Karaloʼuta namüinjatka na chajanakana Éfeso 2:1-22
2 Katüsü joʼu nutuma Maleiwa mayaainjeʼe müin outakai jaaʼin sünainjee tü kasa mojusü jaaʼinrakat jee sünainjee kaainjalain jia.
2 Mapuʼusü jukuwaʼipa maʼaka nakuwaʼipa na manoujainsaliikana jee jaainjain tü nüchekakat chi aluwataashikai naaʼu na manoujainsaliikana. Mapuʼusü tü jülüjakat jaaʼin maʼaka tü jülüjakat naaʼin na wayuu nnojoliikana jaa müin.
3 Shia neʼe woʼunapuʼuka achiirua tü kasa suchuntaakat weʼiruku jee waaʼinrapuʼuin tü kasa suchuntaakat weʼiruku maʼaka naaʼin naya wayuukana. Shia waainjapuʼuka neʼe tü jülüjapuʼukat waaʼin. Eweeniraashii waya suluʼu nüʼürülain waya Maleiwa maʼaka naaʼin naya wayuukana.
4 Süka nümüliajülin maʼin chi Maleiwakai jee alin maʼin waya nüpüla
5 katüsü woʼu nutuma wanaa nümaa Cristo, jaʼitakajeʼe neʼe wanaa sümaa müin outakai waaʼin saalinjee tü waainjalakat (oʼtteʼennüshii jia süka kamaneein maʼin chi Maleiwakai jümüin).
6 Katüsiaʼaya woʼu nutuma Maleiwa jee nüneeküin waya süpüla chainjanain waya sirumatuʼu, jama paaʼinwain waya nutuma nümaa Cristo Jesús.
7 Niiʼiyateerü nümanee Maleiwa suluʼu tü mma jeketükat naaʼinrapeena kasa anasü wapüleerua waya paaʼinwakana nümaa Cristo Jesús.
8 Oʼtteʼennüshii jia süka kamaneein Maleiwa jümüin jee sutuma kanoulain jia. Nüsülajala tia Maleiwa jümüin, nnojotsü sünainjeejatüin tü kasa jaaʼinrakat.
9 Nnojoishi oʼttaain wanee wayuu sükajee tü kasa naaʼinrakat suulia nuʼwaataʼalaain suluʼu tü kasa naaʼinrakat.
10 Nukumala waya Maleiwa jee naaʼinrüin tia süpüla paaʼinwainjanain waya nümaa Cristo Jesús jee waaʼinrüinjanain kasa anasü, matüjülia sukuwaʼipa tia nutuma.
11 «Na nnojoliikana achoteʼerüin süta nakorolo»* münapuʼushii jia natuma «na wayuu achoteʼerakana süta nakorolo». Soto jaaʼin tia jia nnojoliikana judíoin.
12 Soʼu kaʼikat tia nnojoishi jiʼraajüin Cristo, naata jia noulia na israelitakana. Nnojotsü apansaajünüin jümüin tü kasa apansaajünakat paala, nnojotsü kasain jaʼatapajüin, nnojoipuʼushi jiʼraajüin chi Maleiwakai.
13 Paaʼinwainnapa jia nümaa Cristo Jesús, jia wattapuʼukana nuulia Maleiwa arütkaainnapa jia nünainmüin sükajee tü nüshakat Cristo.
14 Jimatüsü waaʼin nutuma Cristo. Nia kottoko atuma na wayuu judíokana namaa na nnojoliikana judíoin. Nia ojuttiraka tü makalü aka saaʼin süsepü pueulo, tü katataawakalü atuma naya wayuukana.
15 Sutuma naapajiraain nikii Cristo, nuʼwüinjeʼerüin tü Pütchi Aapünakat nümüin Moisés,* eere süküjünüin tü saaʼinrajatkat wayuu. Tia pütchikat, shia mojujiraaka aaʼujee naya wayuukana. Kottuinnapa naya napüshuaʼa nutuma, nikirajüin Cristo naya wayuukana jee anajiraainnapa naya nutuma.
16 Nükaalinjain naya wayuukana süpüla anajiraainjanain naya nümaa Maleiwa jee kottuinjanain naya sükajee nükachennüin Cristo sünain wanee wunuʼu* süpüla outaa. Suluʼujee tia, najaʼttirüin tü mojujirawaakat.
17 Antüshi nia süpüla nüküjainjatüin jümüin tü pütchi anakat maʼin, tü anajiraainjatkalü akajee wayuu nümaa Maleiwa, nüküjain shia namüin na wayuu nnojoliipuʼukana eʼraajüin Maleiwa jee namüin na eʼraajapuʼukana nia.
18 Sutuma naapajiraain nikii Cristo, taashitpa wakuwaʼipa wapüshuaʼa* süpüla woʼuraajüinjanain nümüin chi Washi iipünaajachikai, jama waneesüin neʼe tü nüpülain naapakat wamüin.
19 Nnojoliinnapaka müin jia maʼaka naaʼin wanee wayuu meʼraajuukai jee wattajeʼewaikai, napüshinnapa jia na anoujashii aneekuushikana jee nüpüshinnapa jia chi Maleiwakai.
20 Müshii jia maʼaka saaʼin wanee miichi akumajünaka saaʼu wanee ipa, tia ipakat naya na aluwataaushikana jee na nünüikimaajanakana Maleiwa, mapajeʼe Cristo Jesús maʼaka saaʼin tü ipa* choʼujaakat maʼin.
21 Tia miichi akumajünakat, kottusü süpüshuaʼa tü akumajünakat sünain otta saaʼujee eeitpain shia nümaa Cristo, ajaʼapülaasü süpüla müinjatüin shia maʼaka saaʼin wanee miichi aʼwaajülee akumajuushikat nüpüla Jehová.*
22 Sutuma paaʼinwain jia nümaa Cristo, müinnapa jia maʼaka saaʼin wanee miichi eere kepiain chi Maleiwakai, jama yalain tü nüpülainkat.
Noota
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
^ Naya aashajaanakana achiki na judíokana jee müshiʼiya na nnojoliikana judíoin oushikajaakana mapa süchiirua nukuwaʼipa Cristo.
^ Eʼitaanüsü iipünaa tia ipakat eere süntiraain süsepü wanee miichi süpüla icheinjatüin shia.
^ Pünaʼla tia suluʼu tü kanüliakat «Sooʼomüin pütchi A5».
