Karaloʼuta namüinjatka na chajanakana Éfeso 1:1-23
1 Karaloʼutakat tüü tashajala tayakai Pablo, aluwataaushi taya nutuma Cristo Jesús wanaapünaa sümaa tü nüchekakat Maleiwa. Karaloʼutakat tüü jümüinjatü jia anoujashii chakana Éfeso, jia oonookana waneepia sümaa paaʼinwain jia nümaa Cristo Jesús.
2 Kasataalejeseʼe kamaneein jümüin chi Washikai Maleiwa jee jimatüin jaaʼin nutuma jee nutuma chi Señotkai Jesucristo.
3 Waʼwaajüin chi Maleiwakai, chi Nüshikai chi Waseñotsekai Jesucristo, aapüshi nia kasa anasü wamüin chaa sirumatuʼu sükajee tü nüpülainkat, jama nikirajüin waya Cristo.
4 Nüneekatüjüliʼiya waya Maleiwa süpülapünaa shiʼitaanüin shikii wayuu* süpüla paaʼinwainjanain waya nümaa Cristo, süpüla alinjatüin wayuu wapüla, süpüla wuleinjatüin wakuwaʼipa jee süpüla maainjalainjanain waya nuʼupala.
5 Nüneekatüjüliʼiya waya nükajee Jesucristo süpüla nüchooinjanain waya wanaapünaa sümaa tü kasa anakat nümüin jee wanaapünaa sümaa tü kasa nüchekakat.
6 Nüneeküin waya süpüla waʼwaajüinjachin nia saaʼujee kamaneein maʼin nia wamüin nükajee chi Nüchon aikai maʼin nüpüla.
7 Sükajee kamaneein maʼin chi Maleiwakai wamüin taashinnapa waya suulia waainjala sükajee suwalaajünüitpain tü waainjalakat saaʼujee amülaitpain nüsha chi Nüchonkai.
8 Kamaneeshi maʼin nia wamüin sümaa kekiin waya nutuma jee wayaawata aaʼu wanee kasa nutuma.
9 Nüküjain wamüin tü kasa nütüjaakalü aaʼu süchiki tü kasa nüchekakat. Tia kasa nütüjaakalü aaʼu Maleiwa sümaa tü kasa nüchekakat shia
10 nüikaleʼerüin shikii jamüinjatüin sukuwaʼipa tü kasakalüirua. Alateerü tia shikeraajapa tü kaʼi niʼitaatüjütkalia süpüla. Nuutkajeʼereetkalaka süpüshuaʼa tü kasakalüirua chaa sirumatuʼu jee yaa mmapaʼa, jüüjüweetkalaka shia nümüin Cristo.
11 Paaʼinwashii waya nümaa jee nüneeküin waya Maleiwa süpüla saapünajatüin wamüin tü kasa nüküjatüjütkalia achiki paala. Kettaatüjüliʼiya waya nutuma wanaapünaa sümaa tü kasa nüchekakat, jama shiain naaʼinrüin wanee kasa eekai wanaapünaain maʼin sümaa tü kasa nüchekakat,
12 süpüla nuʼwaajünüinjachin Maleiwakai wakajee, jama miyoʼuin maʼin nia. Waya anoujaka palajana sünain aneerüin wakuwaʼipa nutuma Cristo.
13 Anoujapejeʼeya jia nünain jaapapa süchiki tü pütchi shiimainkat, tü pütchi anakat maʼin* süchiki juʼtteʼennajanain. Mayaashii junoujain müsü shiʼitaanakai aaʼin jünain wanee jeerü nükajee Cristo. Tia jeetkat müsü shiʼitaanakai aaʼin jünain sükajee tü nüpülainkat Maleiwa, tü aküjünatüjütkalia achiki.
14 Tü nüpülainkat Maleiwa müsü aka saaʼin wanee pütchi apansaajünakat paala, wayaawataka akajee saapüneerüin wamüin tü kasa nüküjakalü achiki Maleiwa. Naaʼinrüin Maleiwa tia süpüla taashinjanain na wayuu anoujakana nünain jee süpüla nuʼwaajünüinjachin.
15 Suluʼujee tia, taapaiwaʼaya süchiki kanoulain jia nünain chi Señotkai Jesús jee taapaiwaʼaya süchiki alin jüpüla napüshuaʼa na anoujashiikana,
16 nnojoishi taya ooʼulaain suulia aapaa analuʼulu jaaʼu, ayatüshia taya oʼuraajüin jüpüleerua
17 süpüla kekiinjanain jia nutuma chi Washi miyoʼushikai, chi Nümaleiwasekai chi Waseñotsekai Jesucristo jee süpüla jiyaawatüin saaʼu nutuma tü kasa nüküjakat süpüla niʼraajünüinjachin.
18 Nütanalüin jaaʼin Maleiwa süpüla müin jiʼrakai saaʼin jee süpüla jütüjaain saaʼu tü kasa naapakat jümüin sümaa jütüjaain saaʼu tü kasa anasü nüküjakalü achiki namüin na aneekuushikana
19 jee süpüla jütüjaain saaʼu tü kasa pülasü naaʼinrakat wapüleerua waya anoujashiikana. Ayaawatüna aaʼu tia sünainjee tü kasa naaʼinrakat sükajee tü nüpülainkat.
20 Sükajee tia nüpülainkat, nüsoʼireʼera aaʼinchi Cristo süchikijee outaa jee nüneeküin nia süpüla eeinjachin nia nikialuʼujee chaa sirumatuʼu.
21 Kojutuleeshia maʼin nia nutuma Maleiwa noulia napüshuaʼa na aluwataashiikana, noulia na laülaashiikana, noulia na kapülainkana, noulia na ekiipüʼükana jee kojutushi nia noulia na kaawainkana maaʼulu* jee na kaawainjeenakana mapeena.
22 Müsü nuuʼuipalakai saaʼin kasa süpüshuaʼa nutuma Maleiwa jee nüneeküin nia süpüla shikiipüʼüinjachin nia kasa süpüshuaʼa naʼaka na anoujashiikana.
23 Müinnapa naya nümüin maʼaka saaʼin nütapaʼa. Watta saalii kasa natüjaakalü aaʼu nüchiki, nia Cristo kottoka atuma kasa süpüshuaʼa.
Noota
^ Shia soʼujeʼereeya kachooin Adán sümüin Eva.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tü pütchikat «Tü kasa alatakat sainküin mma» suluʼu tü kanüliakat «Jamaluʼulu pütchikat».
