હબાક્કૂક ૩:૧-૧૯
૩ હબાક્કૂક પ્રબોધકની પ્રાર્થના, જે વિલાપગીતના* રૂપમાં છે:
૨ “હે યહોવા, મેં તમારા વિશે સાંભળ્યું છે.
હે યહોવા, તમારાં કાર્યોએ મને દંગ કરી દીધો છે.
અમારા સમયમાં* એ કાર્યો ફરી કરી બતાવો.
અમારા સમયમાં* એ કાર્યો જાહેર કરો.
વિપત્તિ દરમિયાન અમને દયા બતાવવાનું ભૂલતા નહિ.+
૩ તેમાન પ્રદેશથી ઈશ્વર આવ્યા,પારાન પર્વતથી પવિત્ર ઈશ્વર આવ્યા.+ (સેલાહ)*
તેમના ગૌરવથી સ્વર્ગ ઢંકાઈ ગયું,+તેમની સ્તુતિથી પૃથ્વી ભરાઈ ગઈ.
૪ તેમનું તેજ દિવસના પ્રકાશ જેવું હતું.+
તેમના હાથમાંથી બે કિરણો નીકળતાં હતાં,જેમાં તેમનું સામર્થ્ય છુપાયેલું હતું.
૫ તેમની આગળ રોગચાળો હતો+
અને પાછળ ધગધગતો તાવ.
૬ તે ઊભા રહ્યા અને પૃથ્વી ધ્રૂજી ઊઠી.+
તેમની એક નજરથી દેશો કાંપી ઊઠ્યા.+
સનાતન પર્વતોના ચૂરેચૂરા થઈ ગયા,અને પ્રાચીન ટેકરીઓ નમી પડી.+
તેમના માર્ગો હંમેશાંથી એવા જ છે.
૭ મેં કૂશાનના તંબુમાં આફત જોઈ.
મિદ્યાન દેશના તંબુઓના પડદા હચમચી ગયા.+
૮ હે યહોવા, શું તમે નદીઓ પર ગુસ્સે છો?
શું તમે ઝરણાઓ પર ક્રોધે ભરાયા છો?
કે પછી સમુદ્ર પર રોષે ભરાયા છો?+
કેમ કે તમે ઘોડાઓ પર સવાર થઈને આવ્યા,+અને તમારા રથોએ વિજય* મેળવ્યો.+
૯ તમે ધનુષ્ય બહાર કાઢ્યું છે અને તૈયાર રાખ્યું છે.
શપથ લઈને હથિયારો* નીમવામાં આવ્યાં છે.* (સેલાહ)
તમે નદીઓથી પૃથ્વીને ચીરી નાખો છો.
૧૦ પર્વતો તમને જોઈને દર્દથી ખૂબ રિબાયા.+
મુશળધાર વરસાદનું પાણી બધે ફરી વળ્યું.
ઊંડાણના પાણીએ ગર્જના કરી+અને હાથ ઊંચા કરતું હોય એમ ફૂટી નીકળ્યું.
૧૧ તમારાં છૂટેલાં તીરોનો ચળકાટ+અને તમારા ભાલાઓનો ઝગમગાટ એટલો તેજ હતો કે,સૂર્ય અને ચંદ્ર ઊંચે પોતાના ઘરમાં જ ભરાઈ રહ્યા.+
૧૨ તમે ગુસ્સામાં આખી પૃથ્વી ફરી વળ્યા,કોપાયમાન થઈને દેશોને કચડી* નાખ્યા.
૧૩ પોતાના લોકોનો ઉદ્ધાર કરવા, પોતાના અભિષિક્તને* બચાવવા તમે બહાર નીકળ્યા.
દુષ્ટ માણસના ઘરના મુખીને તમે મસળી નાખ્યો.
ઉપરથી લઈને નીચે પાયા સુધી એ ઘરને જમીનદોસ્ત કરી નાખ્યું. (સેલાહ)
૧૪ તેના યોદ્ધાઓ છાનીછૂપી રીતે લાચાર લોકોને ગળી જતા, તેઓને ખૂબ મજા આવતી.
જ્યારે મને વેરવિખેર કરવા તેઓ વાવાઝોડાની જેમ આવ્યા,ત્યારે તમે તેઓનાં હથિયારો* તેઓના જ માથામાં ભોંકી દીધાં.
૧૫ તમે ઘોડાઓ પર સવાર થઈને દરિયો પાર કર્યો,ઊછળતાં મોજાઓમાંથી પસાર થઈને સમુદ્ર ખેડ્યો.
૧૬ એ બધું સાંભળીને મને કંપારી છૂટી ગઈ,*
મારા હોઠ થથરવા લાગ્યા,મારાં હાડકાંમાં સડો પેસી ગયો,+મારા પગ ધ્રૂજવા લાગ્યા,તોપણ હું વિપત્તિના દિવસની શાંતિથી રાહ જોઈશ,+કેમ કે એ દિવસ અમારા દુશ્મનો* પર આવી રહ્યો છે.
૧૭ ભલે અંજીરી પર કોઈ ફળ ન આવે,દ્રાક્ષાવેલા પર કોઈ દ્રાક્ષ ન લાગે,ભલે જૈતૂનની કોઈ પેદાશ ન થાય,ખેતરમાં કોઈ ફસલ ન પાકે,ભલે ઘેટાં-બકરાં વાડામાંથી જતાં રહે,તબેલામાં કોઈ ઢોરઢાંક ન રહે,
૧૮ તોપણ, હું તો યહોવાને લીધે આનંદ કરીશ,મારો ઉદ્ધાર કરનાર ઈશ્વરમાં હું ખુશી મનાવીશ.+
૧૯ વિશ્વના માલિક* યહોવા મારું બળ છે,+તે મારા પગ હરણ જેવા ચપળ કરશેઅને મને ઊંચી જગ્યાએ ચલાવશે.”+
ફૂટનોટ
^ અથવા, “શોકગીતોના.”
^ મૂળ, “વર્ષો દરમિયાન.”
^ મૂળ, “વર્ષો દરમિયાન.”
^ અથવા, “ઉદ્ધાર.”
^ અથવા કદાચ, “તીરો.”
^ અથવા કદાચ, “કુળોએ લીધેલા શપથ જણાવવામાં આવ્યા છે.”
^ મૂળ, “ઝૂડી.”
^ મૂળ, “દાંડા.”
^ મૂળ, “પેટમાં ધ્રાસકો પડ્યો.”
^ અથવા, “અમારા પર હુમલો કરનાર લોકો.”
