૧ કોરીંથીઓ ૧૬:૧-૨૪
૧૬ હવે પવિત્ર જનો માટે દાન ભેગું કરવા વિશે મેં ગલાતીનાં મંડળોને જે માર્ગદર્શન આપ્યું હતું, એમ તમે પણ કરો.
૨ અઠવાડિયાના પહેલા દિવસે તમારામાંના દરેકે પોતાની આવક પ્રમાણે કંઈક બાજુ પર રાખી મૂકવું, જેથી હું આવું ત્યારે દાન ભેગું કરવું ન પડે.
૩ પણ હું ત્યાં આવીશ ત્યારે, તમે જે ભરોસાપાત્ર ભાઈઓ વિશે તમારા પત્રોમાં જણાવ્યું છે, તેઓને તમારી ઉદાર ભેટ યરૂશાલેમ લઈ જવા મોકલી આપીશ.
૪ જો મારે પણ ત્યાં જવાની જરૂર હશે, તો હું તેઓની સાથે ત્યાં જઈશ.
૫ પરંતુ, મારે મકદોનિયા જવાનું જ છે, એટલે મકદોનિયાની મુસાફરી કર્યા પછી હું તમારી પાસે આવીશ;
૬ અને શક્ય હશે તો હું તમારી સાથે રહીશ, કદાચ આખો શિયાળો પણ ત્યાં પસાર કરીશ; પછી, હું જ્યાં જવાનો છું ત્યાં અમુક અંતર સુધી તમે મને મૂકવા આવજો.
૭ હું હમણાં જતાં જતાં તમને થોડી વાર માટે મળવા નથી ચાહતો, કેમ કે યહોવાની* ઇચ્છા હશે તો હું તમારી સાથે થોડો વધુ સમય પસાર કરવાની આશા રાખું છું.
૮ પરંતુ, હું પચાસમા દિવસના તહેવાર સુધી એફેસસમાં રહેવાનો છું,
૯ કારણ કે મારા માટે કામ કરવાનું એક મોટું દ્વાર ખોલવામાં આવ્યું છે;* પણ, વિરોધીઓ ઘણા છે.
૧૦ હવે, જો તિમોથી આવે તો તેને એવી રીતે રાખજો કે તે તમારી સાથે હોય ત્યારે કોઈ સંકોચ વગર રહે, કેમ કે તે મારી જેમ જ યહોવાનું* કામ કરે છે.
૧૧ એટલે, કોઈએ તેને તુચ્છ ગણવો નહિ. તેને સહીસલામત તેના માર્ગે મોકલી આપજો, જેથી તે મારી પાસે આવે, કેમ કે હું બીજા ભાઈઓ સાથે તેના આવવાની રાહ જોઉં છું.
૧૨ હવે, આપણા ભાઈ અપોલોસ વિશે જણાવું તો, મેં તેને ભાઈઓ સાથે તમારી પાસે આવવાની બહુ અરજ કરી. અત્યારે ત્યાં આવવાનો તેનો ઇરાદો નથી, પણ તેને તક મળશે ત્યારે તે આવશે.
૧૩ જાગતા રહો, શ્રદ્ધામાં મક્કમ રહો, હિંમત રાખો* અને બળવાન થાઓ.
૧૪ તમે જે કંઈ કરો, એ પ્રેમથી કરો.
૧૫ હવે ભાઈઓ, હું તમને અરજ કરું છું: તમે જાણો છો કે સ્તેફનાસના ઘરના સભ્યો અખાયાના પ્રથમ શિષ્યો છે અને તેઓએ પૂરા દિલથી પવિત્ર જનોની સેવા કરી છે.
૧૬ તેઓના જેવા લોકોને તમે આધીન રહેજો. સહકાર આપનારા તથા સખત મહેનત કરનારા બધાને પણ તમે આધીન રહેજો.
૧૭ સ્તેફનાસ, ફોર્તુનાતુસ અને અખાઈકસના આવવાથી હું બહુ ખુશ છું, કારણ કે તમારી ખોટ તેઓએ પૂરી કરી છે.
૧૮ કેમ કે તેઓએ મને* અને તમને તાજગી આપી છે. તેથી, આવા ભાઈઓની કદર કરજો.
૧૯ આસિયાનાં મંડળો તમને સલામ મોકલે છે. આકુલા, પ્રિસ્કા અને તેઓના ઘરમાં ભેગું થતું મંડળ તમને પ્રભુમાં દિલથી સલામ મોકલે છે.
૨૦ બધા ભાઈઓ તમને સલામ મોકલે છે. પવિત્ર ચુંબન સાથે એકબીજાને સલામ કહેજો.
૨૧ હું પાઊલ મારા પોતાના હાથે આ સલામ લખું છું.
૨૨ જે પ્રભુને પ્રેમ કરતો નથી, તે શાપિત થાય. હે અમારા પ્રભુ, આવો!
૨૩ પ્રભુ ઈસુની અપાર કૃપા તમારી સાથે રહે.
૨૪ તમને, ખ્રિસ્ત ઈસુના બધા શિષ્યોને હું પ્રેમ મોકલું છું.
ફૂટનોટ
^ શબ્દસૂચિ જુઓ.
^ અથવા, “કામ કરવાની એક મોટી તક મને આપવામાં આવી છે.”
^ શબ્દસૂચિ જુઓ.
^ મૂળ અર્થ, “મર્દાનગી બતાવો.”
^ શબ્દસૂચિમાં “નેફમા” જુઓ.
