બીજો રાજાઓ ૨:૧-૨૫
૨ હવે એ સમય આવી ગયો હતો જ્યારે યહોવા વંટોળિયામાં+ એલિયાને+ આકાશમાં લઈ લેવાના હતા. એલિયા અને એલિશા+ ગિલ્ગાલથી+ નીકળી પડ્યા.
૨ એલિયાએ એલિશાને કહ્યું: “કૃપા કરીને તું અહીં રહે, કારણ કે યહોવા મને બેથેલ મોકલે છે.” પણ એલિશા બોલ્યો: “યહોવાના સમ* અને તમારા સમ, હું તમારો સાથ નહિ છોડું.” એટલે તેઓ બંને બેથેલ ગયા.+
૩ બેથેલમાંના પ્રબોધકોના દીકરાઓ* એલિશા પાસે આવ્યા અને કહેવા લાગ્યા: “શું તને ખબર છે કે આજે યહોવા તારા ગુરુને લઈ લેવાના છે અને તું તેમની છત્રછાયા ગુમાવી દેવાનો છે?”+ એલિશાએ કહ્યું: “શાંતિ રાખો, મને ખબર છે.”
૪ એલિયાએ એલિશાને કહ્યું: “એલિશા, કૃપા કરીને તું અહીં રહે, કારણ કે યહોવા મને યરીખો મોકલે છે.”+ પણ તે બોલ્યો: “યહોવાના સમ* અને તમારા સમ, હું તમારો સાથ નહિ છોડું.” એટલે તેઓ યરીખો આવ્યા.
૫ યરીખોમાંના પ્રબોધકોના* દીકરાઓ એલિશા પાસે આવ્યા અને કહેવા લાગ્યા: “શું તને ખબર છે કે આજે યહોવા તારા ગુરુને લઈ લેવાના છે અને તું તેમની છત્રછાયા ગુમાવી દેવાનો છે?” એલિશાએ કહ્યું: “શાંતિ રાખો, મને ખબર છે.”
૬ એલિયાએ એલિશાને કહ્યું: “કૃપા કરીને તું અહીં રહે, કારણ કે યહોવા મને યર્દન મોકલે છે.” પણ તે બોલ્યો: “યહોવાના સમ* અને તમારા સમ, હું તમારો સાથ નહિ છોડું.” એટલે તેઓ બંને આગળ ચાલ્યા.
૭ પ્રબોધકોના ૫૦ દીકરાઓ પણ તેઓની પાછળ ગયા અને દૂર ઊભા ઊભા જોવા લાગ્યા. એલિયા અને એલિશા હવે યર્દનને કિનારે પહોંચી ગયા હતા.
૮ એલિયાએ પોતાનો ઝભ્ભો ઉતાર્યો+ ને એનો વીંટો વાળીને પાણી પર ઘા કર્યો. પાણી જમણે અને ડાબે એમ બે ભાગમાં વહેંચાઈ ગયું. વચ્ચેની કોરી ભૂમિ પર ચાલીને તેઓ બંને નદી ઓળંગી ગયા.+
૯ નદીની પેલે પાર ગયા કે તરત એલિયાએ એલિશાને પૂછ્યું: “મને તારી પાસેથી લઈ લેવામાં આવે એ પહેલાં, બોલ હું તારા માટે શું કરું?” એલિશાએ કહ્યું: “શું મને તમારી શક્તિનો બમણો ભાગ મળી શકે?”+
૧૦ એલિયાએ જવાબ આપ્યો: “તેં ભારે માંગણી કરી છે. જો તું મને તારી પાસેથી લઈ લેવાતો જુએ, તો એ માંગણી પૂરી થશે. પણ જો તું નહિ જુએ તો એ માંગણી પૂરી નહિ થાય.”
૧૧ તેઓ ચાલતાં ચાલતાં વાતો કરતા હતા. અચાનક અગ્નિરથ અને અગ્નિઘોડાઓએ+ તેઓ બંનેને જુદા પાડી દીધા. વંટોળિયાએ એલિયાને આકાશમાં ઉઠાવી લીધો.+
૧૨ એ જોતાં જોતાં એલિશાએ બૂમ પાડી: “ઓ મારા પિતા, ઓ મારા પિતા! ઇઝરાયેલનો રથ અને એના ઘોડેસવારો!”+ એલિયા તેની નજરથી ગાયબ થઈ ગયો ત્યારે, એલિશાએ પોતાનો ઝભ્ભો ફાડીને બે ભાગ કરી નાખ્યા.+
૧૩ એલિયા પાસેથી નીચે પડી ગયેલો ઝભ્ભો એલિશાએ ઉપાડી લીધો.+ પછી તે યર્દન નદીને કિનારે જઈને ઊભો રહ્યો.
