યશાયા ૧૩:૧-૨૨
૧૩ બાબેલોનના ન્યાયચુકાદા વિશે+ આમોઝના દીકરા યશાયાએ+ એક દર્શન જોયું. એમાં આવો સંદેશો હતો:
૨ “ઉજ્જડ પહાડ પર લશ્કર માટે નિશાની* ઊભી કરો.+
હાથથી ઇશારો કરો અને સૈનિકોને બોલાવો,જેથી તેઓ અમીરોના દરવાજાઓમાં ઘૂસી જાય.
૩ મેં મારા પસંદ કરેલા લોકોને* આવવાનું ફરમાન કર્યું છે.+
મેં શૂરવીર યોદ્ધાઓને મારો ગુસ્સો ઠાલવવાનો હુકમ કર્યો છે,તેઓ બડાઈ હાંકીને ખુશ થાય છે.
૪ ઘણા લોકોના ઘોંઘાટ જેવોપર્વતો પરના ટોળાનો અવાજ સાંભળો!
ભેગી થયેલી પ્રજાઓ+અને રાજ્યોનો શોરબકોર સાંભળો!
સૈન્યોના ઈશ્વર યહોવા લડાઈ માટે લશ્કર ભેગું કરે છે.+
૫ તેઓ દૂર દેશથી,હા, પૃથ્વીના* છેડાથી આવે છે.+
યહોવા અને તેમના ક્રોધનાં હથિયારોઆખી પૃથ્વીને ખેદાન-મેદાન કરવા આવે છે.+
૬ પોક મૂકીને રડો, યહોવાનો દિવસ પાસે છે!
સર્વશક્તિમાન પાસેથી વિનાશનો દિવસ આવે છે.+
૭ એટલે દરેક હાથ ઢીલો પડી જશે,દરેક માણસનું દિલ બીકથી કાંપી ઊઠશે.+
૮ લોકો ડરના માર્યા થરથર કાંપશે.+
બાળકને જન્મ આપતી સ્ત્રીની જેમ,વેદના અને દુઃખથી તેઓ પીડાશે.
તેઓ નવાઈ પામીને એકબીજા સામે તાકી રહેશે.
તેઓના ચહેરા પર ચિંતા છવાઈ જશે.
૯ જુઓ! યહોવાનો દિવસ આવે છે,રોષ અને ગુસ્સાથી ભભૂકતો ક્રૂર દિવસ,દેશને ડરામણો બનાવતો દિવસ,+એમાંના પાપીઓનો સંહાર કરતો દિવસ.
૧૦ આકાશનાં તારાઓ અને નક્ષત્રો*+પ્રકાશ પાથરશે નહિ.
સૂર્ય ઊગે તોપણ અજવાળું આપશે નહિ,ચંદ્ર પણ રોશની આપશે નહિ.
૧૧ હું પૃથ્વીના લોકો પાસેથી તેઓની બૂરાઈનોઅને દુષ્ટ માણસો પાસેથી તેઓના અપરાધનો હિસાબ માંગીશ.+
હું ઘમંડીઓનું ઘમંડ તોડી પાડીશઅને જુલમીઓનું અભિમાન ઉતારી નાખીશ.+
૧૨ હું એમ કરીશ કે ચોખ્ખા સોના કરતાં,હા, ઓફીરના* સોના+ કરતાં મનુષ્યોની વધારે અછત પડશે.+
૧૩ હું સૈન્યોનો ઈશ્વર યહોવા, આકાશને ધ્રુજાવી દઈશ.
મારા ધગધગતા કોપને દિવસે,મારા ક્રોધથી ધરતીને એની જગ્યાએથી હલાવી દઈશ.+
૧૪ શિકારીથી ભાગતી હરણીની જેમ અને પાળક વગરનાં ઘેટાંની જેમ,તેઓ પોતાના લોકો પાસે પાછા ફરશે,તેઓ પોતાના દેશમાં નાસી જશે.+
૧૫ જે કોઈ મળી આવશે, તેને વીંધી નાખવામાં આવશે.
જે કોઈ પકડાઈ જશે, તેને તલવારથી રહેંસી નાખવામાં આવશે.+
૧૬ તેઓની નજર આગળ તેઓનાં બાળકોને પછાડીને મારી નાખવામાં આવશે.+
તેઓનાં ઘરો લૂંટી લેવામાં આવશે,તેઓની પત્નીઓ પર બળાત્કાર થશે.
૧૭ હું તેઓની વિરુદ્ધ માદીઓને ઊભા કરીશ,+જેઓને મન ચાંદી નકામી છે,જેઓને સોનાની કંઈ પડી નથી.
૧૮ તેઓનાં ધનુષ્યો યુવાનોને વીંધી નાખશે.+
તેઓ બાળકો પર રહેમ કરશે નહિકે છોકરાઓ પર દયા બતાવશે નહિ.
૧૯ બાબેલોન બધાં રાજ્યોમાં સૌથી ભવ્ય છે,*+
ખાલદીઓની* શોભા અને તેઓનું ગૌરવ છે.+
પણ એના હાલ સદોમ અને ગમોરાહ જેવા થશે, જેઓનો ઈશ્વરે વિનાશ કર્યો હતો.+
૨૦ એમાં ફરી કદી વસ્તી થશે નહિ,પેઢી દર પેઢી એમાં કોઈ રહેશે નહિ.+
કોઈ અરબી માણસ ત્યાં તંબુ બાંધશે નહિ,કોઈ ઘેટાંપાળક પોતાનાં ઘેટાંને ત્યાં લઈ જશે નહિ.
૨૧ રણનાં જાનવરો એમાં બેસશે,તેઓનાં ઘરો ઘુવડોનું રહેઠાણ બની જશે.
ત્યાં શાહમૃગો રહેવાં લાગશે+અને જંગલી બકરા* કૂદાકૂદ કરશે.
૨૨ એની હવેલીઓમાં પ્રાણીઓ ભૂંકશે.
ભવ્ય મહેલોમાં શિયાળો રડશે.
એનો સમય પાકી ગયો છે, એ ઘણા દિવસ ટકશે નહિ.”+
ફૂટનોટ
^ અથવા, “નિશાનીનો થાંભલો.”
^ મૂળ, “મારા પવિત્ર કરેલાઓને.”
^ મૂળ, “આકાશના.”
^ હિબ્રૂ, કેસીલ. એ કદાચ મૃગશીર્ષ અને એની આસપાસનાં નક્ષત્રોને બતાવે છે.
^ સૌથી સારા સોના માટે જાણીતી જગ્યા.
^ અથવા, “શાનદાર છે.”
^ અથવા કદાચ, “બકરા જેવા દુષ્ટ દૂતો.”
