ગણના ૨૪:૧-૨૫
૨૪ જ્યારે બલામે જોયું કે ઇઝરાયેલને આશીર્વાદ આપવાથી યહોવા ખુશ થાય છે,* ત્યારે તે પહેલાંની જેમ ઇઝરાયેલના વિનાશ વિશે શુકન જોવા ગયો નહિ.+ પણ તે વેરાન પ્રદેશ તરફ મોં ફેરવીને ઊભો રહ્યો.
૨ બલામે નજર ઉઠાવીને જોયું તો ઇઝરાયેલીઓ પોતપોતાનાં કુળ પ્રમાણે છાવણીમાં રહેતા હતા.+ પછી ઈશ્વરની શક્તિ* બલામ પર આવી+
૩ અને તેણે આ ભવિષ્યવચન કહ્યું:+
“બયોરના દીકરા બલામનો સંદેશો,
હા, એ માણસનો સંદેશો જેની આંખો ઉઘાડવામાં આવી છે,
૪ એ માણસનો સંદેશો જે ઈશ્વરની વાણી સાંભળે છે,
જેણે જમીન પર પડીને ખુલ્લી આંખે,
સર્વશક્તિમાનનું દર્શન જોયું છે:+
૫ હે યાકૂબ, તારા તંબુઓ કેટલા સુંદર છે!
હે ઇઝરાયેલ, તારા મંડપો કેટલા રમણીય છે!+
૬ તેઓ એવી રીતે ફેલાયા છે, જાણે દૂર પથરાયેલી ખીણો હોય,+
જાણે નદી પાસેના બાગ-બગીચા હોય,
જાણે યહોવાએ રોપેલા અગરના* છોડ હોય,
જાણે પાણી પાસે દેવદારનાં ઝાડ હોય.
૭ તેનાં* ચામડાનાં બે પાત્રમાંથી પાણી ટપકતું રહે છે,
તેનું બી* પુષ્કળ પાણી પાસે રોપવામાં આવ્યું છે.+
તેનો રાજા+ તો અગાગ કરતાં પણ મહાન બનશે,+
તેનું રાજ્ય ઊંચું મનાવવામાં આવશે.+
૮ ઈશ્વર તેને ઇજિપ્તમાંથી બહાર લાવે છે.
ઈશ્વર તેઓ માટે જંગલી આખલાનાં શિંગડાં* જેવા છે.
ઇઝરાયેલ બીજી પ્રજાઓને, હા, તેને સતાવનારાઓને ભરખી જશે,+
તે તેઓનાં હાડકાં ચાવી જશે અને પોતાનાં બાણોથી તેઓને વીંધી નાખશે.
૯ તે સિંહની જેમ જમીન પર પગ ફેલાવીને આડો પડ્યો છે,
તેને છંછેડવાની હિંમત કોણ કરે?
તને આશીર્વાદ આપનાર પર આશીર્વાદ આવે,
અને તને શ્રાપ આપનાર પર શ્રાપ ઊતરી આવે.”+
૧૦ એ સાંભળીને બલામ પર બાલાકનો ગુસ્સો સળગી ઊઠ્યો. તેણે ગુસ્સામાં પોતાના હાથ પછાડીને બલામને કહ્યું: “મારા દુશ્મનોને શ્રાપ આપવા મેં તને અહીં બોલાવ્યો હતો,+ પણ આ ત્રણ વાર તેં તેઓને આશીર્વાદ જ આપ્યો છે.
૧૧ હવે અહીંથી ચાલ્યો જા. હું તો તને સન્માન આપવા માંગતો હતો,+ પણ જો! યહોવાએ તને સન્માન મેળવવાથી રોક્યો છે.”
૧૨ બલામે બાલાકને કહ્યું: “મેં તો તમારા સંદેશવાહકોને કહ્યું હતું,
૧૩ ‘જો બાલાક સોના-ચાંદીથી ભરેલો પોતાનો મહેલ મને આપી દે, તોપણ મારા ઈશ્વર યહોવાની આજ્ઞા વિરુદ્ધ જઈને હું મારી મરજી પ્રમાણે* કંઈ જ સારું કે ખરાબ કરી શકતો નથી. યહોવા જે કહેશે, એ જ હું બોલીશ.’+
૧૪ હવે હું મારા લોકો પાસે જઈ રહ્યો છું. ચાલો, હું તમને જણાવું કે આ લોકો ભાવિમાં* તમારા લોકોનું શું કરશે.”
