માર્ક ૮:૧-૩૮
૮ એ દિવસોમાં, ફરી એક વાર મોટું ટોળું ભેગું થયું હતું અને તેઓ પાસે ખાવાને કંઈ ન હતું. તેથી, ઈસુએ શિષ્યોને બોલાવીને કહ્યું:
૨ “મને ટોળાની દયા આવે છે, કેમ કે ત્રણ દિવસથી તેઓ મારી સાથે છે અને તેઓ પાસે કંઈ ખાવાનું નથી.
૩ જો હું તેઓને ભૂખ્યા જ ઘરે મોકલી દઉં, તો તેઓ રસ્તામાં બેભાન થઈ જશે અને તેઓમાંના અમુક તો ઘણે દૂરથી આવ્યા છે.”
૪ પણ, તેમના શિષ્યોએ જવાબ આપ્યો: “આ લોકો પેટ ભરીને ખાય શકે એટલી રોટલી કોઈ આ ઉજ્જડ જગ્યામાં કઈ રીતે લાવે?”
૫ એ સાંભળીને તેમણે તેઓને પૂછ્યું: “તમારી પાસે કેટલી રોટલી છે?” તેઓએ કહ્યું: “સાત.”
૬ અને તેમણે ટોળાને જમીન પર બેસવા જણાવ્યું. પછી તેમણે સાત રોટલી લીધી, ઈશ્વરનો આભાર માનીને રોટલી તોડી અને એ પીરસવા માટે પોતાના શિષ્યોને આપી અને તેઓએ ટોળાને એ પીરસી.
૭ તેઓની પાસે અમુક નાની માછલીઓ પણ હતી; એના પર આશીર્વાદ માંગ્યા પછી, તેમણે તેઓને એ પણ પીરસવા કહ્યું.
૮ એટલે લોકોએ ધરાઈને ખાધું અને તેઓએ સાત ટોપલા* ભરીને વધેલા ટુકડા ભેગા કર્યા.
૯ ત્યાં આશરે ૪,૦૦૦ પુરુષો હતા. પછી, તેમણે લોકોને વિદાય કર્યા.
૧૦ તરત જ તે પોતાના શિષ્યો સાથે હોડીમાં ચઢ્યા અને દલ્મનૂથા પ્રદેશમાં આવ્યા.
૧૧ ત્યાં ફરોશીઓ આવ્યા ને તેમની સાથે વાદવિવાદ કરવા લાગ્યા અને તેમની કસોટી કરવા તેમની પાસે આકાશમાંથી નિશાની માંગવા લાગ્યા.
૧૨ તેથી, તેમણે ઊંડો નિસાસો નાખીને કહ્યું: “આ પેઢી કેમ નિશાની શોધે છે? હું સાચે જ કહું છું: આ પેઢીને કોઈ નિશાની આપવામાં આવશે નહિ.”
૧૩ એ પછી, તેઓને ત્યાં જ રહેવા દઈને ઈસુ પાછા હોડીમાં બેઠા અને સામે પાર ગયા.
૧૪ જોકે, શિષ્યો રોટલી લેવાનું ભૂલી ગયા હતા અને હોડીમાં એક રોટલી સિવાય તેઓ પાસે બીજું કંઈ ન હતું.
૧૫ અને ઈસુ તેઓને ચોખ્ખા શબ્દોમાં આજ્ઞા આપતા કહેવા લાગ્યા: “તમારી આંખો ખુલ્લી રાખો; ફરોશીઓના ખમીરથી* તથા હેરોદના ખમીરથી સાવચેત રહો.”
૧૬ તેથી, તેઓ અંદરોઅંદર એ વાત પર દલીલ કરવા લાગ્યા કે તેઓમાંથી કેમ કોઈ રોટલી લાવ્યું ન હતું.
૧૭ એ જાણીને ઈસુએ તેઓને કહ્યું: “રોટલી ન લાવવા વિશે તમે કેમ દલીલ કરો છો? શું તમને હજુ ખબર પડી નથી અને એનો અર્થ સમજતા નથી? શું તમારા હૃદયો હજુ સમજી શકતા નથી?
૧૮ ‘આંખ હોવા છતાં તમે જોતા નથી અને કાન હોવા છતાં તમે સાંભળતા નથી?’ શું તમને યાદ નથી,
૧૯ જ્યારે મેં ૫,૦૦૦ પુરુષો માટે પાંચ રોટલી તોડી, ત્યારે વધેલા ટુકડા ભરેલી કેટલી ટોપલીઓ તમે ભેગી કરી હતી?” તેઓએ તેમને કહ્યું: “બાર.”
૨૦ પછી, તેમણે કહ્યું: “જ્યારે મેં ૪,૦૦૦ પુરુષો માટે સાત રોટલી તોડી, ત્યારે વધેલા ટુકડા ભરેલા કેટલા ટોપલા* તમે ભેગા કર્યા હતા?” અને તેઓએ તેમને કહ્યું: “સાત.”
૨૧ એટલે, તેમણે તેઓને કહ્યું: “શું તમે હજુ પણ સમજતા નથી?”
