Jamüshiisaʼa naya. Anuu waneirua pütchi atüjaanaka aaʼujee shiimain tia:

•   Wachajaain sukuwaʼipa süpüla washatüin nukuwaʼipa Jesús otta woonooin sümaa süpüshuaʼa tü nikirajakalü anain (1 Pedro 2:21, TNM).

•   Wanouja anainrü niain Jesús suʼttaainjachikai akajee wayuu «süka nnojolüin eein wane wayuu nütüma Maleiwakai yaa saaʼu mmakat yalejeeruʼu nuulia eekai süpüla oʼtteʼeraa waya» (Aluwataaushikana [Hechos] 4:12).

•   Soʼujee waküjaliin pütchi nüchiki Jehová, woutiisashii waya saaʼu nünülia Jesús (Mateo 28:18, 19).

•   Achuntushii waya nümüin Maleiwa saaʼu nünülia Jesús (Juan 15:16, TNM).

•   Wanouja anainrü niain Jesús laülaain naaʼu chi toolokoi (1 Corinto 11:3).

 Eepejeʼe sooʼomüin kasa naataka anainjee wakuwaʼipa noulia na anoujakana nünain Jesús naashin. Jamüshiijaʼa waya, wayaawata aaʼu tü sümakat tü Bibliakat nüchiki Jesús sünain Nüchooin nia Maleiwa otta nnojolin niainya neʼe Maleiwain otta chi naaʼinkai Maleiwa (Marcos 12:29). Akaʼaya waya, nnojotsü wanoujain sünain matüjain outaa tü saaʼinkat wayuu, nnojotsü wanoujain müliain wayuu nutuma Maleiwa saʼaka siki chaa shiinaluʼu tü mmakat otta wayaawata aaʼu wanaawainjatüin nojutu na anoujashiikana namaa na laülaakana napüleerua, nnojoishii nayainjanain kojutuleein na laülaakana napüleerua na anoujashiikana (Eclesiastés 9:5; Ezequiel 18:4; Mateo 23:8-10).