૧૫ પછી તેણે આ ભવિષ્યવચન કહ્યું:+
“બયોરના દીકરા બલામનો સંદેશો,હા, એ માણસનો સંદેશો જેની આંખો ઉઘાડવામાં આવી છે,+
૧૬ એ માણસનો સંદેશો જે ઈશ્વરની વાણી સાંભળે છે,જેની પાસે સર્વોચ્ચ ઈશ્વરે આપેલું જ્ઞાન છે,જેણે જમીન પર પડીને ખુલ્લી આંખે,સર્વશક્તિમાનનું દર્શન જોયું છે:
૧૭ હું તેને જોઈશ, પણ હમણાં નહિ;હું તેના પર નજર કરીશ, પણ આજકાલમાં નહિ.
યાકૂબમાંથી તારો નીકળશે,+ઇઝરાયેલમાંથી રાજદંડ*+ ઊભો થશે.+
તે મોઆબના કપાળને* વચ્ચેથી ચીરી નાખશે,+અને હિંસાના દીકરાઓની ખોપરી ભાંગી નાખશે.
૧૮ ઇઝરાયેલ પોતાનું પરાક્રમ બતાવશે ત્યારે,અદોમ તેનો વારસો બનશે,+હા, સેઈર+ પોતાના દુશ્મનોનો વારસો બનશે.+
૧૯ યાકૂબમાંથી એક માણસ આવશે, જે દુશ્મનોને પગ તળે કચડી નાખશે,+તે શહેરના બચી ગયેલાઓનો પણ વિનાશ કરી દેશે.”
૨૦ અમાલેકને જોઈને તેણે આ ભવિષ્યવચન કહ્યું:
“અમાલેક બધી પ્રજાઓમાં સૌથી પહેલો હતો,*+પણ છેવટે તેનો નાશ થશે.”+
૨૧ કેનીઓને+ જોઈને તેણે આ ભવિષ્યવચન કહ્યું:
“તારું રહેઠાણ સલામત છે, ખડક પરના માળાની જેમ તારું ઘર સુરક્ષિત છે.
૨૨ પણ કોઈ આવશે અને કેનીઓને* બાળી નાખશે.
એ દિવસ દૂર નથી, જ્યારે આશ્શૂર તને બંદી બનાવીને લઈ જશે.”
૨૩ બલામે પોતાના ભવિષ્યવચનમાં આમ પણ કહ્યું:
“અફસોસ! ઈશ્વર એ બધું કરશે ત્યારે કોણ બચશે?
૨૪ કિત્તીમના+ કિનારેથી વહાણો આવશે,તેઓ આશ્શૂરને+ સતાવશે,અને એબેર પર જુલમ ગુજારશે.
આખરે તે પોતે પણ નાશ પામશે.”
૨૫ પછી બલામ+ ત્યાંથી નીકળી ગયો અને બાલાક પણ પોતાને રસ્તે રવાના થયો.
ફૂટનોટ
^ મૂળ, “યહોવાની નજરમાં સારું છે.”
^ શબ્દસૂચિમાં “રુઆખ; નેફમા” જુઓ.
^ આ એવાં ઝાડ છે, જેનાં ગુંદર અને તેલમાંથી અત્તર બનાવવામાં આવતું.
^ અથવા, “વંશજ.”
^ દેખીતું છે, એ ઇઝરાયેલને બતાવે છે.
^ મૂળ, “મારા દિલથી.”
^ અથવા, “છેલ્લા દિવસોમાં.”
^ અથવા, “લમણાંને.”
^ એટલે કે, ઇઝરાયેલ ઇજિપ્તમાંથી નીકળ્યો ત્યારે, અમાલેકે કોઈ કારણ વગર તેના પર સૌથી પહેલા હુમલો કર્યો હતો.
^ મૂળ, “કાઈનને.”
