૨ કોરીંથીઓ ૩:૧-૧૮
૩ શું અમારે ફરીથી પોતાની ઓળખ આપવાની જરૂર છે? અથવા, શું અમારે અમુક લોકોની જેમ, તમારા પર લખેલા કે તમારી પાસેથી મળેલા ભલામણપત્રોની જરૂર છે?
૨ તમે પોતે અમારો પત્ર છો, જે અમારા દિલ પર લખાયેલો છે અને જેને બધા લોકો જાણે છે અને વાંચે છે.
૩ કેમ કે એ દેખીતું છે કે તમે ખ્રિસ્તનો પત્ર છો, જે સેવકો તરીકે અમારા દ્વારા લખાયેલો છે; એ શાહીથી નહિ, પણ જીવંત ઈશ્વરની શક્તિથી લખાયેલો છે; એ શિલાપાટીઓ પર નહિ, પણ દિલ પર લખાયેલો છે.
૪ ખ્રિસ્ત દ્વારા ઈશ્વર પર અમને એવો ભરોસો છે.
૫ એવું નથી કે અમારી પોતાની શક્તિથી અમે આ કામ કરવા લાયક બનીએ છીએ, પણ એ તો ઈશ્વર છે જેમણે અમને લાયક બનાવ્યા છે.
૬ ઈશ્વરે સાચે જ અમને નવા કરારના સેવકો થવાને લાયક બનાવ્યા છે, લેખિત નિયમોના નહિ, પણ પવિત્ર શક્તિના સેવકો; કેમ કે લેખિત નિયમો મોતની સજા માટે દોષિત ઠરાવે છે, પણ પવિત્ર શક્તિ જીવન આપે છે.
૭ હવે, મરણ લાવનાર નિયમો શિલાપાટીઓ પર લખીને મુસાને આપવામાં આવ્યા હતા; એ એટલા ગૌરવ સાથે અપાયા હતા કે ઇઝરાયેલના દીકરાઓ મુસાના ચહેરા પરના ગૌરવને લીધે તેની સામે જોઈ શકતા ન હતા; મુસાના ચહેરા પરનું એ ગૌરવ જતું રહેવાનું હતું.
૮ જો એ નિયમો ગૌરવ સાથે આપવામાં આવ્યા હોય, તો શું પવિત્ર શક્તિ વધારે ગૌરવ સાથે નહિ અપાશે?
૯ કેમ કે જો દોષિત ઠરાવતા નિયમો ગૌરવશાળી હતા, તો પછી નેક ઠરાવતી સેવા કેટલી વધારે ગૌરવશાળી હશે!
૧૦ હકીકતમાં, એ નિયમો એક સમયે ઘણા ગૌરવશાળી હતા; પણ, હવે એનું ગૌરવ જતું રહ્યું છે કેમ કે નવો કરાર એનાથી પણ વધારે ગૌરવશાળી છે.
૧૧ જે નિયમો જતા રહેવાના હતા એને ગૌરવશાળી બનાવવામાં આવ્યા, તો પછી કાયમ ટકનારો નવો કરાર કેટલો વધારે ગૌરવશાળી હશે!
૧૨ આપણી પાસે એવી આશા હોવાથી, આપણે સંકોચ વિના* બોલીએ છીએ
૧૩ અને મુસાએ જેમ કર્યું એમ આપણે નથી કરતા; મુસાએ પોતાના ચહેરા પર પડદો રાખ્યો, જેથી નિયમોનું જતું રહેનાર ગૌરવ ઇઝરાયેલના દીકરાઓ ન જુએ.
૧૪ પરંતુ, તેઓના મન જડ થઈ ગયા હતા. કેમ કે આજ સુધી જૂનો કરાર વાંચવામાં આવે છે ત્યારે, એ પડદો પડેલો જ રહે છે; એ પડદો ફક્ત ખ્રિસ્ત દ્વારા જ હટાવવામાં આવે છે.
૧૫ હકીકતમાં, આજ સુધી જ્યારે મુસાનાં લખાણો વાંચવામાં આવે છે, ત્યારે તેઓના હૃદય પર પડદો પડેલો હોય છે.
૧૬ પરંતુ, જ્યારે વ્યક્તિ યહોવા* તરફ ફરે છે, ત્યારે પડદો હટાવી દેવામાં આવે છે.
૧૭ હવે યહોવા* તો અદૃશ્ય છે અને જ્યાં યહોવાની* પવિત્ર શક્તિ છે, ત્યાં આઝાદી છે.
૧૮ આપણા બધાના ચહેરા પડદાથી ઢંકાયેલા નથી અને આપણે અરીસાની જેમ યહોવાના* ગૌરવનું પ્રતિબિંબ પાડીએ છીએ. એમ કરતાં કરતાં આપણે પણ બદલાઈને તેમના જેવા બનીએ છીએ અને આપણું ગૌરવ વધતું ને વધતું જાય છે. આમ, અદૃશ્ય યહોવા** આપણને જેવા બનાવવા માંગે છે, એવા જ આપણે બનતા જઈએ છીએ.
ફૂટનોટ
^ અથવા, “હિંમતથી.”
^ શબ્દસૂચિ જુઓ.
^ શબ્દસૂચિ જુઓ.
^ શબ્દસૂચિ જુઓ.
^ શબ્દસૂચિ જુઓ.
^ શબ્દસૂચિ જુઓ.
^ અથવા કદાચ, “યહોવાની પવિત્ર શક્તિ.”
