ગીતશાસ્ત્ર ૪૧:૧-૧૩
સંગીત સંચાલક માટે સૂચન. દાઉદનું ગીત.
૪૧ ધન્ય છે એ માણસને, જે લાચારની સંભાળ રાખે છે.+
યહોવા એ માણસને મુસીબતના દિવસે બચાવશે.
૨ યહોવા તેની રક્ષા કરશે અને તેને જીવતો રાખશે.
ધરતી પર તે સુખી ગણાશે.+
તમે તેને દુશ્મનોની ચાલાકીમાં કદીયે ફસાવા નહિ દો.+
૩ બીમારીના બિછાનામાં પણ યહોવા તેનો સાથ નિભાવશે.+
તમે બીમારીમાં તેની સંભાળ રાખશો.
૪ મેં કહ્યું: “હે યહોવા, મારા પર કૃપા કરો.+
મને સાજો કરો,+ કેમ કે મેં તમારી વિરુદ્ધ પાપ કર્યું છે.”+
૫ પણ વેરીઓ મારા વિશે ખરાબ બોલતા કહે છે:
“તે ક્યારે મરશે અને ક્યારે તેનું નામ ભૂંસાઈ જશે?”
૬ તેઓમાંથી કોઈ મને મળવા આવે ત્યારે ઢોંગ કરીને જૂઠું બોલે છે.*
મને બદનામ કરવા કંઈ ને કંઈ શોધી કાઢે છેઅને બહાર જઈને જગજાહેર કરે છે.
૭ મને નફરત કરનારા બધા અંદરોઅંદર ગુસપુસ કરે છે.
તેઓ આમ કહીને કાવતરું ઘડે છે:
૮ “તેના પર મોટી આફત આવી પડી છે.
હવે તે પડ્યો એ પડ્યો, પાછો ઊભો થવાનો નથી.”+
૯ અરે, જે માણસ મારો જિગરી દોસ્ત હતો, જેના પર મને પૂરો ભરોસો હતો+અને જે મારી સાથે બેસીને રોટલી ખાતો હતો, તેણે જ મારી સામે લાત ઉગામી છે.*+
૧૦ પણ હે યહોવા, તમે મારા પર કૃપા કરો અને મને ઊભો કરો,જેથી હું તેઓ પાસેથી બદલો લઈ શકું.
૧૧ જ્યારે શત્રુ મારી સામે વિજયનો હર્ષનાદ નહિ કરી શકે,+ત્યારે હું જાણીશ કે તમે મારાથી રાજી છો.
૧૨ મારી વફાદારીને* લીધે તમે મને ટકાવી રાખો છો.+
તમે મને સદાને માટે તમારી આગળ રાખશો.+
૧૩ યુગોના યુગો સુધી,ઇઝરાયેલના ઈશ્વર યહોવાના ગુણગાન ગાવામાં આવે.+
આમેન* અને આમેન.
ફૂટનોટ
^ મૂળ, “તેનું દિલ અસત્ય બોલે છે.”
^ અથવા, “તે જ મારી વિરુદ્ધ થયો છે.”
^ અથવા, “પ્રમાણિકતાને.” શબ્દસૂચિમાં “પ્રમાણિક” જુઓ.
