મીખાહ ૬:૧-૧૬
૬ હે લોકો, યહોવાની વાત સાંભળો.
ઊભા થાઓ અને પર્વતો આગળ તમારી ફરિયાદ* રજૂ કરો,ડુંગરો તમારી ફરિયાદ સાંભળશે.+
૨ હે પર્વતો અને પૃથ્વીના અડગ પાયા,યહોવાનો મુકદ્દમો સાંભળો.+
યહોવાને પોતાના લોકો વિરુદ્ધ ફરિયાદ છે.
તે ઇઝરાયેલ સામે પોતાનો પક્ષ રજૂ કરશે અને પૂછશે:+
૩ “હે મારા લોકો, મેં એવું તો શું કર્યું છે?
મેં તમને શું દુઃખ આપ્યું છે?+
મારી વિરુદ્ધ જે કંઈ હોય એ કહી દો.
૪ મેં તમને ઇજિપ્ત* દેશમાંથી બહાર કાઢ્યા+અને ગુલામીના ઘરમાંથી છોડાવ્યા.+
મેં તમારી પાસે મૂસા, હારુન અને મરિયમને+ મોકલ્યાં.
૫ હે મારા લોકો, યાદ કરો, મોઆબના રાજા બાલાકે કેવું કાવતરું ઘડ્યું હતું,+અને બયોરના દીકરા બલામે તેને કેવો જવાબ આપ્યો હતો.+
શિટ્ટીમથી+ લઈને ગિલ્ગાલ+ સુધી શું બન્યું હતું એ યાદ કરો,જેથી તમે યહોવાનાં નેક કામ જાણી શકો.”
૬ શું લઈને હું યહોવા આગળ જઉં?
શું લઈને હું ઊંચે બિરાજનાર ઈશ્વરને નમન કરવા જઉં?
શું અગ્નિ-અર્પણ* લઈને તેમની આગળ જાઉં?
શું એક વર્ષના વાછરડાનું બલિદાન ચઢાવું?+
૭ શું યહોવા હજારો ઘેટાંથી ખુશ થશે?
શું તેલની લાખો નદીઓથી તે રાજી થશે?+
શું મારા અપરાધ* માટે મારા પ્રથમ જન્મેલા* દીકરાનું અર્પણ કરું?
શું મારા પાપ માટે મારા બાળકનો બલિ ચઢાવું?+
૮ હે મનુષ્ય, સારું શું છે, એ તેમણે તને જણાવ્યું છે.
તું ન્યાયથી* વર્તે,+ વફાદારીને વળગી રહે,*+
અને મર્યાદામાં રહીને+ તારા ઈશ્વર સાથે ચાલે,+એ સિવાય યહોવા તારી પાસે બીજું શું માંગે છે?
૯ યહોવા શહેરને પોકાર કરે છે,(સમજુ* માણસો તમારા* નામનો ડર રાખશે)
“સજાની સોટી પર અને સજા લાવનાર પર ધ્યાન આપો.”+
૧૦ શું દુષ્ટના ઘરમાં હજી પણ દુષ્ટતાથી મેળવેલી મિલકત છે?
શું તેની પાસે હજી પણ એવાં ખોટાં એફાહ માપ* છે, જેને ઈશ્વર ધિક્કારે છે?
૧૧ ખોટાં ત્રાજવાં અને પથ્થરનાં જૂઠાં વજનિયાં રાખીને,+શું હું નિર્દોષ* રહી શકું?
૧૨ તેના અમીર માણસો જોરજુલમ કરે છે,તેના રહેવાસીઓ જૂઠું બોલે છે.+
તેઓની જીભ કપટી વાતો કરે છે.+
૧૩ “એટલે હું તને સખત સજા કરીશ,+તારાં પાપોને લીધે હું તને ઉજ્જડ કરી દઈશ.
૧૪ તું ખાઈશ, પણ ધરાઈશ નહિ,તું ભૂખ્યો ને ભૂખ્યો જ રહીશ.+
તું તારી વસ્તુઓ સલામત જગ્યાએ લઈ જવાની કોશિશ કરીશ,પણ તું સફળ થઈશ નહિ.
અને જો તું સફળ થાય પણ ખરો,તો હું એ બધું દુશ્મનોના હાથમાં સોંપી દઈશ.
૧૫ તું બી વાવીશ, પણ પાક લણીશ નહિ.
તું જૈતૂનનાં ફળ ખૂંદીશ, પણ એનું તેલ વાપરી શકીશ નહિ.
તું નવો દ્રાક્ષદારૂ બનાવીશ, પણ એ પી શકીશ નહિ.+
૧૬ તું ઓમ્રીના નિયમો પાળે છે,આહાબ અને તેના વંશજો જેવાં કામો કરે છે.+
તું તેઓની સલાહ પ્રમાણે ચાલે છે.
એટલે હું તારા એવા હાલ કરીશ કે લોકો તને જોઈને ધ્રૂજી ઊઠશે.
લોકો સીટી વગાડીને શહેરના રહેવાસીઓની મજાક ઉડાવશે+અને તારે લોકોનાં મહેણાં સાંભળવાં પડશે.”+
ફૂટનોટ
^ અથવા, “મુકદ્દમો.”
^ અથવા, “મિસર.”
^ અથવા, “બંડ.”
^ અથવા, “કૃપાળુ બને અને પ્રેમમાં વફાદારી નિભાવે.” મૂળ, “અતૂટ પ્રેમને પ્રેમ કરે.”
^ અથવા, “સચ્ચાઈથી.”
^ અથવા, “વ્યવહારુ બુદ્ધિ ધરાવતા.”
^ મૂળ, “તેમના.”
^ વધારે માહિતી ખ-૧૪ જુઓ.
^ અથવા, “નૈતિક રીતે શુદ્ધ.”
