બીજો રાજાઓ ૨૧:૧-૨૬
૨૧ મનાશ્શા+ રાજા બન્યો ત્યારે ૧૨ વર્ષનો હતો. તેણે યરૂશાલેમમાં ૫૫ વર્ષ રાજ કર્યું.+ તેની માનું નામ હેફસીબા હતું.
૨ યહોવાની નજરમાં જે ખરાબ હતું એ જ મનાશ્શાએ કર્યું. યહોવાએ જે પ્રજાઓને ઇઝરાયેલ આગળથી હાંકી કાઢી હતી+ તેઓના રીતરિવાજો તેણે પાળ્યા. એ પ્રજાઓ એવા રિવાજો પાળતી હતી જેનાથી સખત નફરત થાય.+
૩ તેના પિતા હિઝકિયાએ જે ભક્તિ-સ્થળો તોડી પાડ્યાં હતાં,+ એ મનાશ્શાએ ફરીથી બાંધ્યાં. તેણે બઆલ માટે વેદીઓ બાંધી અને ભક્તિ-થાંભલો ઊભો કર્યો.+ તેણે ઇઝરાયેલના રાજા આહાબ જેવાં કામો કર્યાં.+ આકાશમાં જે કંઈ છે એ બધાને* તેણે નમન કર્યું અને તેઓની પૂજા કરી.+
૪ તેણે યહોવાના મંદિરમાં પણ વેદીઓ બાંધી,+ જે વિશે યહોવાએ કહ્યું હતું, “હું યરૂશાલેમમાં મારું નામ રાખીશ.”+
૫ આકાશમાં જે કંઈ છે એ બધાને ભજવા માટે+ તેણે યહોવાના મંદિરનાં બે આંગણાંમાં* વેદીઓ બાંધી.+
૬ તેણે પોતાના દીકરાને આગમાં બલિ ચઢાવ્યો.* તે જાદુટોણાં કરતો અને શુકન જોતો.+ મરેલા સાથે વાત કરનાર ભૂવાઓને અને ભવિષ્ય ભાખનારાઓને તે દેશમાં રાખતો.+ તેણે યહોવાની નજરમાં જે કંઈ ખરાબ હતું એ બધું કરવામાં હદ વટાવી દીધી અને તેમને ભારે રોષ ચઢાવ્યો.
૭ તેણે ભક્તિ-થાંભલાની કોતરેલી મૂર્તિ ઘડી અને મંદિરમાં મૂકી.+ એ મંદિર વિશે યહોવાએ દાઉદ અને તેના દીકરા સુલેમાનને કહ્યું હતું: “આ મંદિરમાં અને યરૂશાલેમમાં હું મારું નામ કાયમ માટે રાખીશ.+ એ જગ્યા મેં ઇઝરાયેલનાં બધાં કુળોમાંથી પસંદ કરી છે.
૮ મેં ઇઝરાયેલીઓના બાપદાદાઓને જે દેશ આપ્યો છે, એમાંથી હું તેઓને કદી ભટકવા દઈશ નહિ.+ પણ મારા ભક્ત મૂસાએ તેઓને આપેલું આખું નિયમશાસ્ત્ર તેઓએ પાળવું પડશે. મારી બધી આજ્ઞાઓ તેઓએ પાળવી પડશે.”+
૯ જોકે તેઓએ માન્યું નહિ. મનાશ્શા તેઓને ખોટા માર્ગે દોરી ગયો. ઇઝરાયેલીઓ આગળથી યહોવાએ જે પ્રજાઓનો વિનાશ કર્યો હતો, તેઓ કરતાં પણ વધારે દુષ્ટ કામો મનાશ્શાએ લોકો પાસે કરાવ્યાં.+
૧૦ યહોવા પોતાના પ્રબોધકો દ્વારા જણાવતા રહ્યા:+
૧૧ “યહૂદાના રાજા મનાશ્શાએ આ ઘોર પાપ કર્યાં છે. તેની અગાઉના+ બધા અમોરીઓ+ કરતાં તેણે વધારે દુષ્ટ કામો કર્યાં છે. ધિક્કાર ઊપજે એવી મૂર્તિઓ* બનાવીને તેણે યહૂદા પાસે પાપ કરાવ્યું છે.
