Karaloʼuta namüinjatka na chajanakana Éfeso 3:1-21
3 Tayakai Pablo püreesashi taya saaʼujee toushikajaain süchiirua nukuwaʼipa Cristo Jesús jee sünainjee takaalinjain jia wayuu nnojoliikana judíoin...
2 Jaapa achikichijaʼa teʼitaanüin süpüla takaalinjain jia shiiʼiree kamaneeinjachin chi Maleiwakai jümüin,
3 jama nüküjain tamüin tü kasa nütüjaakalü aaʼu maʼaka taküjainkain shia jümüin.
4 Jaashajeʼerapa karaloʼutakat tüü, jütüjaajeerü aaʼu tayaawatüin maʼin saaʼu tü kasa nütüjaakalü aaʼu Maleiwa nüchiki Cristo.
5 Sümaiwa paala nnojotpuʼusü aküjünüin sümüin wayuu süchiki tia kasa nütüjaakalü aaʼu Maleiwa maʼaka süküjünüin jooluʼu sükajee tü nüpülainkat Maleiwa namüin na aluwataaushikana jee namüin na nünüikimaajanakana Maleiwa.
6 Anuusa tü nütüjaakalü aaʼu Maleiwa: na wayuu nnojoliikana judíoin süka paaʼinwainnapain naya nümaa Cristo Jesús jee süka naapaain sümaa tü kasa anakat maʼin, eʼreena kasa anasü otta kotteena naya, aapüneerü namüin wanaa wamaa tü kasa aküjünatüjütkalia achiki paala.
7 Miyoʼu maʼin nümanee Maleiwa tamüin, taküjaichikalaka süchiki tü kasa nütüjaakalü aaʼu, müsü nüsülajakai saaʼin tia tamüin naapapa tamüin tü nüpülainkat.
8 Taya maawainka maʼin naʼakajee napüshuaʼa na aneekuushikana. Kamaneeshi chi Maleiwakai tamüin, taküjaichikalaka namüin na wayuu nnojoliikana judíoin, tü pütchi anakat maʼin süchiki sülanaʼaleeinña maʼin tü kasa anasü naapakat Cristo wamüin.
9 Nüküjain Maleiwa sümüin wayuu tü kasa nütüjaakalü aaʼu, mayaainjeʼe kakaliairüin shia nuunjulajüin achiki suulia wayuu, nia chi Maleiwa kakumalakai kasa süpüshuaʼa.
10 Müsü sukuwaʼipa tia nutuma Maleiwa süpüla natüjaainjatüin saaʼu na aluwataashiikana jee na laülaashiikana chaa iipünaa* kekiin maʼin chi Maleiwakai, wainma sukuwaʼipa tia nutuma. Natüjaaitpa aaʼu müin sukuwaʼipa tia nakajee na anoujashiikana.
11 Wanaawasü tia sümaa tü nüchekakalü achiki Maleiwa waneepia. Naaʼinrüin tia wanaapünaa sümaa nukuwaʼipa Cristo, chi Waseñotsekai Jesús.
12 Nükajee niakai, nnojotsü mmoluwaain waaʼin sünain aashajawaa, taashisü wakuwaʼipa süpüla oʼuraajaa nümüin Maleiwa, jama wanoujain nünain Cristo.
13 Tachuntuinjeseʼe jümüin nnojoluinjatüin mojuin jaaʼin saalinjee tü müliaa teʼrakat jünainjee, jama jiʼreenain kasa anasü suluʼujee tia.
14 Tasapainkashijeseʼe taya nümülatuʼu chi Washi iipünaajachikai,
15 jama niain kakumalain napüshuaʼa na chakana iipünaa* otta nia kapüshika atuma wayuu yaa saaʼu tü mmakat.
16 Anaʼleesia maʼin nukuwaʼipa chi Maleiwakai, tachuntuinjeseʼe nümüin naapajatüin tü nüpülainkat jümüin süpüla sükatchinraainjatüin jaaʼin otta süpüla anainjatüin tü kasa jülüjakat jaaʼin.
17 Eejeechikalaka Cristo suluʼu jaaʼin sümaʼaleeya aijiraain jia waneʼewai jukua sünainjee kanoulain jia. Tachuntuinña nümüin chi Maleiwakai süpüla icheinjatüin tü junoulakat maʼaka ichein nuurala wanee wunuʼu
18 süpüla natüjaainjatüin saaʼu napüshuaʼa na anoujashiikana tü nüchikikat Maleiwa, jeʼtsüin maʼin seeruluin, jeʼtsüin maʼin sajaʼapüin, jeʼtsüin maʼin shia iipünaamüin otta jeʼtsüin maʼin shia wünapümüin.
19 Jee süpülajatü natüjaain saaʼu tü waalinkat nüpüla Cristo, tü alanaʼaleekat suulia atüjawaa saaʼu wanee kasa jee jaʼyainjatü saaʼu nakuwaʼipa tü nukuwaʼipakat Maleiwa.
20 Niasaʼa chi Maleiwa aapakai nüpülain wamüin, (wountakai atuma wainma kasa) naaʼinreerü wapüleerua wanee kasa alanaʼaleeka suulia tü kasa wachuntakat nümüin otta naaʼinreerü wanee kasa wapüleerua nnojotka antapünaain suluʼu wekii.
21 Kasataalejeseʼe nuʼwaajünüin süpüla kaʼikat süpüshuaʼa nakajee na anoujashiikana jee nükajee Cristo Jesús. Amén.*
Noota
^ Naya aashajaanaka achiki na aapiee nümaʼanajeejakana Maleiwa.
^ «Waneʼewai sukua tü apüshiikat» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