૧૪ એલિયા પાસેથી નીચે પડી ગયેલા ઝભ્ભાથી એલિશાએ પાણી પર ઘા કર્યો. તેણે કહ્યું: “એલિયાના ઈશ્વર યહોવા ક્યાં છે?” તેણે પાણી પર ઘા કર્યો ત્યારે, પાણી જમણે અને ડાબે એમ બે ભાગમાં વહેંચાઈ ગયું. એલિશા નદી ઓળંગીને સામે પાર ગયો.+
૧૫ યરીખોમાં પ્રબોધકોના દીકરાઓએ દૂરથી એલિશાને જોયો. તેઓએ કહ્યું: “એલિયાની શક્તિ એલિશા પર ઊતરી આવી છે.”+ તેઓ તેને મળવા સામે ગયા અને તેની આગળ ઘૂંટણિયે પડીને ભૂમિ સુધી નમન કર્યું.
૧૬ તેઓએ એલિશાને કહ્યું: “તમારા સેવકોમાંથી ૫૦ શક્તિશાળી માણસો અહીં છે. કૃપા કરીને તેઓને તમારા ગુરુજીની શોધ કરવા જવા દો. યહોવાની શક્તિએ* કદાચ તેમને ઉઠાવીને કોઈ પર્વત પર કે ખીણમાં મૂકી દીધા હોય.”+ પણ તેણે કહ્યું: “તેઓને મોકલવાની જરૂર નથી.”
૧૭ જોકે તેઓએ તેને એટલી વિનંતી કરી કે એલિશા કંટાળી ગયો. તેણે કહ્યું: “સારું, મોકલો.” તેઓએ ૫૦ માણસો મોકલ્યા. ત્રણ દિવસ સુધી તેઓ એલિયાને શોધતા રહ્યા, પણ તે મળ્યો નહિ.
૧૮ તેઓ પાછા આવ્યા અને યરીખોમાં રોકાયેલા એલિશા પાસે ગયા.+ તેણે તેઓને કહ્યું: “મેં તમને જવાની ના પાડી હતી ને!”
૧૯ અમુક સમય પછી શહેરના માણસો એલિશા પાસે આવ્યા અને કહ્યું: “ગુરુજી, તમે જુઓ છો કે શહેર સુંદર જગ્યાએ છે,+ પણ અહીંનું પાણી સારું નથી અને ભૂમિ ઉજ્જડ છે.”*
૨૦ એલિશાએ કહ્યું: “મારી પાસે એક નાનો નવો કટોરો લાવો અને એમાં મીઠું નાખો.” તેઓ તેની પાસે એ લાવ્યા.
૨૧ પછી તે પાણીના ઝરા પાસે ગયો અને એમાં મીઠું નાખ્યું.+ તેણે કહ્યું: “યહોવા કહે છે, ‘મેં આ પાણી શુદ્ધ કર્યું છે. હવેથી ન કોઈ મરશે, ન કોઈ વાંઝણી થશે.’”*
૨૨ એલિશાના કહેવા પ્રમાણે આજ સુધી એ પાણી શુદ્ધ છે.
૨૩ ત્યાંથી એલિશા બેથેલ ગયો. તે જતો હતો ત્યારે, શહેરમાંથી અમુક છોકરાઓ બહાર નીકળી આવ્યા. તેઓ તેની મશ્કરી કરવા લાગ્યા+ અને કહેવા લાગ્યા: “ઓ ટાલિયા, ઉપર જા! ઓ ટાલિયા, ઉપર જા!”
૨૪ આખરે તેણે ફરીને તેઓ તરફ જોયું અને યહોવાના નામે શ્રાપ આપ્યો. જંગલમાંથી બે રીંછડીઓ+ નીકળી આવી અને તેઓમાંથી ૪૨ છોકરાઓને ફાડી નાખ્યા.+
૨૫ તે ત્યાંથી ચાલતો ચાલતો કાર્મેલ પર્વત પર ગયો.+ ત્યાંથી તે સમરૂન પાછો ફર્યો.
ફૂટનોટ
^ મૂળ, “યહોવાના જીવના સમ.”
^ “પ્રબોધકોના દીકરાઓ” કદાચ પ્રબોધકોના શિક્ષણ માટેની શાળાને કે પ્રબોધકોના સંગઠનને બતાવે છે.
^ મૂળ, “યહોવાના જીવના સમ.”
^ મૂળ, “યહોવાના જીવના સમ.”
^ અથવા, “પવને.”
^ અથવા કદાચ, “અને એનાથી કસુવાવડ થાય છે.”
^ અથવા કદાચ, “ન કસુવાવડ થશે.”