૧૨ એટલે ઇઝરાયેલના ઈશ્વર યહોવા કહે છે: ‘હું યરૂશાલેમ અને યહૂદા પર એવી આફત લાવીશ+ કે એ વિશે જે કોઈ સાંભળશે તેને આઘાત લાગશે.*+
૧૩ હું યરૂશાલેમને એ માપદોરીથી માપીશ,+ જેનાથી સમરૂનને માપ્યું હતું.+ હું યરૂશાલેમને એ માપવાના સાધનથી* માપીશ, જેનાથી આહાબના કુટુંબને માપ્યું હતું.+ હું યરૂશાલેમનો એવો સફાયો કરી નાખીશ કે જાણે કોઈ વાટકો સાફ કરીને લૂછી નાખે અને ઊંધો વાળી દે.+
૧૪ હું મારા વારસામાંથી બાકી રહેલા લોકોનો ત્યાગ કરીશ.+ હું તેઓને દુશ્મનોના હાથમાં સોંપી દઈશ. બધા દુશ્મનો તેઓને બંદી બનાવશે અને તેઓની ચીજવસ્તુઓ લૂંટી લેશે.+
૧૫ એનું કારણ એ કે તેઓએ મારી નજરમાં જે ખરાબ છે એ જ કર્યું છે. તેઓના બાપદાદાઓ ઇજિપ્તમાંથી બહાર આવ્યા ત્યારથી લઈને આજ સુધી એ લોકોએ મને રોષ ચઢાવ્યો છે.’”+
૧૬ યહોવાની નજરમાં જે ખરાબ હતું એ મનાશ્શાએ યહૂદા પાસે કરાવીને પાપ કર્યું. એટલું જ નહિ, તેણે ઘણા નિર્દોષ લોકોને મારી નાખ્યા અને તેઓના લોહીથી યરૂશાલેમને છલોછલ ભરી દીધું.+
૧૭ મનાશ્શાનો બાકીનો ઇતિહાસ યહૂદાના રાજાઓના ઇતિહાસના પુસ્તકમાં લખેલો છે. તેણે જે કંઈ કર્યું એ વિશે અને તેનાં પાપો વિશે એમાં જણાવ્યું છે.
૧૮ મનાશ્શા ગુજરી ગયો. તેને તેના મહેલના બાગમાં, ઉઝ્ઝાના બાગમાં દફનાવવામાં આવ્યો.+ તેનો દીકરો આમોન તેની જગ્યાએ રાજા બન્યો.
૧૯ આમોન+ રાજા બન્યો ત્યારે ૨૨ વર્ષનો હતો. તેણે યરૂશાલેમમાં બે વર્ષ રાજ કર્યું.+ તેની માનું નામ મશુલ્લેમેથ હતું. તે હારૂસની દીકરી હતી, જે યોટબાહનો વતની હતો.
૨૦ આમોન પોતાના પિતા મનાશ્શાની જેમ કરતો રહ્યો. તેણે યહોવાની નજરમાં જે ખરાબ હતું એ જ કર્યું.+
૨૧ આમોન બધી રીતે પોતાના પિતાના માર્ગે ચાલતો રહ્યો. પોતાના પિતાની જેમ તેણે ધિક્કાર ઊપજે એવી મૂર્તિઓને નમન કર્યું અને એની પૂજા કરી.+
૨૨ આમોને પોતાના બાપદાદાઓના ઈશ્વર યહોવાનો ત્યાગ કર્યો. તે યહોવાને માર્ગે ચાલ્યો નહિ.+
૨૩ આમોનના સેવકોએ તેની વિરુદ્ધ કાવતરું ઘડ્યું અને રાજાને તેના મહેલમાં જ મારી નાખ્યો.
૨૪ જેઓએ આમોન રાજા વિરુદ્ધ કાવતરું ઘડ્યું હતું, એ બધાને દેશના લોકોએ મારી નાખ્યા. લોકોએ આમોનની જગ્યાએ તેના દીકરા યોશિયાને રાજા બનાવ્યો.+
૨૫ આમોનનો બાકીનો ઇતિહાસ અને તેણે જે કંઈ કર્યું, એ બધું યહૂદાના રાજાઓના ઇતિહાસના પુસ્તકમાં લખેલું છે.
૨૬ લોકોએ તેને ઉઝ્ઝાના બાગમાં આવેલી તેની કબરમાં દફનાવ્યો.+ તેનો દીકરો યોશિયા તેની જગ્યાએ રાજા બન્યો.+
ફૂટનોટ
^ મૂળ, “આકાશના આખા સૈન્યને.”
^ મૂળ, “આગમાં ચલાવ્યો.”
^ આના માટેનો હિબ્રૂ શબ્દ કદાચ “મળ” કે “છાણ” માટેના શબ્દ સાથે સંકળાયેલો છે, જે તિરસ્કાર બતાવવા વપરાય છે.
^ મૂળ, “તેના કાન ઝણઝણશે.”
^ અથવા, “ઓળંબાથી.” દીવાલ સીધી છે કે નહિ, એ માપવાનું સાધન.
