Wainma Biblia nekirajaaka aka na aküjaliikana pütchi nüchiki Jehová, shiapejeʼe kojutuleein namüin Traducción del Nuevo Mundo. Eesü shia suluʼu wainma anüikii, eesü tü nünüliakat Maleiwa suluʼu otta pansaasü tü sümakat.

•   Eesü nünülia Maleiwa suluʼu. Suluʼu waneirua Biblia nnojotsü aküjünüin nünülia Maleiwa. Jamüsüjaʼa suluʼu wanee Biblia akumajünaka, ashajünüsü nanülia maʼaka 70 wayuu aʼyataakana sünain ashajaa shia, nnojotpejeʼe eeyaain neʼitaain uwatuayaakalüjeʼe tü nünüliakat Maleiwa, Jehová.

   Suluʼu Traducción del Nuevo Mundo, ashajünüsü tü nünüliakat Maleiwa eeinjatüle shia, maʼaka sutuma tü ashajuushi sümaiwajatkat otta nnojotsü nanülia na akumajakana shia.

•   Pansaasü shia. Wainma Biblia nnojotka pansaain atuma süküjia wanee wetsiikulo. Maʼaka saaʼin tü sümakat Mateo 7:13, tü makat mayaa: «Jikeroto suluʼu tü puettoʼu mouisükat, tü puettoʼu jee wopu sünainmüinjatkat eere saʼajünüin wayuu, jerutsü jee miyoʼu». Akatsaʼa suluʼu tü ashajuushi sümaiwajatkat, «saʼajia wayuu» nnojotsü müin, «ajaʼttinnaleeinjatü» müsü. Eeka naaʼinruʼu na ashajakana tü Bibliakat, müliayaashii na wayuukana naaʼinruʼu saʼaka siki. Nnojotpejeʼe shikirajüin tia tü Bibliakat, müsüjeseʼe «ajaʼttinnaleeinjatü» sümüin Traducción del Nuevo Mundo maʼaka süküjain tü ashajuushi sümaiwajatkat.

•   Mapüleesat ayaawataa. Anale süshajia wanee Biblia, pansaasü tü sümakat jee mapüleesat ayaawataa. Jülüjaa waaʼin tüü, eesü waneirua Biblia aküjaka Mateo 5:3 mayaa: «Anataʼaleeshiijaʼa na mojukana anoula». Nnojotsü nayaawatüin aaʼu shia na wayuukana maaʼulu yaa. Müsüjeseʼe sümüin tia wetsiikulokot sutuma Traducción del Nuevo Mundo mayaa: «Anataʼaleeshiijaʼa na eʼrakana choʼujaain Maleiwa namüin».

 Shiʼipajee kojutuin nünülia Maleiwa sutuma, pansaasü jee ayaawatüna aaʼulu tü sümakat. Eepejeʼe sooʼomüin kasa anaka maʼin atuma Traducción del Nuevo Mundo: shia shiitajünüin sümüin wayuu masaloui. Sutuma tia, wainma maʼin na wayuu eekana süpüla naashajeʼerüin tü Bibliakat suluʼu nanüiki, jaʼitairü nnojoluin eein nneerü namaʼana süpüla nayaʼlajüin wanee.