૨૨ હવે, તેઓ બેથસૈદામાં આવ્યા. અહીં લોકો ઈસુની પાસે એક આંધળા માણસને લાવ્યા અને તેઓ તેમને વિનંતી કરવા લાગ્યા કે તે તેને અડકે.
૨૩ અને તેમણે આંધળા માણસનો હાથ પકડ્યો અને ગામ બહાર લઈ આવ્યા. તેની આંખો પર થૂંક્યા પછી, તેમણે તેના પર પોતાનો હાથ મૂકીને પૂછ્યું: “તને કંઈ દેખાય છે?”
૨૪ માણસે નજર ઉઠાવીને જોતા કહ્યું: “મને માણસો દેખાય છે, પણ તેઓ હાલતાં-ચાલતાં વૃક્ષો જેવાં દેખાય છે.”
૨૫ તેમણે ફરીથી એ માણસની આંખો પર પોતાના હાથ મૂક્યા અને તે માણસ સ્પષ્ટ જોવા લાગ્યો. તેની દૃષ્ટિ પાછી આવી અને તે બધું સાફ સાફ જોઈ શકતો હતો.
૨૬ તેથી, તેને ઘરે મોકલતા તેમણે કહ્યું: “આ ગામમાં જઈશ નહિ.”
૨૭ ઈસુ અને તેમના શિષ્યો હવે કાઈસારીઆ ફિલિપીનાં ગામોમાં જવા નીકળ્યા અને રસ્તે તે પોતાના શિષ્યોને સવાલ પૂછવા લાગ્યા: “હું કોણ છું, એ વિશે લોકો શું કહે છે?”
૨૮ તેઓએ તેમને કહ્યું: “કેટલાક કહે છે, યોહાન બાપ્તિસ્મા આપનાર; તો બીજાઓ કહે છે, એલિયા; તો વળી, અમુક કહે છે, પ્રબોધકોમાંના એક.”
૨૯ અને તેમણે એ જ સવાલ તેઓને પૂછ્યો: “પણ, તમે શું કહો છો, હું કોણ છું?” પીતરે તેમને જવાબ આપ્યો: “તમે ખ્રિસ્ત છો.”
૩૦ ત્યારે તેમણે તેઓને સખત આજ્ઞા કરી કે તેમના વિશે કોઈને કહેવું નહિ.
૩૧ તેમ જ, તે તેઓને શીખવવા લાગ્યા કે માણસના દીકરાએ ઘણી સતાવણીમાંથી પસાર થવું પડશે; વડીલો, મુખ્ય યાજકો તથા શાસ્ત્રીઓ તેમનો નકાર કરશે; તેમને મારી નાખવામાં આવશે અને તે ત્રણ દિવસ પછી ઊઠશે.
૩૨ ખરેખર, તે હિંમતથી આ વાત કહી રહ્યા હતા. પણ, પીતર તેમને એક બાજુ લઈ ગયો અને તેમને ઠપકો આપવા લાગ્યો.
૩૩ તેમણે ફરીને શિષ્યો તરફ જોયું અને પીતરને ઠપકો આપતા કહ્યું: “મારી પાછળ જા, શેતાન! તું ઈશ્વરના વિચારો પર નહિ, પણ માણસોના વિચારો પર મન લગાડે છે.”
૩૪ હવે, તેમણે પોતાના શિષ્યો સાથે ટોળાને બોલાવ્યું અને તેઓને કહ્યું: “જો કોઈ મારી પાછળ આવવા ચાહે, તો તે પોતાની ઇચ્છાઓનો ત્યાગ કરે અને પોતાનો વધસ્તંભ* ઊંચકીને મારી પાછળ ચાલતો રહે.
૩૫ કેમ કે જે કોઈ પોતાનું જીવન* બચાવવા ચાહે છે તે એને ગુમાવશે, પણ જે કોઈ મારે લીધે અને ખુશખબરને લીધે પોતાનું જીવન* ગુમાવે છે, તે એને બચાવશે.
૩૬ ખરેખર, માણસ આખી દુનિયા મેળવે અને પોતાનું જીવન* ગુમાવે તો તેને શો લાભ?
૩૭ સાચે જ, માણસ પોતાના જીવનના* બદલામાં શું આપશે?
૩૮ કેમ કે જો આ પાપી અને વ્યભિચારી* પેઢીમાં કોઈ મારે લીધે અને મારી વાતોને લીધે શરમાય છે, તો માણસનો દીકરો પણ જ્યારે પોતાના પિતાના મહિમામાં પવિત્ર દૂતો સાથે આવશે, ત્યારે તેનો સ્વીકાર કરતા શરમાશે.”
ફૂટનોટ
^ અથવા, “ખાવાપીવાની વસ્તુઓ ભરવાના ટોપલા.”
^ શબ્દસૂચિ જુઓ.
^ અથવા, “ખાવાપીવાની વસ્તુઓ ભરવાના ટોપલા.”
^ શબ્દસૂચિ જુઓ.
^ શબ્દસૂચિમાં “પ્સીકી” જુઓ.
^ શબ્દસૂચિમાં “પ્સીકી” જુઓ.
^ શબ્દસૂચિમાં “પ્સીકી” જુઓ.
^ શબ્દસૂચિમાં “પ્સીકી” જુઓ.
^ અથવા, “બેવફા.”
