યર્મિયા ૪૮:૧-૪૭
-
મોઆબ વિરુદ્ધ ભવિષ્યવાણી (૧-૪૭)
૪૮ મોઆબ+ વિશે ઇઝરાયેલના ઈશ્વર, સૈન્યોના ઈશ્વર યહોવા કહે છે:
“નબોને+ અફસોસ, કેમ કે તેનો નાશ થયો છે!
કિર્યાથાઈમ+ શરમમાં મુકાયું છે અને તેને કબજે કરવામાં આવ્યું છે.
સલામત આશરો* શરમમાં મુકાયો છે, તેના ચૂરેચૂરા થઈ ગયા છે.+
૨ હવે કોઈ મોઆબના વખાણ કરશે નહિ.
દુશ્મનોએ તેને* પાડી નાખવા હેશ્બોનમાં+ કાવતરું ઘડ્યું છે.
તેઓ કહે છે: ‘ચાલો, તેને પ્રજાઓમાંથી ભૂંસી નાખીએ.’
હે માદમેન, તું પણ ચૂપ રહે,કેમ કે તલવાર તારી પાછળ પાછળ આવે છે.
૩ હોરોનાયિમ+ પ્રદેશથી મોટો પોકાર સંભળાય છે,કેમ કે તેનો વિનાશ થયો છે, એ પડી ભાંગ્યું છે.
૪ મોઆબ બરબાદ થઈ છે,તેનાં બાળકો રડારોળ કરે છે.
૫ તેઓ રડતાં રડતાં લૂહીથના ચઢાણ પર ચઢે છે.
હોરોનાયિમના ઢોળાવ પરથી ઊતરતી વખતે વિનાશનો હાહાકાર તેઓના કાને પડે છે.+
૬ ભાગો, તમારો જીવ બચાવીને ભાગો!
વેરાન પ્રદેશમાં ગંધતરુના* ઝાડ જેવા થાઓ.
૭ હે મોઆબ, તું તારાં કામો અને તારા ખજાના પર ભરોસો રાખે છે,એટલે તને પણ કબજે કરવામાં આવશે.
કમોશ*+ દેવ પણ ગુલામીમાં જશે,તેની સાથે તેના યાજકો અને અધિકારીઓ પણ જશે.
૮ દરેક શહેર પર વિનાશ કરનાર ચઢી આવશે,એકેય શહેર બચશે નહિ.+
યહોવાએ કહ્યું છે તેમ, ખીણનો* નાશ થશેઅને સપાટ જમીન નષ્ટ થઈ જશે.
૯ મોઆબ માટે રસ્તા પર નિશાની ઊભી કરો,કેમ કે તેનાં શહેરો ઉજ્જડ થશે ત્યારે તેના લોકો નાસી જશે.
એ શહેરોના એવા હાલ થશે કે લોકો એને જોઈને ધ્રૂજી ઊઠશે,એમાં એકેય રહેવાસી બચશે નહિ.+
૧૦ જે માણસ યહોવાનું કામ અધૂરા મને કરે છે, તેના પર શ્રાપ ઊતરી આવે!
જે માણસ કતલ કરવાથી પોતાની તલવાર પાછી રાખે છે, તેના પર શ્રાપ ઊતરી આવે!
૧૧ મોઆબીઓ પોતાના બાળપણથી નિરાંતે રહ્યા છે.
તેઓ તળિયે ઠરી ગયેલા દ્રાક્ષદારૂના રગડા જેવા છે.
તેઓને એક વાસણમાંથી બીજા વાસણમાં રેડવામાં આવ્યા નથીઅને તેઓ ક્યારેય ગુલામીમાં ગયા નથી.
એટલે જ તેઓનો સ્વાદ એવો ને એવો છેઅને તેઓની સુગંધ બદલાઈ નથી.
૧૨ “યહોવા કહે છે, ‘જો! એવા દિવસો આવી રહ્યા છે, જ્યારે તેઓને ઉલટાવી નાખવા હું માણસો મોકલીશ. એ માણસો તેઓને ઉલટાવી નાખશે, તેઓનાં વાસણો ખાલી કરી દેશે અને તેઓની મોટી મોટી બરણીઓના ચૂરેચૂરા કરી નાખશે.
૧૩ જેમ બેથેલ પર ભરોસો કરીને ઇઝરાયેલીઓ શરમમાં મુકાયા હતા, તેમ મોઆબીઓ કમોશને લીધે શરમમાં મુકાશે.+
૧૪ તમે કહો છો, “અમે શૂરવીર યોદ્ધાઓ છીએ, અમે યુદ્ધ માટે તૈયાર છીએ.” આવું કહેવાની તમારી હિંમત કેવી રીતે થઈ?’+
૧૫ જેમનું નામ સૈન્યોના ઈશ્વર યહોવા છે, એ રાજા કહે છે:+
‘મોઆબનો નાશ થયો છે.
દુશ્મનો તેનાં શહેરોમાં ઘૂસી ગયા છે.+
તેના શક્તિશાળી માણસોની કતલ થઈ છે.’+
૧૬ બહુ જલદી મોઆબીઓ પર આફત આવી રહી છે.
