યર્મિયાનો વિલાપ ૫:૧-૨૨
૫ હે યહોવા, ધ્યાન આપો, અમારી કેવી દશા થઈ છે.
જુઓ, અમારું કેવું અપમાન થયું છે!+
૨ અમારો વારસો પારકાઓના હાથમાં ગયો છે, અમારાં ઘરો પરદેશીઓને સોંપવામાં આવ્યાં છે.+
૩ અમે અનાથ થયા છીએ, અમારા માથે પિતાનો હાથ રહ્યો નથી,* અમારી મા વિધવા થઈ છે.*+
૪ અમારું જ પાણી પીવા અમારે પૈસા આપવા પડે છે,+અમારાં જ લાકડાં માટે અમારે કિંમત ચૂકવવી પડે છે.
૫ પીછો કરનારાઓનો હાથ અમારા ગળા સુધી પહોંચી ગયો છે.
અમે થાકી ગયા છીએ, પણ અમને જરાય આરામ નથી.+
૬ અમારી ભૂખ દૂર કરવા અમે ઇજિપ્ત*+ અને આશ્શૂર આગળ હાથ ફેલાવ્યા છે.+
૭ અમારા બાપદાદાઓ તો ગયા, પણ તેઓનાં પાપની સજા અમારે ભોગવવી પડે છે.
૮ ચાકરો અમારા પર રાજ કરે છે, તેઓના હાથમાંથી અમને છોડાવનાર કોઈ નથી.
૯ વેરાન પ્રદેશમાં તલવારનો ખતરો છે, અમારે જીવના જોખમે રોટલી લાવવી પડે છે.+
૧૦ ભૂખની આગને લીધે અમારી ચામડી ધગધગતી ભઠ્ઠી જેવી થઈ ગઈ છે.+
૧૧ સિયોનમાં તેઓએ પરણેલી સ્ત્રીઓ પર બળાત્કાર કર્યો છે અને યહૂદાનાં શહેરોમાં કુંવારી છોકરીઓની આબરૂ લૂંટી છે.+
૧૨ શાસકોના હાથ બાંધીને તેઓને લટકાવવામાં આવ્યા છે+ અને વડીલોને કોઈ માન આપતું નથી.+
૧૩ યુવાનો ઘંટી ઊંચકે છે અને લાકડાંના ભારથી છોકરાઓ લથડિયાં ખાય છે.
૧૪ વડીલો હવે શહેરના દરવાજે ફરકતા નથી,+ યુવાનો હવે સંગીત વગાડતા નથી.+
૧૫ અમારા દિલની ખુશી ખોવાઈ ગઈ છે, અમારાં નાચ-ગાન વિલાપમાં ફેરવાઈ ગયાં છે.+
૧૬ અમારા માથા પરથી મુગટ પડી ગયો છે.
ધિક્કાર છે અમને, કેમ કે અમે પાપ કર્યું છે!
૧૭ એ બધાને લીધે અમારું દિલ રિબાય છે,+અમારી આંખો ઝાંખી પડી ગઈ છે.+
૧૮ સિયોન પર્વત ઉજ્જડ થઈ ગયો છે,+ એ શિયાળોનો અડ્ડો બની ગયો છે.
૧૯ પણ હે યહોવા, તમે કાયમ માટે તમારી રાજગાદી પર બિરાજો છો.
તમારી રાજગાદી પેઢી દર પેઢી રહે છે.+
૨૦ તમે કેમ અમને કાયમ માટે ભૂલી ગયા છો?
કેમ આટલા લાંબા સમયથી અમને ત્યજી દીધા છે?+
૨૧ હે યહોવા, અમને તમારી પાસે બોલાવો અને અમે રાજીખુશીથી તમારી પાસે પાછા આવીશું.+
અમારા જૂના દિવસો પાછા આપો, બધું પહેલાંના જેવું કરી દો.+
૨૨ પણ તમે તો અમને ઠોકર મારી દીધી છે.
તમે હજીયે અમારા પર ખૂબ ગુસ્સે ભરાયેલા છો.+
