Wayakana aküjaliikana pütchi nüchiki Jehová, wekirajüin na wayuukana sünain tü Bibliakat sükajee wanee karaloʼuta anaka maʼin. Anuu tü kasa anasü piʼreetkat pikirajaale sünain tü Bibliakat:

•   Aneerü pukuwaʼipa.

•   Paʼaleewainjeechi Maleiwa.

•   Pütüjaajeerü aaʼu tü sümakat tü Bibliakat süchiki tü kasa anasü eeinjatkat mapeena.

Anuu tü pütüjaweekalü aaʼu:

•  ¿Jamüsü sukuwaʼipa shikirajia wayuu sünain tü Bibliakat?

•  ¿Achekajeenache jia saaʼu?

•  ¿Jeʼreerü sükalia tü ekirajawaakat?

•  ¿Kasa taaʼinrajatka palajana?

•  ¿Jama tooʼulaküle tekirajaain uwatua neʼe?

•  ¿Ekerotuinjaiche taya sünain anoujaa tekirajaale sünain tü Bibliakat?

•  ¿Eeshiche süpüla tekirajaain süka tü Biblia eekat tamaʼana?

•  ¿Eeshiiche süpüla nekirajaain tamaa na tapüshikana jee na taʼaleewainkana?

•  ¿Eeshiche süpüla tekirajaain tachikuaʼa sünain tü Bibliakat jaʼitashi tekirajaapuʼuin paala?

•  ¿Eeshiche süpüla tekirajaain tamüiwaʼa sünain tü Bibliakat?

 Nikirajeechi pia wanee wawala süpüla pütüjaain saaʼu tü sümakat tü Bibliakat. Sünainjee tü sümakat tü karaloʼutakat Anainjatka atuma pukuwaʼipa waneepia, pütüjaajeerü aaʼu tü sümakat tü Bibliakat otta aneerü pukuwaʼipa. Pütüjeere sooʼomüin pünaja videokot tüü.

 Nnojoleena waya achekajüin pümüin. Wayakana aküjaliikana pütchi nüchiki Jehová, waaʼinrüin tü nümakat Jesús, tü makat mayaa: «Nnojoishii achekajüinjanain jia saaʼu tia maʼaka nnojoluin süchekajünüin jümüin paala» (Mateo 10:8, TNM). Nnojoleena waya achekajüin pümüin saaʼu tü Bibliakat otta saaʼu tü karaloʼutakat Anainjatka atuma pukuwaʼipa waneepia.

 Eesü 60 ekirajaaya suluʼu tü karaloʼutakat. Püneeka jeʼrainjatüin pükalia sünain ekirajawaa. Eeshii na ekirajaakana sünain waneesia neʼe ekirajaaya soʼu semaanaka otta eetaashii na ekirajaakana sünain kojuyasü ekirajaaya.

1.  1. Pipiraja tü yaakat suluʼu Internet. Tü püshajakat yala süpülajatü niyamaajüin pia chi wawala ekirajüinjachikai pia jee shiale süpüla nüntüin pipialuʼumüin.

2.  2. Niyamaajeechi pia jee anteechi pipialuʼumüin chi wawala ekirajüinjachikai pia. Nüküjeerü pümüin jamüin sukuwaʼipa tü ekirajawaakat sünain tü Bibliakat otta nüküjeerü pümüin tü pütüjaweekalü aaʼu.

3.  3. Pukumaja sukuwaʼipa nümaa chi ekirajüinjachikai pia, pikirajaainjachire pipialuʼu jee shiale suluʼupünaa teleepono. Eeshi süpüla nikirajüin pia chi wawalakai chayaa pipialuʼu, suluʼupünaa teleepono, sükajee videollamada jee correo electrónico. Eeshi süpüla pikirajaʼawalin soʼu wanee oora jee shiale pücheküin kamaʼawalin pia. Eesü süpüla paaʼinrüin tia soʼu tü kaʼi anakalü oʼu pümüin.

 Eesü süpüla puuʼulaküin. Pipiraja palajana tü yalakat suluʼu Internet. Niyamaajeechika pia wanee wawala. Püküja nümüin pikirajaainjachin neʼe uwatua süpüla pütüjaain saaʼu kamalainre shia pümüin. Shieerü pikirajaaka anain tü poyeetokot Anainjatka atuma pukuwaʼipa waneepia, apünüinsü neʼe ekirajaaya eeka suluʼu.

 Nnojotsiaajeʼe shiain tia. Kamalainsü wamüin wayakana Aküjaliikana pütchi wekirajüin wayuu sünain tü Bibliakat. Nnojoliipejeʼe wapüleeruain naaʼin shiiʼiree nekerotuin sünain anoujaa wanaa wamaa. Tü waaʼinrakat shia wekirajüin wayuu sünain tü sümakat tü Bibliakat. Kojutushii naya wamüin soʼu waaʼinrüin tia. Watüjaa aaʼu nayainjanain na wayuukana aneeküin süka naaʼin namüiwaʼa tü nanoujainjatkalü anain (1 Pedro 3:15).

 Aa. Eeshi süpüla pikirajaain süka tü Biblia anakat saaʼin pümüin. Wayakana aküjaliikana pütchi nüchiki Jehová shia wekirajaaka aka Traducción del Nuevo Mundo. Pansaasü tü sümakat otta mapüleesat ayaawataa shia. Watüjaapejeʼe saaʼu eein na wayuu anakana amüin nekirajaain süka tü Biblia eekat namaʼana.

 Aa. Eeshii süpüla nekirajaain pümaa na püpüshikana otta müshiʼiya na paʼaleewainyuukana.

 Aa, eeshi süpüla pikirajaain püchikuaʼa. Eesü kamalainjeerüle shia pümüin suulia pikirajaapuʼuin paala. Tü ekirajawaakat maaʼulu nnojotsü müin sukuwaʼipa maʼakaapuʼu sümaiwa. Anoutunüsü sukuwaʼipa süpüla pansaain shia wanaapünaa sümaa nakuwaʼipa na wayuukana. Anajeena jia video otta yootiraajeena jia süchiki tü jünajakat jee tü jaashajeʼerakat.

 Aa, eeshii na wayuu ekirajaakana namüiwaʼa. Anaʼleepejeʼe maʼin eere wanee wawala ekirajakai pia, mapüleejeerü pümüin piyaawatüin saaʼu tü pikirajaakalü anain. Sünain tü pütchi kanüliakat «Süpülajatü ekirajawaa sünain tü Bibliakat», eʼitaanüsü waneirua video otta ashajünüsü waneirua pütchi süpüla piyaawatüin saaʼu tü sümakat tü Bibliakat. Anuu süpüshi tia:

•   Video süpülajatka ekirajawaa sünain tü Bibliakat. Aküjünüsü suluʼu tia videokalüirua tü sümakat maʼin tü Bibliakat.

•   Susoutaka eʼipajee tü Bibliakat. Ashajünüsü yala waneirua pütchi pütüjaweekalü aaʼu suluʼujee tü Bibliakat.

•   Ashajünüsü jamaluʼuluin wanee wetsiikulo. Ashajünüsü yala kasain süküjeein achiki wanee pütchi otta jamaluʼuluin wanee wetsiikulo.