તેઓની બરબાદી હાથવેંતમાં છે.+
૧૭ તેઓની આસપાસના લોકો અને તેઓનું નામ જાણનારાઓ
તેઓને જરૂર સાંત્વના આપશે.
તેઓને કહો: ‘હાય હાય! બળવાન લાકડી અને સુંદરતાની છડી તૂટી ગઈ!’
૧૮ હે દીબોનમાં+ રહેતી દીકરી,તું મહિમાના શિખરથી નીચે ઊતર અને તરસી* બેસી રહે,કેમ કે મોઆબનો નાશ કરનાર તારા પર ચઢી આવ્યો છે,તે તારી કોટવાળી જગ્યાઓને ઉજ્જડ કરી દેશે.+
૧૯ અરોએરમાં+ રહેનારી, તું રસ્તાને કિનારે ઊભી રહે અને નજર કર.
નાસી જનાર પુરુષ અને છટકી જનાર સ્ત્રીને પૂછ, ‘શું થયું છે?’
૨૦ મોઆબ શરમમાં મુકાઈ છે, તેના પર ડર છવાઈ ગયો છે.
વિલાપ કરો અને મોટેથી રડો.
આર્નોનમાં+ જાહેર કરો કે મોઆબનો નાશ થયો છે.
૨૧ “સપાટ વિસ્તારની આ જગ્યાઓ વિરુદ્ધ ન્યાયચુકાદો જાહેર થયો છે:+ હોલોન, યાહાસ,+ મેફાઆથ,+
૨૨ દીબોન,+ નબો,+ બેથ-દિબ્લાથાઈમ,
૨૩ કિર્યાથાઈમ,+ બેથ-ગામૂલ, બેથ-મેઓન,+
૨૪ કરીયોથ,+ બોસરાહ અને મોઆબનાં બધાં શહેરો વિરુદ્ધ, પછી ભલે એ દૂર હોય કે નજીક.
૨૫ યહોવા કહે છે, ‘મોઆબની તાકાત* તોડી નાખવામાં આવી છે,તેનો હાથ ભાંગી નાખવામાં આવ્યો છે.
૨૬ તેને દારૂ પિવડાવીને ચકચૂર કરો,+ કેમ કે તેણે યહોવા વિરુદ્ધ બડાઈ મારી છે.+
મોઆબ પોતાની ઊલટીમાં આળોટે છે,તેની મજાક ઉડાવવામાં આવે છે.
૨૭ શું તેં ઇઝરાયેલની મજાક ઉડાવી ન હતી?+
શું ઇઝરાયેલ ચોરો સાથે પકડાયો હતો?
તો તેં કેમ માથું હલાવ્યું અને તેની નિંદા કરી?
૨૮ મોઆબના રહેવાસીઓ, શહેરો છોડી દો અને ખડક પર રહેવા જાઓ.
સાંકડી ખીણને કિનારે પોતાનો માળો બાંધતા કબૂતર જેવા થાઓ.’”
૨૯ “અમે મોઆબના ઘમંડ વિશે સાંભળ્યું છે, તે બહુ માથાભારે છે.
અમે તેના અહંકાર, ગર્વ, અભિમાન અને તેના હૃદયની ઉદ્ધતાઈ વિશે સાંભળ્યું છે.”+
૩૦ “યહોવા કહે છે, ‘હું તેનો ગુસ્સો જાણું છું.
તેની બધી ડંફાસો ખોટી છે.
તેઓ કંઈ કરી નહિ શકે.
૩૧ એટલે જ હું મોઆબ માટે વિલાપ કરીશ.
હું આખા મોઆબ માટે પોક મૂકીને રડીશ.
હું કીર-હેરેસના માણસો માટે શોક કરીશ.+
૩૨ હે સિબ્માહના+ દ્રાક્ષાવેલા,હું યાઝેર+ કરતાં તારા માટે વધારે વિલાપ કરીશ.
તારી ઘટાદાર ડાળીઓ સમુદ્રને પેલે પાર સુધી ફેલાઈ છે.
સમુદ્ર સુધી, હા, યાઝેર સુધી એ પહોંચી છે.
તારાં ઉનાળાનાં ફળ પર અને દ્રાક્ષોની ફસલ પરવિનાશ કરનાર તૂટી પડ્યો છે.+
૩૩ વાડીમાંથી અને મોઆબ દેશમાંથીઆનંદ-ઉલ્લાસ દૂર કરવામાં આવ્યો છે.+
મેં દ્રાક્ષાકુંડમાંથી દ્રાક્ષદારૂને વહેતો બંધ કર્યો છે.
હવે કોઈ આનંદના પોકાર સાથે દ્રાક્ષો ખૂંદશે નહિ,પોકાર તો થશે, પણ એ આનંદનો નહિ હોય.’”+
૩૪ “‘હેશ્બોનથી+ એલઆલેહ+ સુધી ચીસો સંભળાય છે.
