અયૂબ ૮:૧-૨૨
૮ બિલ્દાદ+ શૂહીએ+ જવાબમાં કહ્યું:
૨ “તું ક્યાં સુધી આમ બોલ્યા કરીશ?+
તું તો બકવાસ કરે છે!*
૩ શું ઈશ્વર કદી ન્યાય ઊંધો વાળે?
શું સર્વશક્તિમાન જે ખરું છે, એ જ નહિ કરે?
૪ બની શકે, તારા દીકરાઓએ તેમની વિરુદ્ધ પાપ કર્યું હશે,એટલે તો ઈશ્વરે તેઓને બંડની સજા કરી છે;
૫ પણ જો તું ઈશ્વર તરફ મીટ માંડીશ,+અને સર્વશક્તિમાન પાસે દયાની ભીખ માંગીશ,
૬ જો તું પવિત્ર અને પ્રમાણિક* હોઈશ,+તો તે તારા પર ધ્યાન આપશે*અને પહેલાંની જેમ તને તારું સ્થાન પાછું આપશે.
૭ ભલે તારી શરૂઆત મામૂલી હતી,પણ તારું ભવિષ્ય સોનેરી હશે.+
૮ અગાઉની પેઢીઓને પૂછ,તેઓને જે જાણવા મળ્યું એના પર ધ્યાન આપ.+
૯ કેમ કે આપણો જન્મ તો હજી ગઈ કાલે જ થયો છે અને કશું જાણતા નથી,આપણું જીવન ઘડી બે ઘડીનું છે.
૧૦ શું તેઓ તને નહિ શીખવે?
પોતાનાં મનની વાત તેઓ તને નહિ જણાવે?
૧૧ શું કાદવ* વગર નેતર વધે?
શું પાણી વગર બરુ* ઊગે?
૧૨ હજી તો એમાં કળી ફૂટી હોય અને એને તોડી પણ ન હોય,ત્યાં સુધીમાં તો એ બીજા છોડ પહેલાં સુકાઈ જાય છે.
૧૩ જેઓ ઈશ્વરને ભૂલી જાય છે, તેઓના એવા જ હાલ થાય છે,કેમ કે અધર્મીની* આશા મરી પરવારે છે.
૧૪ તેનો ભરોસો વ્યર્થ છે,કરોળિયાની જાળની* જેમ તરત તૂટી પડે છે.
૧૫ તે એ જાળ* પર ટેકો લેશે, પણ એ તૂટી જશે;તે એને મજબૂતીથી પકડી રાખવા પ્રયત્ન કરશે, પણ એ ટકશે નહિ.
૧૬ સૂર્યપ્રકાશમાં તે લીલાછમ છોડ જેવો છે,એની ડાળીઓ ફૂટીને બાગમાં ફેલાય છે.+
૧૭ એનાં મૂળિયાં પથ્થરોની આસપાસ વીંટળાય છે;પથ્થરોમાં એ પોતાનું ઘર શોધે છે.
૧૮ પણ જ્યારે એને પોતાની જગ્યાએથી ઉખેડી નાખવામાં આવે છે,ત્યારે એ જગ્યા કહે છે, ‘મેં તને ક્યારેય જોયો નથી.’+
૧૯ હા, એવી રીતે એનો અંત આવે છે;+પછી એની જગ્યાએ બીજા છોડ ફૂટી નીકળે છે.
૨૦ સાચે જ, પ્રમાણિક* જનને ઈશ્વર ક્યારેય નહિ તરછોડે;તે દુષ્ટ માણસનો હાથ ક્યારેય નહિ પકડે.*
૨૧ પણ તે તારા મોં પર હાસ્ય લાવશે,તારા હોઠ આનંદનો પોકાર કરશે.
૨૨ જેઓ તને ધિક્કારે છે, તેઓનું માથું શરમથી ઝૂકી જશે,દુષ્ટોના તંબુ જમીનદોસ્ત થઈ જશે.”
ફૂટનોટ
^ અથવા, “તારા શબ્દો વંટોળિયા જેવા છે!”
^ અથવા, “તારા માટે ઊભા થશે.”
^ અહીં નદી નજીકના કાદવ-કીચડની વાત થાય છે.
^ અથવા, “ઈશ્વર-વિરોધીની.”
^ મૂળ, “ઘરની.”
^ મૂળ, “ઘર.”
^ અથવા, “નિર્દોષ.”
^ અથવા, “સાથ નહિ આપે.”
