હવાઈમાં પરદેશી પક્ષી

હવાઈ ટાપુ ઉત્તર પ્રશાંત મહાસાગરમાં આવેલો છે. ત્યાં બીજા અમુક ટાપુઓ પણ છે. અમે માઉઈ ટાપુ પર ફર્યા. ત્યાં હાલીઅકાલા નામનો જ્વાળામુખી છે. આજે એ જ્વાળામુખી ફાટતો નથી. એ ૩,૦૫૫ મીટર ઊંચો છે. ઘણા લોકો ઊગતા સૂર્યને જોવા આ જ્વાળામુખી પર્વત પર કારમાં ચડે છે. લોકો એ સીન જોઈને વાહ વાહ પોકારી ઊઠે છે. અમને પણ ઊગતો સૂર્ય જોવા ત્યાં જવું હતું. પણ અમે કાપાલુઆમાં રહેતા હતા. એ શહેર હાલીઅકાલાથી બહુ જ દૂર હતું. તમે નહિ માનો, અમારે સવારે બે વાગે ઊઠવું પડ્યું. અમને લાગ્યું કે અમારા જેવું ગાંડું બીજું કોણ હશે! પણ કારમાં પર્વત ચડનાર અમે જ ન હતા, બીજી અનેક કારોની લાઈન લાગી હતી. રસ્તો વાંકો-ચૂકો હતો. કારો ધીમે ધીમે ચડતી હતી. છેક ઉપર ચડ્યા ત્યારે, થોડી ઠંડી તો લાગી. પણ અમે કામળો ઓઢી લીધો.

સૂર્ય છ વાગે ઊગવાનો હતો. ઘણા લોકો એ જોવા આવ્યા હતા. બધા પોતાના કૅમેરા તૈયાર કરીને કાગને ડોળે રાહ જોતા હતા. પણ અફસોસ! સૂર્ય ઊગવાનો હતો ત્યારે જ અચાનક જ્વાળામુખી પર વાદળો છવાઈ ગયાં. શા માટે? આ ટાપુ ઉત્તર પ્રશાંત મહાસાગરમાં આવેલો છે, એના લીધે વાદળો ગમે ત્યારે આવી શકે. વાદળો હોવાથી સૂર્ય ન દેખાયો. અમને લાગ્યું કે અમારો દિવસ નકામો ગયો. પણ એ વિચાર ખોટો હતો. અમારી નજર જ્વાળામુખી પર પડી. અમે ચારે બાજુએ જોયું તો અનેક એવા રસ્તા દેખાયા, જેમાં માણસો ચડ-ઊતર કરી શકે.

અમે ચુકાર ચુકાર જેવો અવાજ સાંભળ્યો. અમે તો મૂંઝાઈ ગયા કે એ શાનો અવાજ છે. અમે જોયું કે એ એક પક્ષીનો અવાજ હતો. એ વનલાવરી જેવું પક્ષી હતું. એવા પક્ષીઓ તેતરના કુટુંબમાંથી આવે છે. એ યુરોપ-એશિયામાંથી આવે છે. પ્રજનન ઋતુ માટે એ મોટે ભાગે જમીન પર રહે છે. ત્યાં એનો માળો બાંધે છે. અમે એને જોવા ગયા તો ઊડવાને બદલે એ દોડીને દૂર જતાં રહેતાં હતાં.

પણ સવાલ થાય કે એ યુરોપ-એશિયાનું પક્ષી માઉઈ ટાપુ પર કેવી રીતે પહોંચ્યું? લોકો ત્યાંથી એને ઉત્તર અમેરિકા લાવ્યા અને ઉછેર કર્યો. શા માટે? જેથી શિકારીઓ તેઓનો શિકાર કરી શકે. ખરું કે અમે ઊગતા સૂર્યને ન જોયો, પણ એક સુંદર પક્ષી તો જોયું ને!—એક વ્યક્તિનો અનુભવ. (g 2/07)