ગીતશાસ્ત્ર ૯૮:૧-૯
-
યહોવા બચાવનાર અને સારા ન્યાયાધીશ
-
યહોવાએ કરેલો ઉદ્ધાર જાહેર થયો છે (૨, ૩)
-
ગીત.
૯૮ યહોવા માટે નવું ગીત ગાઓ,+કેમ કે તેમણે પરાક્રમી કામો કર્યાં છે.+
તેમનો જમણો હાથ, હા, પવિત્ર હાથ ઉદ્ધાર અપાવે છે.*+
૨ યહોવાએ જાહેર કર્યું છે કે ઉદ્ધાર તેમની પાસેથી છે.+
તેમણે પોતાની ભલાઈ બીજી પ્રજાઓ આગળ જાહેર કરી છે.+
૩ તેમણે ઇઝરાયેલ* પર અતૂટ પ્રેમ અને વફાદારી બતાવવાનું વચન યાદ રાખ્યું છે.+
આખી પૃથ્વીએ આપણા ઈશ્વર તરફથી મળેલું તારણ જોયું છે.*+
૪ આખી પૃથ્વીના લોકો, યહોવા માટે વિજયનો પોકાર કરે.
તેઓ ખુશ થાય, આનંદથી પોકારી ઊઠે અને તેમની સ્તુતિ કરે.*+
૫ તેઓ વીણા વગાડીને યહોવાનો જયજયકાર કરે,*વીણા સાથે મધુર ગીત ગાય.
૬ તેઓ તુરાઈ* અને રણશિંગડું વગાડે,+રાજા આગળ, યહોવા આગળ વિજયનો પોકાર કરે.
૭ સમુદ્ર અને એમાં રહેનારા બધા આનંદનો પોકાર કરે.
ધરતી અને એમાં રહેનારા આનંદથી ઝૂમી ઊઠે.
૮ નદીઓ પોતાના હાથે તાળી પાડે.
પર્વતો ભેગા મળીને ખુશીથી પોકારી ઊઠે.+
૯ યહોવા માટે આનંદ કરો, કેમ કે તે પૃથ્વીનો ન્યાય કરવા આવે* છે.
તે પૃથ્વી પર રહેનારાઓનો સચ્ચાઈથી ન્યાય કરશે,+કોઈ ભેદભાવ વગર તે લોકોનો ઇન્સાફ કરશે.+
ફૂટનોટ
^ અથવા, “તેમને જીત અપાવે છે.”
^ અથવા, “ઇઝરાયેલના ઘર.”
^ અથવા, “આપણા ઈશ્વરની જીત જોઈ છે.”
^ અથવા, “સ્તુતિ કરવા સંગીત વગાડે.”
^ અથવા, “જયજયકાર કરવા સંગીત વગાડે.”
^ અથવા, “આવ્યા.”
