લેવીય ૨:૧-૧૬
-
અનાજ-અર્પણ (૧-૧૬)
૨ “‘હવે જો કોઈ યહોવાને અનાજ-અર્પણ* ચઢાવે,+ તો એ મેંદાનું* હોય. તે મેંદા પર તેલ રેડે અને એના પર લોબાન* મૂકે.+
૨ પછી એ અર્પણ તે હારુનના દીકરાઓ, એટલે કે યાજકો પાસે લાવે. યાજક એમાંથી એક મુઠ્ઠી મેંદો, તેલ અને બધો લોબાન લે અને વેદી પર એને યાદગીરી* તરીકે આગમાં ચઢાવે.+ એ આગમાં ચઢાવવાનું અર્પણ છે, જેની સુવાસથી યહોવા ખુશ* થાય છે.
૩ અનાજ-અર્પણમાંથી જે કંઈ બાકી રહે એ હારુન અને તેના દીકરાઓનું થાય.+ એ ખૂબ પવિત્ર+ છે, કેમ કે યહોવા માટે આગમાં ચઢાવવાના અર્પણમાંથી એ લેવામાં આવ્યું છે.
૪ “‘જો તમે ભઠ્ઠીમાં પકવેલું અનાજ-અર્પણ ચઢાવો, તો એ મેંદાનું હોય. એ અર્પણ મેંદામાં તેલ નાખીને બનાવેલી બેખમીર* રોટલી* હોય અથવા તેલ ચોપડેલા બેખમીર પાપડ હોય.+
૫ “‘જો તમે તવા પર શેકેલું અનાજ-અર્પણ ચઢાવો,+ તો એ બેખમીર મેંદામાં તેલ નાખીને બનાવેલું હોય.
૬ એ અર્પણના ટુકડા કરીને એના પર તેલ રેડો.+ એ અનાજ-અર્પણ છે.
૭ “‘જો તમે કઢાઈમાં તળેલું અનાજ-અર્પણ ચઢાવો, તો એ મેંદા અને તેલનું બનેલું હોય.
૮ એ સામગ્રીથી તૈયાર કરેલું અનાજ-અર્પણ તમે યહોવા આગળ લાવો. એ યાજકને આપો અને તે એને વેદી પાસે લાવે.
૯ યાજક એ અનાજ-અર્પણમાંથી થોડું લે અને વેદી પર યાદગીરી તરીકે+ એને આગમાં ચઢાવે. એ આગમાં ચઢાવવાનું અર્પણ છે, જેની સુવાસથી યહોવા ખુશ થાય છે.+
૧૦ અનાજ-અર્પણમાંથી જે કંઈ બાકી રહે એ હારુન અને તેના દીકરાઓનું થાય. એ ખૂબ પવિત્ર છે, કેમ કે યહોવા માટે આગમાં ચઢાવેલા અર્પણમાંથી+ એ લેવામાં આવ્યું છે.
૧૧ “‘યહોવાને ચઢાવેલા અનાજ-અર્પણમાં ખમીરવાળું કંઈ ન હોય. યહોવા માટે આગમાં ચઢાવવામાં આવતા અર્પણમાં ખમીરવાળો લોટ*+ કે મધ ન હોય.
૧૨ “‘તમે એને પ્રથમ ફળ*+ તરીકે યહોવાને ચઢાવી શકો, પણ એને સુવાસ* માટે વેદી પર ન બાળો.
૧૩ “‘તમારા દરેક અનાજ-અર્પણમાં મીઠું મેળવેલું હોય. તમે અનાજ-અર્પણમાં મીઠું ઉમેરવાનું ન ભૂલો, કેમ કે મીઠું તમને ઈશ્વર સાથે કરેલા કરારની* યાદ અપાવે છે. તમે દરેક અર્પણ સાથે મીઠું ચઢાવો.+
૧૪ “‘જો તમે ફસલનો પહેલો પાક* અનાજ-અર્પણ તરીકે યહોવાને ચઢાવો, તો એ લીલાં કણસલાં હોય. એ કણસલાં આગમાં શેકેલાં હોય અને એના દાણા કકરા દળેલા હોય. એ પહેલા પાકનું+ અનાજ-અર્પણ છે.
૧૫ તમે એના પર તેલ રેડો અને એના પર લોબાન મૂકો. એ અનાજ-અર્પણ છે.
૧૬ યાજક એ દળેલું અનાજ, તેલ અને બધો લોબાન વેદી પર યાદગીરી તરીકે આગમાં ચઢાવે.+ એ યહોવા માટે આગમાં ચઢાવવાનું અર્પણ છે.
ફૂટનોટ
^ શબ્દસૂચિમાં “અનાજ-અર્પણ” જુઓ.
^ શબ્દસૂચિમાં “યાદગીરી-અર્પણ” જુઓ.
^ મૂળ, “શાંત.”
^ અથવા, “ખમીર વગરની.”
^ એ રોટલી ગોળ હતી અને વચ્ચે કાણું હતું.
^ ખમીરવાળો થોડો જૂનો લોટ. નવો લોટ ખમીરવાળો કરવા એને જૂના લોટ સાથે બાંધવામાં આવતો.
^ મૂળ, “શાંતિ.”
^ મૂળ, “પ્રથમ ફળ.”
