ગીતશાસ્ત્ર ૧૪૮:૧-૧૪
૧૪૮ યાહનો જયજયકાર કરો!*
સ્વર્ગમાંથી યહોવાની સ્તુતિ કરો,+ઊંચાણમાંથી તેમની સ્તુતિ કરો.
૨ તેમના બધા સ્વર્ગદૂતો, તેમની સ્તુતિ કરો.+
તેમનાં બધાં સૈન્યો, તેમની સ્તુતિ કરો.+
૩ સૂર્ય અને ચંદ્ર, તેમની સ્તુતિ કરો.
ઝગમગતા સર્વ તારાઓ, તેમની સ્તુતિ કરો.+
૪ હે સૌથી ઊંચા આકાશ અને વરસાદી વાદળો,તેમની સ્તુતિ કરો.
૫ તેઓ યહોવાના નામનો જયજયકાર કરો,કેમ કે તેમણે આજ્ઞા કરી અને તેઓનું સર્જન થયું.+
૬ તે તેઓને સદાને માટે ટકાવી રાખે છે.+
તેમણે હુકમ કર્યો છે, જે કદી રદ થશે નહિ.+
૭ પૃથ્વી પરથી યહોવાની સ્તુતિ કરો.
હે મોટાં દરિયાઈ પ્રાણીઓ અને ઊંડા સાગરો,
૮ હે વીજળી, કરા, હિમ અને કાળાં વાદળો,તેમનો પડ્યો બોલ ઝીલનાર આંધીઓ,+
૯ હે પહાડો અને બધી ટેકરીઓ,+ફળ આપતાં વૃક્ષો અને દેવદારનાં સર્વ વૃક્ષો,+
૧૦ હે જંગલી પ્રાણીઓ+ અને બધાં પાલતુ પ્રાણીઓ,પેટે ચાલનાર પ્રાણીઓ અને ઊડતાં પક્ષીઓ,
૧૧ હે પૃથ્વીના રાજાઓ અને બધી પ્રજાઓ,પૃથ્વીના અધિકારીઓ અને બધા ન્યાયાધીશો,+
૧૨ હે યુવકો અને યુવતીઓ,વૃદ્ધો અને બાળકો, તમે સૌ તેમની સ્તુતિ કરો.
૧૩ તેઓ સર્વ યહોવાના નામનો જયજયકાર કરો,કેમ કે તેમનું નામ બીજા બધાથી ઊંચું છે.+
તેમનો મહિમા ધરતી અને આકાશથી ઘણો વધારે છે.+
૧૪ તે પોતાના લોકોનું બળ વધારશે,*જેથી તેમના બધા વફાદાર લોકોને,હા, તેમના ઇઝરાયેલી લોકોને સન્માન મળે, જેઓ તેમની નજીક છે.
યાહનો જયજયકાર કરો!*
ફૂટનોટ
^ અથવા, “હાલેલુયાહ!” યહોવા નામનું ટૂંકું રૂપ “યાહ” છે.
^ મૂળ, “શિંગ ઊંચું કરશે.” શબ્દસૂચિમાં “શિંગ” જુઓ.
^ અથવા, “હાલેલુયાહ!” યહોવા નામનું ટૂંકું રૂપ “યાહ” છે.
