ન્યાયાધીશો ૧૦:૧-૧૮
૧૦ અબીમેલેખ પછી તોલા ઊભો થયો, જે દોદોના દીકરા પૂઆહનો દીકરો હતો. તેણે ઇઝરાયેલનો ન્યાય કર્યો.+ તે ઇસ્સાખાર કુળનો હતો અને એફ્રાઈમના પહાડી વિસ્તારમાં આવેલા શામીરમાં રહેતો હતો.
૨ તેણે ૨૩ વર્ષ સુધી ઇઝરાયેલનો ન્યાય કર્યો. પછી તેનું મરણ થયું અને તેને શામીરમાં દફનાવવામાં આવ્યો.
૩ તોલા પછી ગિલયાદનો યાઈર ઊભો થયો, જેણે ૨૨ વર્ષ સુધી ઇઝરાયેલનો ન્યાય કર્યો.
૪ તેને ૩૦ દીકરાઓ હતા, જેઓ ૩૦ ગધેડાં પર સવારી કરતા. તેઓ પાસે ગિલયાદ દેશમાં ૩૦ શહેરો હતાં, જે આજ સુધી હાવ્વોથ-યાઈર+ કહેવાય છે.
૫ એ પછી યાઈર મરણ પામ્યો અને તેને કામોનમાં દફનાવવામાં આવ્યો.
૬ યહોવાની નજરમાં જે ખરાબ હતું, એ ઇઝરાયેલીઓ ફરીથી કરવા લાગ્યા.+ તેઓ બઆલ દેવો,+ આશ્તોરેથની મૂર્તિઓ, અરામના* દેવો, સિદોનના દેવો, મોઆબના દેવો,+ આમ્મોનીઓના દેવો+ અને પલિસ્તીઓના દેવોને+ ભજવા લાગ્યા. તેઓએ યહોવાને છોડી દીધા અને તેમની ભક્તિ કરી નહિ.
૭ તેથી ઇઝરાયેલીઓ પર યહોવાનો ક્રોધ સળગી ઊઠ્યો. તેમણે તેઓને પલિસ્તીઓ અને આમ્મોનીઓના હાથમાં સોંપી દીધા.+
૮ તેઓએ ઇઝરાયેલીઓને બહુ દુઃખી કર્યા અને તેઓ પર જુલમ ગુજાર્યો. તેઓએ ગિલયાદમાં રહેતા બધા ઇઝરાયેલીઓ પર ૧૮ વર્ષ સુધી અત્યાચાર કર્યો. ગિલયાદમાં યર્દનની પૂર્વ તરફનો એ વિસ્તાર એક સમયે અમોરીઓનો હતો.
૯ આમ્મોનીઓ યર્દન નદી પાર કરીને યહૂદા, બિન્યામીન અને એફ્રાઈમનાં કુળો સામે લડવા જતા. ઇઝરાયેલીઓ ભારે સંકટમાં આવી પડ્યા.
૧૦ ઇઝરાયેલીઓએ મદદ માટે યહોવાને પોકાર કર્યો:+ “હે ઈશ્વર, અમે તમારી વિરુદ્ધ પાપ કર્યું છે. અમે તમને છોડીને બઆલ દેવોની ભક્તિ કરી છે.”+
૧૧ યહોવાએ ઇઝરાયેલીઓને કહ્યું: “શું મેં તમને ઇજિપ્તના હાથમાંથી છોડાવ્યા ન હતા?+ અમોરીઓ,+ આમ્મોનીઓ, પલિસ્તીઓ,+
૧૨ સિદોનીઓ, અમાલેકીઓ અને મિદ્યાનીઓએ તમારા પર જુલમ કર્યો ત્યારે, શું મેં તમને બચાવ્યા ન હતા? તમે મને પોકારી ઊઠ્યા ત્યારે, મેં તેઓના પંજામાંથી તમને છોડાવ્યા હતા.
૧૩ પણ તમે મારાથી મોં ફેરવી લીધું અને બીજા દેવોની ભક્તિ કરવા લાગ્યા.+ હવે હું તમને બચાવવાનો નથી.+
૧૪ તમે જે દેવોને પસંદ કર્યા છે તેઓ પાસે જાઓ, તેઓ પાસે મદદ માંગો.+ તેઓને કહો કે તમને મુસીબતોમાંથી બચાવે.”+
૧૫ પણ ઇઝરાયેલીઓએ યહોવાને કહ્યું: “અમે પાપ કર્યું છે. તમને જે ઠીક લાગે એ કરો. મહેરબાની કરીને અમને આ વખતે બચાવી લો.”
૧૬ તેઓએ બીજા દેવોની મૂર્તિઓ ફેંકી દીધી અને યહોવાની ભક્તિ કરવા લાગ્યા.+ ઈશ્વરથી ઇઝરાયેલીઓનું દુઃખ જોઈ શકાયું નહિ.+
૧૭ સમય જતાં, આમ્મોનીઓ+ યુદ્ધ કરવા ભેગા થયા અને ગિલયાદમાં છાવણી નાખી. ઇઝરાયેલીઓએ ભેગા થઈને મિસ્પાહમાં છાવણી નાખી.
૧૮ ગિલયાદના લોકોએ અને આગેવાનોએ એકબીજાને કહ્યું: “આમ્મોનીઓ વિરુદ્ધ લડવા કોણ આગેવાની લેશે?+ જે આગેવાની લે, તે ગિલયાદના સર્વ લોકોનો મુખી બને.”
ફૂટનોટ
^ અથવા, “સિરિયાના.”
