Shia waaʼinmaaka maʼin woushikajaain süchiirua tü nikirajakalü anain Jesús, tü noʼunakalü achiirua na aluwataaushikana. Suluʼu pütchikat tüü, aküjüneerü süpüshi tü kasa wanoujakat maʼin anain.

1.   Nüchiki Maleiwa. Nia neʼe waʼwaajaka chi Maleiwa shiimainshikai, chi Miyoʼushikai Kakumajalakai kasakat süpüshuaʼa, chi kanüliakai Jehová (Salmo 83:18; Alateetkat Mapeena [Apocalipsis] 4:11). Jehová niaʼaya chi Nümaleiwasekai Abraham, Moisés otta Jesús (Éxodo 3:6; 32:11; Juan 20:17).

2.   Süchiki tü Bibliakat. Wanouja anainrü nünüikin Maleiwa tü Bibliakat otta nüshajiralain shia süpüla wayuu süpüshuaʼa (Juan 17:17; 2 Timoteo 3:16). Tü wanoujakalü anain suluʼujeejatü tü 66 karaloʼutachein eekat suluʼu tü Bibliakat, shia tü kanüliakat Antiguo Testamento otta Nuevo Testamento. Anuu tü nümakat wanee ekirajüi nachiki na Aküjaliikana Pütchi, Jason BeDuhn nünülia: «Süpüshuaʼa tü naaʼinrakat otta tü nanoujakalü anain suluʼujeejatü shia tü Bibliakat otta nnojotsü neeʼiratüin tü sünüikikat». a

    Mayaapejeʼe wanoujain sünain süpüshuaʼa tü sümakat tü Bibliakat, watüjaa aaʼu eein pütchi suluʼu tü Bibliakat shiyaawaseka wanee kasa atumawaa.

3.   Nüchiki Jesús. Shia wekirajakalü anain tü nikirajapuʼukalü anain Jesús otta washatüin tü nukuwaʼipakat. Kojutushi nia wamüin süka niain chi oʼtteʼerakai waya otta niain chi Nüchonkai Maleiwa (Mateo 20:28; Aluwataaushikana [Hechos] 5:31). Sükajee tia, atüjaana aaʼu shiain woʼunuin achiirua tü nikirajakalü anain Jesús (Aluwataaushikana 11:26). Nnojotpejeʼe süküjain tü Bibliakat niain Jesús chi Maleiwa pülashikai maʼin otta nnojotsü süküjain apünüinshiin suluʼu waneeshiain Maleiwa (Juan 14:28).

4.   Süchiki nukuwaʼipa Maleiwa sünain aluwatawaa. Tia aluwataayakat chasü chaa iipünaa, nnojotsü shiain wanee kasa akumajaaka suluʼu waaʼin waya anoujashiikana. Najaʼttireerü Maleiwa sukuwaʼipa suluwataaya wayuu yaa saaʼujee tü mmakat otta niainjachi aluwataaka, sükajee tia, nikeraajeerü yaa saaʼu tü Mmakat süpüshuaʼa tü keeʼireetüjütkalia naaʼin (Daniel 2:44; Mateo 6:9, 10, TNM). Alüʼütsü maʼin sükalia tia, süka jamüin, sülüʼülüin sükalia süpüla «sajaʼttüinjatüin tü kasakat süpüshua» saashin tü Bibliakat (2 Timoteo 3:1-5; Mateo 24:3-14).

   Aneekünüshi Jesús nutuma Maleiwa süpüla niainjachin Aluwataain nutuma sirumatuʼujee. Oʼttüshi nia sünain aluwatawaa soʼujee 1914 (Alateetkat Mapeena 11:15, TNM).

5.   Süchiki suʼttaainjatüin wayuu. Süka naapajiraain nikii Jesús, eeinapa süpüla taashin na wayuukana suulia kaainjalaa jee outaa (Mateo 20:28; Aluwataaushikana 4:12). Süpüla anainjatüin wakuwaʼipa sükajee tü naaʼinrakat Jesús, kanoulainjana waya nünain, wanouteʼerüinjatü tü wakuwaʼipakat otta woutiisainjana waya (Mateo 28:19, 20; Juan 3:16, TNM; Aluwataaushikana 3:19, 20). Atüjaana aaʼu shiimainre nunoula wanee wayuu anale tü kasa naaʼinrakat (Santiago 2:24, 26). Oʼttaajeena waya sükajee anamiain maʼin chi Maleiwakai wamüin, nnojotsü sükajeejatüin wanee kasa waaʼinraka (Galacia 2:15, 16, 21).

