યર્મિયા ૩૦:૧-૨૪
-
ફરી સ્થાપના અને સાજા કરવાનાં વચનો (૧-૨૪)
૩૦ યહોવાનો આ સંદેશો યર્મિયાને મળ્યો:
૨ “ઇઝરાયેલના ઈશ્વર યહોવા કહે છે, ‘હું તને જે સંદેશો આપું, એનો એકેએક શબ્દ તું પુસ્તકમાં લખી લે.
૩ યહોવા કહે છે, “જો! એવા દિવસો આવી રહ્યા છે, જ્યારે હું ઇઝરાયેલ અને યહૂદાના મારા લોકોને ભેગા કરીશ, જેઓ ગુલામીમાં ગયા છે.”+ યહોવા કહે છે, “હું તેઓને એ દેશમાં પાછા લાવીશ, જે મેં તેઓના બાપદાદાઓને આપ્યો હતો. તેઓ ફરીથી એ દેશનો કબજો મેળવશે.”’”+
૪ યહોવાએ ઇઝરાયેલ અને યહૂદાને આ સંદેશો આપ્યો:
૫ યહોવા કહે છે,“લોકોની ભયાનક ચીસો સંભળાય છે,ચારે બાજુ આતંક છે, ક્યાંય શાંતિ નથી.
૬ જઈને પૂછો, શું કોઈ પુરુષ બાળકને જન્મ આપી શકે?
તો પછી બાળકને જન્મ આપનાર સ્ત્રીની જેમ,+
દરેક બળવાન પુરુષ કેમ પેટ પકડીને ઊભો છે?
દરેકનો ચહેરો કેમ ફિક્કો પડી ગયો છે?
૭ અફસોસ! એ દિવસ ખૂબ ભયંકર છે.+
આજ સુધી એવો દિવસ આવ્યો નથી.
યાકૂબ માટે એ આફતનો સમય છે,પણ તેને બચાવવામાં આવશે.”
૮ સૈન્યોના ઈશ્વર યહોવા કહે છે, “એ દિવસે હું તેઓની ગરદન પરથી ઝૂંસરી ભાંગી નાખીશ. હું તેઓનાં બંધનોના* બે ટુકડા કરી નાખીશ. પરદેશીઓ* ફરી કદી તેઓને* પોતાના ગુલામ નહિ બનાવે.
૯ તેઓ પોતાના ઈશ્વર યહોવાની ભક્તિ કરશે. તેઓ પોતાના રાજા દાઉદની સેવા કરશે, જેને હું તેઓ માટે ઊભો કરીશ.”+
૧૦ યહોવા કહે છે, “મારા સેવક યાકૂબ, તું ગભરાઈશ નહિ.
ઇઝરાયેલ, તું જરાય ડરીશ નહિ.+
હું તને દૂર દેશમાંથી છોડાવીશ,હું તારા વંશજને ગુલામીના દેશમાંથી બચાવીશ.+
યાકૂબ પાછો આવશે અને સુખ-શાંતિમાં રહેશે,તેને કોઈ હેરાન કરશે નહિ, તેને કોઈ ડરાવશે નહિ.”+
૧૧ યહોવા કહે છે, “હું તારી સાથે છું, હું તને બચાવીશ.
મેં તને જે દેશોમાં વિખેરી નાખ્યો છે, એ દેશોનો હું નાશ કરીશ,+પણ હું તારો નાશ નહિ કરું.+
હું તને શિક્ષા તો કરીશ,* પણ જેટલી જરૂરી છે એટલી જ કરીશ,હું તને સજા કર્યા વગર નહિ છોડું.”+
૧૨ યહોવા કહે છે,“તારા* ઘાનો કોઈ ઇલાજ નથી.+
તારો જખમ રુઝાય એવો નથી.
૧૩ તારો પક્ષ લેનાર કોઈ નથી,તારું ગૂમડું મટે એવું નથી.
