પ્રકટીકરણ ૧૯:૧-૨૧
૧૯ એ પછી, મેં સ્વર્ગમાં મોટા ટોળાના અવાજ જેવો અવાજ સાંભળ્યો, જે કહેતો હતો: “યાહની સ્તુતિ કરો!* તારણ, મહિમા અને શક્તિ આપણા ઈશ્વરનાં છે.
૨ તેમના ચુકાદા સત્ય અને ન્યાયી છે, કેમ કે મહાન વેશ્યા, જેણે પોતાના વ્યભિચારથી* પૃથ્વીને ભ્રષ્ટ કરી છે, તેને તેમણે સજા કરી છે અને તેમણે પોતાના દાસોના લોહીનો બદલો તેની પાસેથી લીધો છે, જેઓના લોહીથી તેના હાથ* રંગાયેલા છે.”
૩ તરત જ બીજી વાર તેઓએ કહ્યું: “યાહની સ્તુતિ કરો!* અને બાબેલોનમાંથી ઊઠતો ધુમાડો હંમેશાં ઉપર ચઢ્યા કરે છે.”
૪ અને ૨૪ વડીલો તથા ચાર કરૂબો ઘૂંટણે પડ્યા અને રાજ્યાસન પર બેસનાર ઈશ્વરની ભક્તિ કરીને કહ્યું: “આમેન! યાહની સ્તુતિ કરો!”*
૫ તેમ જ, રાજ્યાસનમાંથી આ અવાજ આવ્યો: “ઈશ્વરનો ડર રાખનારા, તેમના નાના-મોટા દાસો, તમે બધા આપણા ઈશ્વરની સ્તુતિ કરો.”
૬ અને મેં મોટા ટોળાના અવાજ જેવો, ધસમસતા પાણીના ઘુઘવાટ જેવો અને મોટી ગર્જનાના જેવો અવાજ સાંભળ્યો, જે કહેતો હતો: “યાહની સ્તુતિ કરો,* કેમ કે આપણા સર્વશક્તિમાન ઈશ્વર યહોવા* હવે રાજા તરીકે રાજ કરે છે!
૭ ચાલો, આનંદ કરીએ અને ખુશીથી ઝૂમીએ અને તેમને મહિમા આપીએ, કેમ કે ઘેટાનું લગ્ન આવી પહોંચ્યું છે અને કન્યાએ પોતાને તૈયાર કરી છે.
૮ હા, તેને ઊજળાં, શુદ્ધ, બારીક શણનાં કપડાં પહેરવાની છૂટ આપવામાં આવી છે, કેમ કે બારીક શણનાં કપડાં પવિત્ર લોકોનાં નેક કાર્યોને રજૂ કરે છે.”
૯ અને દૂતે મને કહ્યું, “આ લખ: જેઓને ઘેટાના લગ્નના સાંજના જમણવારમાં બોલાવવામાં આવ્યા છે, તેઓ સુખી છે.” તેણે મને એમ પણ કહ્યું: “આ ઈશ્વરનાં ખરાં વચનો છે.”
૧૦ એ સાંભળીને હું તેની ભક્તિ કરવા ઘૂંટણે પડ્યો. પણ, તેણે મને કહ્યું: “જોજે! એવું ન કરીશ! હું તો ફક્ત તારો અને તારા ભાઈઓનો સાથી દાસ છું, જેઓનું કામ ઈસુ વિશે સાક્ષી આપવાનું છે. ઈશ્વરની ભક્તિ કર! કેમ કે ઈસુ વિશેની સાક્ષી આપવા ભવિષ્યવાણીઓ લખવામાં આવી છે.”
૧૧ મેં સ્વર્ગ ખુલ્લું થયેલું જોયું, અને જુઓ, એક સફેદ ઘોડો! એના પર જે બેઠા હતા, એ વિશ્વાસુ અને સત્ય કહેવાય છે; તે સચ્ચાઈથી ન્યાય કરે છે અને યુદ્ધ લડે છે.