6.   Süchiki tü kasairua chakat iipünaa. Jehová, Jesús otta napüshuaʼa na aapieekana chashii naya chaa iipünaa b (Salmo 103:19-21; Aluwataaushikana 7:55). Palitchon na wayuu aneekünakana süpüla chainjanain chaa iipünaa, 144.000 naya. Chainjana aluwataain wanaa nümaa Jesús (Daniel 7:27; 2 Timoteo 2:12; Alateetkat Mapeena 5:9; 5:10, TNM; Alateetkat Mapeena 14:1; 14:3, TNM).

7.   Süchiki tü Mmakat. Nukumajüin Maleiwa tü Mmakat süpüla kepiainjatüin wayuu waneepia saaʼu (Salmo 104:5; 115:16; Eclesiastés 1:4). Aneerü maʼin nakuwaʼipa nutuma Jehová na wayuu oonookana sümaa tü nuluwataakalü anain, nnojoleena naya ayuulin otta kateerü noʼu süpüla kaʼikat süpüshuaʼa saaʼu tü Mmakat paʼaraiisüpa shia (Salmo 37:11, 34).

8.   Süchiki tü mojulawaakat otta tü müliaakat. Aashajaasü tü Bibliakat nüchiki wanee aapiee eʼrüijaakai wayumüin nümüin Maleiwa, sükajee kaainjalain nia, akumajaasü tü mojulawaakat otta tü müliaakat (Juan 8:44). Yolujaa otta Satanás münüshi chia aapieekai süchikijee niʼrüijaain wayumüin. Nimeejüin Adán otta Eva süpüla neʼrüinjanain wayumüin nümüin Maleiwa wanaa nümaa. Watta saalii kasa mojusü eeka sünainjee tia (Génesis 3:1-6; Roma 5:12). Süpüla sütüjaanüin aaʼu alawaain tü nümakat Satanás chaa Edén, nuuʼulaain Maleiwa eein tü mojulawaakat otta tü müliaakat, nnojotpejeʼe nuuʼulaainjatüin eein tia süpüla kaʼikat süpüshuaʼa.

9.   Süchiki tü outaakat. Yüüʼülaa müsü nukuwaʼipa wanee wayuu outapa nia (Salmo 146:4; Eclesiastés 9:5, 10). Akaʼaya na outushiikana, nnojoishii müliain saʼaka siki jotusü.

    Watta maʼin naalii na wayuu nüsoʼireʼerüinjanakana aaʼin Maleiwa (Aluwataaushikana 24:15). Nayasaʼa na wayuu asoʼiraainjanakana aaʼin sümaa moonooin naya sümaa tü nuluwataakalü anain Maleiwa, najaʼttirajana naya otta müinnaʼaya nnojoluin nüsoʼirüin naaʼin nachikuaʼa (Alateetkat Mapeena 20:14, 15, TNM).

10.   Süchiki nukuwaʼipainjatka wanee wayuu sümaa nüpüshi. Süka nüikaleʼerüin Maleiwa sukuwaʼipa tü kaʼwayuuseekat sümaʼleiwaʼaya paala, wayaawata aaʼu kasaalüinjachin neʼe wanee toolo sümaa wanee jierü otta nnojoliinjana naya ooʼulaajiraain. Shia neʼe nooʼulaajiraainjanaka anainjee müleka sümaʼüjiraale tü jietkat nümaa wanee toolo naata jee niale chi toolokoi amaʼüjiraain sümaa wanee jierü nnojotka nuʼwayuusein (Mateo 19:4-9). Watüjaa aaʼu talateechin maʼin wanee wayuu otta nüpüshi naaʼinrüle tü sümakat tü Bibliakat (Éfeso 5:22–6:1).

11.   Süchiki aʼwaajaa Maleiwa. Nnojoishii waya aʼwaajüin ayaakua otta kuruusa (Deuteronomio 4:15-19; 1 Juan 5:21). Anuu süpüshi tü kasa wanoujakalü anain:

    •   Oʼuraajüshii waya nümüin Maleiwa (Filipos 4:6).

    •   Waashajeʼerüin otta ekirajaashii waya sünain tü Bibliakat (Salmo 1:1-3).

    •   Asakitshii waya waaʼin süchiki tü pütchi waashajeʼerakat suluʼujee tü Bibliakat (Salmo 77:12).

    •   Outkajaashii waya süpüla woʼuraajüin nümüin Maleiwa, wekirajaain sünain tü Bibliakat, weeʼirajüin nümüin Maleiwa, waʼwaajüin nia sükajee tü wanüikikat otta watütüleʼerajiraain waaʼin sünain anoujaa (Colosas 3:16; Hebreokana 10:23-25).

    •   Aküjashii waya pütchi anasü süchiki «nukuaippa Maleiwa sünain aluwatawaa» (Mateo 24:14).

    •   Wakaalinjain na wawalayuu eʼrakana namüliala (Santiago 2:14-17).