એની કોઈ દવા નથી.
૧૪ તારા પ્રેમીઓ તને ભૂલી ગયા છે.+
તેઓ તને શોધવા આવતા નથી.
તારા મોટા અપરાધ અને ઘણાં પાપને લીધે+મેં દુશ્મનની જેમ તારા પર પ્રહાર કર્યો છે,+ક્રૂર માણસની જેમ તને સજા કરી છે.
૧૫ તારા ઘાને લીધે તું કેમ બૂમો પાડે છે?
તારી પીડાનો કોઈ ઇલાજ નથી!
તારા મોટા અપરાધ અને ઘણાં પાપને લીધે+મેં તારા એવા હાલ કર્યા છે.
૧૬ એટલે જેઓ તારો નાશ કરે છે, તેઓનો નાશ થશે,+તારા બધા દુશ્મનો પણ ગુલામીમાં જશે.+
જેઓ તને લૂંટે છે, તેઓને લૂંટી લેવામાં આવશે,જેઓ તારી મિલકત છીનવે છે, તેઓની મિલકત છીનવી લેવામાં આવશે.”+
૧૭ યહોવા કહે છે,“ભલે તેઓ કહે તું ત્યજી દેવાઈ છે અને‘ઓ સિયોન, તને પૂછનાર કોઈ નથી,’+પણ હું તને સાજી કરીશ અને તારા જખમ રુઝાવીશ.”+
૧૮ યહોવા કહે છે,“હું યાકૂબના તંબુઓમાં જઈશ અને એના ગુલામોને ભેગા કરીશ,+હું તેના મંડપોને* દયા બતાવીશ.
શહેર એની ટેકરી પર ફરી બાંધવામાં આવશે,+કિલ્લો એની જગ્યાએ ફરી ઊભો કરવામાં આવશે.
૧૯ તેઓમાં આભાર-સ્તુતિનાં ગીતોનો અને હસવાનો અવાજ સંભળાશે.+
હું તેઓની સંખ્યા વધારીશ, તેઓ ઓછા થશે નહિ,+હું તેઓની સંખ્યા અગણિત કરીશ,* તેઓ ઘટશે નહિ.+
૨૦ તેના દીકરાઓ અગાઉની જેમ સમૃદ્ધ થશે,મારી આગળ તેઓ બળવાન પ્રજા બનશે.+
તેના પર જુલમ કરનારને હું સજા કરીશ.+
૨૧ તેના જ લોકોમાંથી તેનો આગેવાન આવશે,તેનામાંથી જ તેનો શાસક આવશે.
હું તેને મારી પાસે બોલાવીશ અને તે મારી પાસે આવશે.”
“નહિતર મારી પાસે આવવાની હિંમત કોણ કરી શકે?” એવું યહોવા કહે છે.
૨૨ “તમે મારા લોકો બનશો+ અને હું તમારો ઈશ્વર બનીશ.”+
૨૩ જુઓ! યહોવાના ક્રોધનું વાવાઝોડું જોરથી ફૂંકાશે.+
વિનાશક વંટોળિયાની જેમ એ દુષ્ટોના માથા પર ઝઝૂમશે.
૨૪ જ્યાં સુધી યહોવા પોતાના દિલની ઇચ્છા અમલમાં નહિ લાવે અને એને પૂરી નહિ કરે,+ત્યાં સુધી તેમનો ભયંકર ગુસ્સો શાંત નહિ પડે.
છેલ્લા દિવસોમાં તમે એ વાત સમજશો.+
ફૂટનોટ
^ અથવા, “જોતરોના.”
^ અથવા, “અજાણ્યાઓ.”
^ અથવા, “તેને.”
^ અથવા, “સુધારીશ; શિસ્ત આપીશ.”
^ એ સિયોન નગરીને બતાવે છે.
^ અથવા કદાચ, “હું તેઓને મહિમાવંત કરીશ.”