તેઓના બૂમબરાડા છેક યાહાસ+ સુધી સંભળાય છે,સોઆરથી હોરોનાયિમ+ અને એગ્લાથ-શલીશિયા સુધી સંભળાય છે.
નિમ્રીમનું પાણી પણ સુકાઈ ગયું છે.’+
૩૫ યહોવા કહે છે, ‘ભક્તિ-સ્થળ પર અર્પણ ચઢાવનારનોઅને પોતાના દેવને બલિદાન ચઢાવનારનોહું મોઆબમાંથી નાશ કરીશ.
૩૬ વાંસળીની* જેમ મારું દિલ મોઆબ માટે વિલાપ કરશે,+વાંસળીની* જેમ મારું દિલ કીર-હેરેસના માણસો માટે વિલાપ કરશે.
કેમ કે તેણે મેળવેલી સંપત્તિનો નાશ થશે.
૩૭ દરેકનું માથું મૂંડાયેલું છે.+
દરેકની દાઢી બાજુએથી* મૂંડેલી છે.
દરેકના હાથ પર કાપા છે+અને દરેકની કમરે કંતાન વીંટાળેલું છે!’”+
૩૮ “‘મોઆબનાં બધાં ધાબાં પરઅને તેના બધા ચોકમાંવિલાપ સિવાય બીજું કંઈ સંભળાતું નથી.
કેમ કે નકામી બરણીની જેમમેં મોઆબને તોડી નાખ્યો છે,’ એવું યહોવા કહે છે.
૩૯ ‘તે કેવો ડરી ગયો છે! વિલાપ કરો!
મોઆબે શરમમાં પોતાની પીઠ ફેરવી છે.
મોઆબની મજાક ઉડાવવામાં આવે છે.
તેના હાલ જોઈને આજુબાજુના લોકોમાં ડર છવાઈ ગયો છે.’”
૪૦ “યહોવા કહે છે:
‘જુઓ! જેમ ગરુડ પોતાના શિકાર પર તરાપ મારે છે,+
તેમ દુશ્મન પોતાની પાંખો ફેલાવીને મોઆબ પર તરાપ મારશે.+
૪૧ નગરો જીતી લેવામાં આવશેતેના કિલ્લાઓ કબજે કરવામાં આવશે.
જેમ બાળકને જન્મ આપતી સ્ત્રીનું દિલ ડરથી ધ્રૂજી ઊઠે છે,તેમ એ દિવસે મોઆબના યોદ્ધાઓનું દિલ ધ્રૂજી ઊઠશે.’”
૪૨ “‘મોઆબનો નાશ થશે, તેને પ્રજાઓમાંથી ભૂંસી નાખવામાં આવશે,+કેમ કે તેણે યહોવા વિરુદ્ધ બડાઈ મારી છે.+
૪૩ હે મોઆબના રહેવાસી,તારી આગળ ડર, ખાડો અને ફાંદો છે,’ એવું યહોવા કહે છે.
૪૪ ‘જે કોઈ ડરથી નાસી જશે, તે ખાડામાં પડશે,જે કોઈ ખાડામાંથી નીકળશે તે ફાંદામાં ફસાશે.’
‘કેમ કે હું ઠરાવેલા વર્ષે મોઆબને સજા કરીશ,’ એવું યહોવા કહે છે.
૪૫ ‘નાસી જનારાઓ હેશ્બોનના પડછાયામાં લાચાર ઊભા છે.
હેશ્બોનથી અગ્નિ આવશેઅને સીહોનથી જ્વાળાઓ નીકળશે.+
એ મોઆબના કપાળનેઅને હિંસાના દીકરાઓની ખોપરીઓને બાળી નાખશે.’+
૪૬ ‘હે મોઆબ, અફસોસ છે તને!
કમોશના લોકોનો નાશ થયો છે.+
તારા દીકરાઓને ગુલામ બનાવીને લઈ જવામાં આવ્યા છેઅને તારી દીકરીઓ ગુલામીમાં ગઈ છે.+
૪૭ પણ છેલ્લા દિવસોમાં હું મોઆબના ગુલામોને ભેગા કરીશ,’ એવું યહોવા કહે છે.
‘અહીં મોઆબ વિશેનો ન્યાયચુકાદો પૂરો થાય છે.’”+
ફૂટનોટ
^ અથવા, “ગઢ.”
^ હિબ્રૂ લખાણમાં મોઆબ માટે અહીં વપરાયેલું સર્વનામ સ્ત્રીલિંગ છે.
^ દેવદારની જાતનું એક ઝાડ.
^ મોઆબીઓનો મુખ્ય દેવ.
^ અથવા, “નીચાણ પ્રદેશનો.”
^ અથવા કદાચ, “સૂકી જમીન પર.”
^ મૂળ, “શિંગ.” શબ્દસૂચિમાં “શિંગ” જુઓ.
^ એટલે કે, મરણ વખતે વિલાપ કરવા વગાડવામાં આવતી વાંસળી.
^ એટલે કે, મરણ વખતે વિલાપ કરવા વગાડવામાં આવતી વાંસળી.
^ અથવા, “દાઢીની કલમ; થોભિયા.”