    •   Aʼyataashii waya sünain akumajaa otta anouteʼeraa Piichi Outkajaalee otta waneirua piichi süpülajatka aʼyatawaa nümüin Maleiwa jee süpüla süküjünüin pütchi sainküin mmakat (Salmo 127:1).

    •   Wakaalinjain na wawalayuu müliakana sutuma sukutkujaain mma, süsetüin palaa otta eere wane wawai (Aluwataaushikana 11:27-30).

12.   Süchiki tü sukuwaʼipakat waʼyataain nümüin Maleiwa. Watta saalii outkajaalee eere nakotchojiraain na wawalayuukana sainküin mmaka otta eeshii waneinnua wawalayuu laülaashii jülüjakana aaʼin naya. Nnojoliipejeʼe nekiipüʼüin naya otta nnojoishii achekajüin saaʼu naʼyataain napüleerua na wawalayuukana (Mateo 10:8; 23:8). Nnojoishii waya aapüin diezmo jee achuntuin nneerü (2 Corinto 9:7). Süpüshuaʼale tü aʼyatawaa naaʼinrakat na Aküjaliikana Pütchi awalaajünüsü sükajee tü nneerü süsülajakat wayuu süka saaʼin, nnojotsü aküjünüin nanülia na wayuu asülajakana nneerü.

     Eeshii waneinnua wawalayuu kakaliainnakana maʼin sünain aʼyatawaa nümüin Maleiwa oʼunirakana sukuwaʼipa waʼyataain, «Laülaashii JülüjakanaAaʼin na Aküjaliikana Pütchi sainküin Mma» münüshii naya wawalayuukana. Chashii naya aʼyataain eejeere tü shikiisükat maʼin tü waʼyataainkat nümüin Maleiwa (Mateo 24:45).

13.   Süchiki tü paaʼinwajiraakalü anainjee waya. Paaʼinwajiraashii waya sünain tü wanoujakalü anain sainküin tü mmakat jaʼitaina jalejeʼewaliin waya (1 Corinto 1:10). Wachajaain sukuwaʼipa süpüla paaʼinwain waya, jaʼitairü naatain wakuwaʼipa, weʼiruku, kaʼletsere jee maʼletsere waya (Aluwataaushikana 10:34, 35; Santiago 2:4). Eepejeʼe süpüla waneeküin waneʼewai wakua tü waaʼinrajatkat wanaapünaa sümaa tü sümakat tü Bibliakat (Roma 14:1-4; Hebreokana 5:14).

14.   Süchiki tü wakuwaʼipakat. Wachajaain sukuwaʼipa süpüla jaʼyainjatüin waaʼu alin wapüla wayuu waaʼinrapa kasa eekai eein (Juan 13:34, 35). Nnojotsü waaʼinrüin wanee kasa mojushiika noʼuluʼu Maleiwa, müsüjeseʼe kojutuin wamüin tü ishakat otta nnojotsü weʼiteʼerüin shia wanain (Aluwataaushikana 15:28, 29; Galacia 5:19-21). Wayuu anamia waya otta nnojoishii sünainpünaain waya tü kasachiki eekat saaʼu tü mmakat (Mateo 5:9; Isaías 2:4). Kojutushii wamüin na sülaülashiikana mma otta woonoo amaalü süpüshuaʼa tü naluwataakalü anain. Aluʼujasaʼa naluwataale waya sünain aaʼinraa wanee kasa mojuka noʼuluʼu Maleiwa, nnojoleena waya oonooin namaa (Mateo 22:21; Aluwataaushikana 5:29).

15.   Süchiki wakuwaʼipa namaa na waneinnua. Anuu tü nümakat Jesús: «Anasü aire püpüla wayuu süpüshua maa aka alin pia püpülajiraa». Jee müshi nia nachiki na oushikajaakana süchiirua nukuwaʼipa: «Nnojoliishii süpüshin naya tü manoujainsatkalüirua» (Mateo 22:39; Juan 17:16). Mayaapejeʼe nnojoluin sünainpünaain waya poliitika otta nnojoluin sünainpünaain waya tü wane iküleesiakalüirua, kojutusü wamüin wayuu maʼleekalia otta waaʼinrüin tü anasükat namüin (Galacia 6:10; 2 Corinto 6:14). Mayaainjeʼe nnojoluin sünainpünaain waya tü wamayütkat, wooʼulaain naneeküin na wayuukana süka naaʼin namüiwaʼa müleka sünainpünaainjanale naya tia otta nnojoishii jashichin waya namüin (Roma 14:12, TNM).

 Pütüjaweere sooʼomüin süchiki tü wanoujakalü anain, püchajaa suluʼu jw.org jee puluwataale karaloʼuta wamüin. Eeshi süpüla pürütkaain wamaa suluʼu wanee Piichi Outkajaalee eekai pejein püpüleerua jee püsakirüle wanee wawala pejekai epia pünain.