હોશિયા ૧૦:૧-૧૫
૧૦ “ઇઝરાયેલ જંગલી* દ્રાક્ષાવેલા જેવો છે, જેના પર ફળ આવે છે.+
એને જેટલાં વધારે ફળ આવે છે, એટલી વધારે તે વેદીઓ બાંધે છે.+
તેની જમીનમાં જેટલો સારો પાક થાય છે, તેના ભક્તિ-સ્તંભો એટલા જ સુંદર બનતા જાય છે.+
૨ તેઓનું દિલ ઢોંગી* છે,
તેઓ દોષિત ઠરશે.
ઈશ્વર તેઓની વેદીઓ તોડી નાખશે અને તેઓના સ્તંભોનો નાશ કરશે.
૩ હવે તેઓ કહેશે, ‘આપણો કોઈ રાજા નથી,+ કેમ કે આપણે યહોવાનો ડર રાખ્યો નથી.
જો રાજા હોત પણ ખરો, તો તે શું કરી લેવાનો હતો?’
૪ તેઓ ખોખલી વાતો કરે છે, જૂઠા સમ ખાય છે+ અને કરારો કરે છે,
એટલે તેઓનો અન્યાય ખેતરમાં ઊગી નીકળતા ઝેરી છોડની જેમ બધે ફેલાઈ ગયો છે.+
૫ બેથ-આવેનની વાછરડાની મૂર્તિને લીધે સમરૂનના રહેવાસીઓ ગભરાશે.+
જૂઠા દેવના યાજકો એ મૂર્તિ અને એના ગૌરવને લીધે આનંદ મનાવતા હતા,
પણ હવે એ યાજકો અને લોકો શોક પાળશે,
કેમ કે એ મૂર્તિનું ગૌરવ તેઓથી દૂર ગુલામીમાં જતું રહેશે.
૬ એ મૂર્તિ આશ્શૂર લઈ જવામાં આવશે અને મહાન રાજાને ભેટ તરીકે આપવામાં આવશે.+
એફ્રાઈમ શરમમાં મુકાશે.
ઇઝરાયેલ પણ શરમમાં મુકાશે, કેમ કે તેણે નકામી સલાહ માની હતી.+
૭ પાણી પર તરતી ડાળીની જેમ,
સમરૂન અને એનો રાજા તણાઈ જશે.*+
૮ બેથ-આવેનનાં ભક્તિ-સ્થળોનો*+ નાશ કરવામાં આવશે,+ કેમ કે એના લીધે ઇઝરાયેલે પાપ કર્યું છે.+
તેઓની વેદીઓ પર કાંટા અને ઝાંખરાં ઊગી નીકળશે.+
લોકો પર્વતોને કહેશે, ‘અમને સંતાડી દો!’
ટેકરીઓને કહેશે, ‘અમને ઢાંકી દો!’+
૯ હે ઇઝરાયેલના લોકો, તમે ગિબયાહના દિવસોથી પાપ કરતા આવ્યા છો.+
તમે હજી સુધર્યા નથી.
ગિબયાહમાં થયેલા યુદ્ધે દુષ્ટ લોકોનો* પૂરેપૂરો નાશ કર્યો ન હતો.
૧૦ મને યોગ્ય લાગશે ત્યારે હું તેઓને સજા કરીશ.*
તેઓના બે અપરાધોનો ભાર તેઓ પર લાદવામાં આવશે ત્યારે,*
પ્રજાઓ તેઓ વિરુદ્ધ ભેગી થશે.
૧૧ એફ્રાઈમ તાલીમ પામેલી ગાય જેવો હતો, જેને અનાજ છૂટું પાડવાનું કામ ગમતું હતું.
એટલે મેં તેની સુંદર ગરદન પર ઝૂંસરી* મૂકી નહિ.
હવે હું એફ્રાઈમ પર કોઈકને સવારી કરાવીશ.+
યાકૂબ તેના માટે ઢેફાં ભાંગશે અને યહૂદા હળ ચલાવશે.
૧૨ યહોવા પાસે સલાહ માંગવાનો હજી સમય છે.+
એટલે તમારા માટે પડતર જમીન પસંદ કરો અને એને ખેડો.+
નેકીનાં* બી વાવો અને અતૂટ પ્રેમ લણો.
પછી ઈશ્વર આવશે અને તમને નેક કામો શીખવશે.+
૧૩ પણ તમે દુષ્ટતા વાવી છે
અને બૂરાઈ લણી છે,+
તમે કપટનાં ફળ ભોગવ્યાં છે.
કેમ કે તમે પોતાના પર
અને પોતાના યોદ્ધાઓ પર ભરોસો મૂક્યો છે.
૧૪ તમારા લોકો વિરુદ્ધ યુદ્ધનો પોકાર થશે.
જેમ શાલ્માને યુદ્ધમાં બેથ-આર્બેલના ઘરનો નાશ કર્યો હતો,
તેમ તમારાં બધાં જ કોટવાળાં શહેરોનો નાશ કરવામાં આવશે.+
એ દિવસે માતાઓને અને તેઓનાં બાળકોને પછાડીને મારી નાખવામાં આવ્યાં હતાં.
૧૫ હે બેથેલ, તારા પણ એવા જ હાલ થશે,+ કેમ કે તેં ઘણી દુષ્ટતા કરી છે.
વહેલી સવારે ઇઝરાયેલનો રાજા ચોક્કસ માર્યો જશે.”*+
ફૂટનોટ
^ અથવા, “ફૂલેલા-ફાલેલા.”
^ અથવા, “લીસું; લપસી પડે એવું.”
^ મૂળ, “એના રાજાને ચૂપ કરી દેવામાં આવશે.”
^ મૂળ, “અન્યાયના દીકરાઓનો.”
^ અથવા, “શિસ્ત આપીશ.” શબ્દસૂચિમાં “શિસ્ત” જુઓ.
^ એટલે કે, ઝૂંસરીની જેમ તેઓ સજાનો ભાર ઊંચકશે ત્યારે.
^ અથવા, “ન્યાયીપણાનાં.” શબ્દસૂચિમાં “ન્યાયી” જુઓ.
^ મૂળ, “ચૂપ થઈ જશે.”