નીતિવચનો ૫:૧-૨૩
૫ મારા દીકરા, હું તને બુદ્ધિની જે વાતો કહું છું, એના પર ધ્યાન આપ,સમજશક્તિ વિશે જે કંઈ શીખવું છું, એ કાને ધર.+
૨ એમ કરવાથી તું તારી પારખશક્તિ સાચવી શકીશઅને તારા હોઠે હંમેશાં સત્યની વાતો નીકળશે.+
૩ પાપી* સ્ત્રીના શબ્દો* મધ જેવા મીઠા છે,+તેની વાતો* તેલ જેવી લીસી છે.+
૪ પણ આખરે તો તે સ્ત્રી કડવા છોડ* જેવી કડવી છે+અને બેધારી તલવાર જેવી ધારદાર છે.+
૫ તેના પગ મરણ તરફ જાય છે,તેનાં પગલાં કબરમાં* જાય છે.
૬ તે જીવનના માર્ગ વિશે જરાય વિચારતી નથી.
તે આમતેમ ભટક્યા કરે છે,પણ જાણતી નથી કે ક્યાં જઈ રહી છે.
૭ મારા દીકરા,* મારું સાંભળ,મારી વાતોથી મોં ન ફેરવ.
૮ તું એ સ્ત્રીથી દૂર રહેજે,તેના ઘરના બારણે ફરકતો પણ નહિ,+
૯ નહિતર તું તારું માન-સન્માન ગુમાવીશ+અને તારા દિવસો દુઃખ-તકલીફોમાં વીતશે;+
૧૦ પારકાઓ તારી ધનદોલતથી લીલાલહેર કરશે,+મહેનત તું કરીશ, પણ ઘર બીજાનાં* ભરાશે.
૧૧ એવું થશે તો તારા જીવનના છેલ્લા દિવસોમાં,જ્યારે તારું બળ ઘટી જશે અને તારું શરીર કમજોર થઈ જશે, ત્યારે તું નિસાસા નાખીશ.+
૧૨ તું કહીશ: “મેં કેમ શિસ્તનો* નકાર કર્યો?
મારા દિલે કેમ ઠપકો ન સ્વીકાર્યો?
૧૩ મેં કેમ મારા સલાહકારોનું માન્યું નહિ?
મેં કેમ મારા શિક્ષકોનું સાંભળ્યું નહિ?
૧૪ હું વિનાશને આરે આવી ગયો છુંઅને આખા સમાજની સામે* હું શરમમાં મુકાયો છું.”+
૧૫ તારા પોતાના ટાંકામાંથી પાણી પીઅને તારા પોતાના કૂવામાંથી તાજું* પાણી પી.+
૧૬ તારા ઝરાઓનું પાણી કેમ બહાર વહી જાય?
તારી નદીઓનું પાણી કેમ ચોકમાં વહી જાય?+
૧૭ એ ફક્ત તારા માટે જ રહે,બીજા લોકો માટે નહિ.+
૧૮ તારા ઝરા પર ઈશ્વરનો આશીર્વાદ રહે,તારી યુવાનીની પત્ની સાથે તું ખુશ રહે.+
૧૯ તે પ્રેમાળ હરણી જેવી અને સુંદર પહાડી બકરી જેવી છે.+
તેનાં સ્તનોથી તને હંમેશાં સંતોષ મળે.
તું તેના પ્રેમમાં કાયમ ડૂબેલો રહે.+
૨૦ બેટા, તું પાપી* સ્ત્રીની પ્રેમજાળમાં ફસાતો નહિ,વ્યભિચારી* સ્ત્રીને ગળે લગાવતો નહિ.+
૨૧ માણસના બધા માર્ગો પર યહોવાની નજર છે,તે તેના રસ્તાઓ ધ્યાનથી તપાસે છે.+
૨૨ દુષ્ટના અપરાધો તેના માટે ફાંદા જેવા છે,તે પોતાનાં જ પાપના દોરડાથી બંધાઈ જશે.+
૨૩ શિસ્ત ન સ્વીકારવાને લીધે તે માર્યો જશે,અતિશય મૂર્ખાઈને લીધે તે માર્ગથી ભટકી જશે.
ફૂટનોટ
^ મૂળ, “પાપી સ્ત્રીના હોઠ.”
^ મૂળ, “તેનું મોં.”
^ મૂળ, “મારા દીકરાઓ.”
^ અથવા, “પરદેશીઓનાં.”
^ મૂળ, “સમાજ અને મંડળની વચ્ચે.” શબ્દસૂચિમાં “મંડળ” જુઓ.
^ અથવા, “વહેતું.”
