અયૂબ ૩૧:૧-૪૦
૩૧ “મેં મારી આંખો સાથે કરાર* કર્યો છે.+
તો પછી હું કઈ રીતે કોઈ સ્ત્રીને* ખરાબ નજરે જોઈ શકું?*+
૨ જો મેં એમ કર્યું હોત, તો સ્વર્ગના ઈશ્વર પાસેથી શું મને હિસ્સો મળ્યો હોત?
ઊંચે બિરાજનાર સર્વશક્તિમાન પાસેથી શું મને વારસો મળ્યો હોત?
૩ શું ખોટું કરનાર પર આફત,અને નુકસાન કરનાર પર વિપત્તિ આવી પડતી નથી?+
૪ શું તે મારા માર્ગો જોતા નથી?+
શું તે મારાં બધાં પગલાં ગણતા નથી?
૫ શું હું ક્યારેય જૂઠના માર્ગે* ચાલ્યો છું?
શું મારા પગ ક્યારેય કપટ કરવા ઉતાવળા થયા છે?+
૬ ઈશ્વરે મને અદ્દલ ત્રાજવામાં તોળવો જોઈએ,+પછી તેમને મારી પ્રમાણિકતાની* ખબર પડશે.+
૭ જો મારાં પગલાં ખરા માર્ગેથી ભટકી ગયાં હોય,+અથવા મારું દિલ મારી આંખોથી લલચાયું હોય,+અથવા મારા હાથોએ ભ્રષ્ટ કામ કર્યાં હોય,
૮ તો હું વાવું અને બીજું કોઈ એ ખાય,+હું રોપું અને બીજું કોઈ એ ઉખેડી નાખે.*
૯ જો મારું દિલ કોઈ સ્ત્રીને જોઈને લલચાયું હોય+અને હું પડોશીના બારણે લાગ જોઈને છુપાઈ રહ્યો હોઉં,+
૧૦ તો મારી પત્ની બીજા માણસનાં દળણાં દળેઅને બીજા માણસો તેની સાથે સૂઈ જાય.*+
૧૧ જો મેં એવું શરમજનક કામ કર્યું હોત,તો એ માટે ન્યાયાધીશોએ મને સજા કરી હોત.+
૧૨ વ્યભિચાર* તો આગ છે, જે બધું ભરખી જશે,*+મારી પાસે જે કંઈ છે એ બધું ભસ્મ કરી નાખશે.*
૧૩ જો મારા દાસ કે દાસીને મારી વિરુદ્ધ ફરિયાદ હોય,અને મેં તેઓનો દાવો* સાંભળવાનો નકાર કર્યો હોય,
૧૪ તો જ્યારે ઈશ્વર મારી વિરુદ્ધ ઊભા થશે, ત્યારે હું શું કરીશ?
તે મારી પાસે હિસાબ માંગશે ત્યારે, હું શો જવાબ આપીશ?+
૧૫ જેમણે મને ગર્ભમાં રચ્યો, શું તેમણે તેઓને પણ રચ્યા ન હતા?+
શું તેમણે જ અમને કૂખમાં ઘડ્યા ન હતા?+
૧૬ જો મેં ગરીબની ઇચ્છા પૂરી કરી ન હોય,+અથવા વિધવાની આંખો નિરાશ કરી હોય;+
૧૭ જો મારા ભાગનો ખોરાક મેં એકલાએ જ ખાધો હોય,અને એમાંથી અનાથોને કંઈ આપ્યું ન હોય;+
૧૮ (કેમ કે મારી જુવાનીથી હું એ અનાથોનો પિતા છું,અને મારા બાળપણથી હું વિધવાઓનો સહારો છું.)
૧૯ જો મેં કોઈને કપડાં વગર ઠંડીથી મરતા જોયો હોય,અથવા જોયું હોય કે ગરીબ પાસે ઓઢવા કંઈ નથી;+
૨૦ જો તેને ગરમાવો આપવા મેં મારા ઘેટાનું ઊન આપ્યું ન હોય,અને તેણે મને આશીર્વાદ આપ્યો ન હોય;+
૨૧ જો શહેરને દરવાજે+ કોઈ અનાથને મારી જરૂર પડી હોય,અને તેને મદદ કરવાને બદલે મેં તેના પર હાથ ઉગામ્યો હોય,*+
૨૨ તો મારો હાથ મારા ખભામાંથી છૂટો પડી જાય,અને મારો હાથ કોણીએથી ભાંગી જાય.
૨૩ કેમ કે હું ઈશ્વર પાસેથી આવતી આફતથી ડરતો હતો,અને તેમના ગૌરવ સામે ટકી શકતો ન હતો.