૧૨ તેમની આંખો સળગતી જ્વાળા છે, અને તેમના માથા પર ઘણા મુગટ* છે. તેમના પર એક નામ લખેલું છે, જે તેમના સિવાય બીજું કોઈ જાણતું નથી,
૧૩ તેમણે લોહીના ડાઘવાળાં* કપડાં પહેરેલાં છે અને તે ‘ઈશ્વરનો શબ્દ’ નામથી ઓળખાય છે.
૧૪ વધુમાં, સ્વર્ગનાં સૈન્યો સફેદ ઘોડાઓ પર તેમની પાછળ પાછળ આવતાં હતાં અને તેઓએ સફેદ, શુદ્ધ, બારીક શણનાં કપડાં પહેર્યાં હતાં.
૧૫ ઘોડેસવારના મોંમાંથી ધારદાર અને લાંબી તલવાર નીકળે છે, જે પ્રજાઓને મારી નાખવા માટે છે; અને તે લોઢાના દંડથી તેઓ પર રાજ કરશે. તેમ જ, સર્વશક્તિમાન ઈશ્વરના ક્રોધ અને કોપના દ્રાક્ષાકુંડને તે ખૂંદે છે.
૧૬ તેમના ઝભ્ભા પર, હા, તેમની જાંઘ પર એક નામ લખેલું છે, રાજાઓના રાજા અને પ્રભુઓના પ્રભુ.
૧૭ મેં એક દૂતને સૂર્યની આગળ ઊભેલો જોયો અને તેણે મોટા અવાજે પોકાર કર્યો અને આકાશમાં ઊડતાં બધાં પક્ષીઓને કહ્યું: “અહીં આવો, ઈશ્વરના સાંજના મોટા જમણવાર માટે ભેગા થાઓ;
૧૮ અને તમે રાજાઓનું માંસ, સેનાપતિઓનું માંસ, શક્તિશાળી માણસોનું માંસ, ઘોડાઓનું તથા તેઓ પર બેઠેલાઓનું માંસ, આઝાદ તથા દાસ, નાના તથા મોટા સર્વનું માંસ ખાઓ.”
૧૯ અને મેં જંગલી જાનવરને, પૃથ્વીના રાજાઓને અને તેઓનાં સૈન્યોને ભેગાં થયેલાં જોયાં; ઘોડા પર જે બેઠા છે, તેમની સામે અને તેમના સૈન્ય સામે તેઓ યુદ્ધ કરવા ભેગાં થયાં હતાં.
૨૦ જંગલી જાનવરને અને એની સાથે જૂઠા પ્રબોધકને પકડવામાં આવ્યો; તેણે જંગલી જાનવર આગળ ચમત્કારો કરીને એવા લોકોને ભમાવ્યા હતા, જેઓએ જંગલી જાનવરની છાપ લીધી હતી અને એની મૂર્તિની ઉપાસના કરી હતી. તેઓ બંનેને ગંધકથી બળતા અગ્નિના સરોવરમાં જીવતા નાખી દેવામાં આવ્યા.
૨૧ પરંતુ, બાકીના તો એ લાંબી તલવારથી માર્યા ગયા, જે ઘોડેસવારના મોંમાંથી નીકળતી હતી. અને બધાં પક્ષીઓ તેઓનું માંસ ખાઈને ધરાયાં.
ફૂટનોટ
^ અથવા, “હાલેલુયાહ!” યહોવા નામનું ટૂંકું રૂપ “યાહ” છે.
^ શબ્દસૂચિ જુઓ.
^ મૂળ અર્થ, “તેના હાથ પરથી.”
^ અથવા, “હાલેલુયાહ!” યહોવા નામનું ટૂંકું રૂપ “યાહ” છે.
^ અથવા, “હાલેલુયાહ!” યહોવા નામનું ટૂંકું રૂપ “યાહ” છે.
^ અથવા, “હાલેલુયાહ!” યહોવા નામનું ટૂંકું રૂપ “યાહ” છે.
^ શબ્દસૂચિ જુઓ.
^ અથવા, “માથે પહેરાતા રાજવી પટ્ટા.”
^ અથવા કદાચ, “છાંટાવાળાં.”
