રોમનોને પત્ર ૧૨:૧-૨૧
૧૨ ભાઈઓ, ઈશ્વરે તમને કરુણા બતાવી છે, એટલે હું તમને વિનંતી કરું છું કે પોતાના શરીરનું જીવતું, પવિત્ર+ અને ઈશ્વરને પસંદ હોય એવું અર્પણ કરો.+ તમારી સમજશક્તિનો ઉપયોગ કરીને ઈશ્વરની પવિત્ર સેવા કરો.+
૨ આ દુનિયાની* અસર તમારા પર ન થવા દો.* પણ ઈશ્વરને તમારા વિચારોમાં ફેરફાર કરવા દો, જેથી તમારું મન પૂરેપૂરું બદલાઈ જાય+ અને તમે ઈશ્વરની સારી, પસંદ પડે એવી અને સંપૂર્ણ ઇચ્છા પારખી શકો.*+
૩ મને અપાયેલી અપાર કૃપાથી હું તમને બધાને કહું છું કે પોતે કંઈક છો એમ ન વિચારો.+ પણ સમજુ બનો અને ઈશ્વરે તમને જેટલી શ્રદ્ધા આપી છે, એ પ્રમાણે તમે પોતાનો ન્યાય કરો.+
૪ આપણા શરીરમાં ઘણાં અંગો છે,+ પણ બધાનું કામ એકસરખું હોતું નથી.
૫ એવી જ રીતે, આપણે ઘણા હોવા છતાં, ખ્રિસ્ત સાથે એકતામાં એક શરીર છીએ અને એકબીજા સાથે જોડાયેલાં અંગો છીએ.+
૬ ઈશ્વરે આપણને અપાર કૃપાને આધારે જુદી જુદી ભેટો આપી છે.+ એટલે જો ભવિષ્યવાણી કરવાની ભેટ હોય, તો પોતાની શ્રદ્ધા પ્રમાણે ભવિષ્યવાણી કરીએ.
૭ જો સેવા કરવાની ભેટ હોય, તો એ સેવામાં લાગુ રહેવા બનતું બધું કરીએ. જો શીખવવાની ભેટ હોય, તો સારી રીતે શીખવવા મહેનત કરીએ.+
૮ જો ઉત્તેજન* આપવાની ભેટ હોય, તો ઉત્તેજન આપતા રહીએ.+ જો વહેંચી આપવાની* ભેટ હોય, તો ઉદારતાથી વહેંચી આપીએ.+ જે આગેવાની લેતો હોય, તે પૂરી ધગશથી* એમ કરે.+ જે દયા બતાવતો હોય, તે રાજીખુશીથી એમ કરે.+
૯ તમારો પ્રેમ ઢોંગ વગરનો હોય.+ જે ખરાબ છે એને ધિક્કારો,+ જે સારું છે એને વળગી રહો.
૧૦ ભાઈઓની જેમ એકબીજાને પ્રેમ અને હૂંફ બતાવો. એકબીજાને માન આપવામાં પહેલ કરો.+
૧૧ મહેનતુ* બનો, આળસુ નહિ.+ પવિત્ર શક્તિથી જોશીલા બનો.+ પૂરા દિલથી યહોવાની* સેવા કરો.+
૧૨ આશાને લીધે આનંદ કરો. મુસીબતો આવે ત્યારે ધીરજથી સહન કરો.+ પ્રાર્થનામાં લાગુ રહો.+
૧૩ ભાઈ-બહેનોની* જરૂરિયાત પ્રમાણે તેઓને મદદ કરો.+ મહેમાનગતિ બતાવતા રહો.+
૧૪ જેઓ તમારી સતાવણી કરે છે, તેઓને આશીર્વાદ આપો.+ હા, તેઓને આશીર્વાદ આપો, શ્રાપ નહિ.+
૧૫ આનંદ કરનારાઓની સાથે આનંદ કરો, રડનારાઓની સાથે રડો.
૧૬ જેવી પોતાની ચિંતા કરો છો, એવી બીજાઓની પણ ચિંતા કરો. પોતાના વિશે વધુ પડતું ન વિચારો,* પણ નમ્ર વલણ રાખો.+ પોતાને બીજાઓ કરતાં બહુ હોશિયાર ન ગણો.+
૧૭ બૂરાઈનો બદલો બૂરાઈથી ન વાળો.+ બધાની નજરમાં જે સારું છે એ પ્રમાણે વર્તો.
૧૮ જો શક્ય હોય તો બધા લોકો સાથે હળી-મળીને રહેવા તમારાથી બનતું બધું કરો.+
૧૯ વહાલાઓ, તમે બદલો લેશો નહિ, એ ઈશ્વરના હાથમાં છોડી દો. ખરાબ કામો પર ઈશ્વરને પોતાનો કોપ રેડવા દો.+ જેમ શાસ્ત્રમાં લખેલું છે: “યહોવા* કહે છે, ‘વેર વાળવું એ મારું કામ છે, હું બદલો લઈશ.’”+
૨૦ પણ “જો તારો દુશ્મન ભૂખ્યો હોય તો તેને ખવડાવ, જો તે તરસ્યો હોય તો તેને કંઈક પીવા આપ. આમ તું તેના માથા પર ધગધગતા અંગારાનો ઢગલો કરીશ.”*+
૨૧ બૂરાઈ સામે હારી ન જાઓ, પણ સારાથી બૂરાઈ પર જીત મેળવો.+
ફૂટનોટ
^ અથવા, “આ દુનિયાનું અનુકરણ કરવાનું બંધ કરો.”
^ અથવા, “સંપૂર્ણ ઇચ્છા શું છે એની પોતાને ખાતરી કરાવી શકો.”
^ અથવા, “શિખામણ.”
^ અથવા, “દાન આપવાની.”
^ અથવા, “ખંતથી.”
^ અથવા, “ખંતીલા; ઉત્સાહી.”
^ વધારે માહિતી ક-૫ જુઓ.
^ મૂળ, “પવિત્ર જનોની.”
^ અથવા, “ઘમંડી વિચારો ન કેળવો.”
^ વધારે માહિતી ક-૫ જુઓ.
^ એટલે કે, વ્યક્તિને નરમ પાડવી અને તેનું કઠણ દિલ પિગાળવું.