૨૪ જો મેં સોના પર ભરોસો રાખ્યો હોય,અથવા ચોખ્ખા સોનાને કહ્યું હોય, ‘તું મને સલામત રાખે છે!’+
૨૫ જો મેં મારી પુષ્કળ સંપત્તિને લીધે અભિમાન કર્યું હોય,+મારી ભેગી કરેલી માલ-મિલકતને લીધે ઘમંડ કર્યું હોય;+
૨૬ જો પ્રકાશતા સૂર્યને જોઈને,અથવા ચંદ્રને સોળે કળાએ ખીલતો જોઈને,+
૨૭ મારું દિલ છૂપી રીતે લલચાયું હોય,અને તેઓની ભક્તિ કરવા મેં મારા હાથને ચૂમ્યો હોય,*+
૨૮ તો મેં સ્વર્ગના ઈશ્વરનો નકાર કર્યો હોત,અને એ ગુના માટે મને ન્યાયાધીશો પાસેથી સજા મળી હોત.
૨૯ શું મારા દુશ્મનની બરબાદી જોઈને હું કદી ખુશ થયો છું?+
શું તેના પર મુસીબત આવતી જોઈને મેં ખુશાલી મનાવી છે?
૩૦ તેનો જીવ જાય એવો શ્રાપ આપીને,+મેં કદી મારા મોંને પાપ કરવા દીધું નથી.
૩૧ મારા ઘરના* માણસો કહે છે,‘એવો એક પણ માણસ નહિ મળે, જેણે અયૂબને ત્યાં પેટ ભરીને ખાધું* નહિ હોય.’+
૩૨ મુસાફરો માટે મારા ઘરના દરવાજા ખુલ્લા હતા;કોઈ અજાણ્યાએ* બહાર રાત વિતાવવી પડતી ન હતી.+
૩૩ બીજાઓની જેમ મારી ભૂલોને ઝભ્ભામાં સંતાડીને,શું મેં ક્યારેય મારા અપરાધો છુપાવ્યા છે?+
૩૪ સમાજ શું કહેશે એ બીકને લીધે,અથવા કુટુંબીજનોના વિરોધને લીધે,શું હું કદી ચૂપ રહ્યો છું? શું ઘરથી બહાર નીકળતા ડર્યો છું?
૩૫ કાશ! કોઈ મારું સાંભળે!+
હું સમ ખાઈને* કહું છું કે હું સાચું બોલું છું.
કાશ! સર્વશક્તિમાન મને જવાબ આપે!+
જો મારા પર આરોપ મૂકનારે મારા દોષ લખીને આપ્યા હોત,
૩૬ તો હું ગર્વથી એ લખાણ મારા ખભા પર ઊંચકીને ફર્યો હોત,એને મુગટની જેમ મારા માથે પહેર્યું હોત.
૩૭ મેં ઈશ્વરને મારાં પગલાંનો હિસાબ ગણી આપ્યો હોત;એક રાજકુમારની જેમ હું હિંમતથી તેમની સામે ગયો હોત.
૩૮ જો મારી જમીન મારી વિરુદ્ધ ફરિયાદ કરે કે મેં એને ચોરી છે,અને એના ચાસો* ભેગા મળીને રુદન કરે;
૩૯ જો મેં એનું ફળ મફત ખાધું હોય,+અથવા એને ખૂંચવી લેવાને લીધે મૂળ માલિકોએ નિસાસા નાખવા પડ્યા હોય,+
૪૦ તો એમાં ઘઉંને બદલે કાંટા ઊગે,અને જવને બદલે ગંધાતું ઘાસ ઊગે.”
અયૂબના શબ્દો અહીં પૂરા થાય છે.
ફૂટનોટ
^ અથવા, “બીજી કોઈ સ્ત્રીને હું વાસનાભરી નજરે જોઈશ નહિ.”
^ મૂળ, “કુમારિકાને.”
^ અથવા કદાચ, “જૂઠા માણસો સાથે.”
^ અથવા, “મારા વંશજોને ઉખેડી નાખવામાં આવે.”
^ અથવા, “જાતીય સંબંધ બાંધે.”
^ અથવા, “નાશ થાય ત્યાં સુધી ભરખી જશે.”
^ અથવા, “જડમૂળથી ઉખેડી નાખશે.”
^ અથવા, “મુકદ્દમો.”
^ અથવા કદાચ, “જો શહેરના દરવાજે બેઠેલા ન્યાયાધીશોને મારા પક્ષના જાણીને મેં કોઈ અનાથ પર હાથ ઉગામ્યો હોય.”
^ દેખીતું છે, એ મૂર્તિપૂજાની એક રીત છે.
^ અથવા, “તંબુના.”
^ મૂળ, “માંસ ખાધું.”
^ અથવા, “પરદેશીએ.”
^ અથવા, “સહી કરીને.”
^ એટલે કે, ખેતર ખેડવાથી પડતો લાંબો આંકો.
