Na Aküjaliikana Pütchi keeʼireesü maʼin naaʼin anajiraain naya namaa napüshi otta namaa na kepiakana naʼütpünaa süka niain eʼitaain Maleiwa shikii kottiraainjachin wanee wayuu sümaa nüpüshi (Génesis 2:21-24; Éfeso 3:14, 15). Shikirajüin tü Bibliakat napüshuaʼa na wayuukana talatüinjachin wanee wayuu jee paaʼinwainjachin nia sümaa nuʼwayuuse.

 Wachajaain maʼin sukuwaʼipa süpüla woonooin sümaa tü Bibliakat süpüla anainjanain waya sümaa waʼwayuuse jee müsia anainjatüin shipijia wachonnii (Proverbios 31:10-31; Éfeso 5:22–6:4; 1 Timoteo 5:8). Jaʼitairü naatain tü nanoujakat anain na wapüshikana, sükaalinjain waya tü Bibliakat süpüla anajiraain waya sümaa wapüshi (1 Pedro 3:1, 2). Jülüjaa joo waaʼin tü namakat waneinnua wayuu wanaa sümaa suʼttuin naʼwayuuse sünain aküjaa pütchi:

•   «Soʼunnaa tü aipiruakat juya sünain kasaalüin waya, mojusü maʼin wakuwaʼipa sutuma watkaajiraakuʼu wamüin. Akatsaʼa Ivete aküjasü pütchi mapa. Sutuma tia, kamaneesü maʼin otta nnojoluitpaka kaashichijaaralüin. Süka suʼwanajaain sukuwaʼipa, anainnapa waya» (Clauir, kepiashi nia Brasil).

•   «Wanaa sümaa nuʼttuin sünain ekirajawaa chi taʼwayuusekai Chansa namaa na Aküjaliikana Pütchi, jashichisü taya nümüin süka jülüjain taaʼin nachiki mapüsheein wayuu natuma. Tayaawataka saaʼu mapa anain wakuwaʼipa sutuma tü nikirajaakalü anain suluʼu tü Bibliakat» (Agness, kepiasü shia Zambia).

 Waküjapa pütchi namüin na kepiakana waʼütpaʼa, wekiraja naya sünain tü sümakat tü Bibliakat süpüla anainjatüin nakuwaʼipa sümaa napüshi maʼaka süküjünüinjatüin jooluʼu:

•   Tü jülüjainjatkat paaʼin kaʼwayuusere pia

•   Eesü süpüla anain pukuwaʼipa puʼttaiwaʼaya sünain kaʼwayuusee

•   Anajiraainjana jia namaa kachonkana juʼwayuuse

•   Keisalainjana jia süpüla jünneetse

•   Nnojo jüʼülüjiraain

•   Motojiraa jaaʼin jaainjala

•   Jüchiaa jüchonnii

 Eesü mülejeʼeya shia. Süküjainka wanee konpainyiia kanüliaka Sofres soʼu tü juyakat 1998, naʼakajee 20 wayuu kaʼwayuusekana eeshi waneeshia naʼakajee aküjakai pütchi nüchiki Jehová eʼrakai nümüliala sünainjee nunoula.

 Nüküjatüjülia Jesús jashicheenain namüin napüshi na oushikajaakana nüchiirua (Mateo 10:32-36). Naashin Will Durant, chi ashajüikai süchiki kasa alatüitka süʼütpünaa nakalioʼu na romaanokana «alirajünüshii na anoujashiikana nünain Cristo sünain nakatajiraain na wayuukana natuma suulia napüshi». a Müsia neʼe nakuwaʼipa na Aküjaliikana Pütchi maaʼulu yaa, eeshii nalirajünüle neʼe. ¿Nayachejeʼeya na Aküjaliikana Pütchi kasitka nakatajiraain na wayuukana suulia napüshi?

 Anuu sünüiki Tribunal Europeo de Derechos Humanos nachiki napüshi na Aküjaliikana Pütchi manoujainkana: «Mojujiraashii naya sümaa napüshi saalii nayoutuin napüleerua tü nanoujakalü anain». Anuu sooʼomüin sünüiki tia Tribunalkat: «Nnojoishii nayaawalaain namüiwaʼa na Aküjaliikana Pütchi alatüin amüin tia. Alatüsü sümüin wayuu maʼleekalia jaʼitairü naatain tü nanoujakalü anain napüshi. b Mayaainjeʼe nayoutuin na wapüshikana tü wanoujakalü anain, wayakana Aküjaliikana Pütchi nüchiki Jehová wachajaain maʼin sukuwaʼipa süpüla waaʼinrüinjatüin tü pütchi sümakat Bibliakat yaʼayaa: «Nnojo mojulaain jia niʼipajee chi wayuu aaʼinrakai jümüin kasa mojusü. Anasü anale jukuwaʼipa noʼupala na wayuukana. Kamanee maʼin jia namüin napüshuaʼa na wayuukana» (Roma 12:17, 18, TNM).

 Na Aküjaliikana Pütchi oonooshii naya sümaa tü sümakat tü Bibliakat: «Chi suʼwayuuseinjachikai, niainjachi wane wayuu anoujashi». Kasaalüinjana waya namaa na wanaawakana anoula wamaa (1 Corinto 7:39). Woonoole sümaa tia nümakat Maleiwa, aneerü wakuwaʼipa. Anuu sünüiki tü karaloʼutakat Journal of Marriage and Family soʼu tü juyakat 2010 süchiki tia: «Na wayuu wanaawakana anoula sümaa naʼwayuuse otta tü kamalainkat namüin», anasü nakuwaʼipa. c

 Na Aküjaliikana Pütchi nnojoishii nootuin na wayuukana nooʼulaainjatüin naʼwayuuse müleka manoujainre shia. Anuu tü sümakat tü Bibliakat: «Müleka nnojorule sünoujain nuʼwayuuse wane wayuu wanaa nümaa, je müleka ayateere shia nümaa, anakaja müleka nnojorule nuuʼulaain shia. Je müleka nnojoire nünoujain suʼwayuuse wane wayuu wanaa sümaa, je müleka ayateere nia sümaa, anakaja müleka nnojoire suuʼulaain nia» (1 Corinto 7:12, 13). Woonoo amaalü tia nuluwataakalü anain waya Maleiwa.