કાળજી લીધી છે અને પ્રેમ વરસાવ્યો છે, એ જોઈને અમારા હૃદયો ગદ્‍ગદ થઈ ગયા છે. યુક્રેઇન અને રશિયામાં સરખા દિવસોએ જ ભાઈ લેટ અને સેન્ડરસનનું આવવું સાબિતી આપે છે કે, યહોવાના લોકો સંપીને રહે છે. તેમ જ, યહોવા અને ઈસુ બધાને કેટલો પ્રેમ કરે છે એ દેખાઈ આવ્યું. અમને બધાને લાગે છે કે, તેઓએ ખરા સમયે જ મુલાકાત લીધી. હવે, અમારામાં એટલી હિંમત આવી છે કે, ગમે એટલી મોટી કસોટી આવે, પણ અમે યહોવાની સેવામાં લાગુ રહીશું.’