Karaloʼuta namüinjatka na chajanakana Éfeso 5:1-33
-
Wuleinjatü jünüiki otta jukuwaʼipa (1-5)
-
«Ayataʼaya müin jia maʼaka nakuwaʼipa na wayuu waraitakana soʼu luusa» (6-14)
-
«Shia eeinjatka jaaʼu tü nüpülainkat Maleiwa» (15-20)
-
«Anasü shiale jülatirüin anain kaʼi tü kasa eekai anain» (16)
-
-
Pütchi namüinjatka na tooloyuu jee na jieyuu kaʼwayuusekana (21-33)
5 Anakajaʼa jüshatüle nukuwaʼipa Maleiwa, nüchonnii jia jee aishii jia nüpüla.
2 Ayataʼaya aijiraain waya maʼaka alin waya nüpüla Cristo jee naapajiraain nikii waaʼu süpüla müinjachin nia maʼaka saaʼin wanee kasa jemeta eejuut nümüin Maleiwa.
3 Nnojoliireejaʼa jia aashajaainjanain süchiki aʼluwajirawaa akuwaʼipaa,* süchiki wanee kasa eeka yarüttüin jee süchiki keeʼirewaa aaʼin naata kakorotshi, müinjatü jukuwaʼipa maʼaka naaʼin wanee wayuu eekai wulein nukuwaʼipa.
4 Nnojo jiʼrayaain sümüin jukuwaʼipa suulia jiʼrüin japülii, anashii jiyaawatüle saaʼu jünüiki otta nnojo jimeeʼerajaain süka pütchi eekai yarüttüin, jama mojuin tia makat. Shia anaka aluʼu jaapüle analuʼut saaʼu wanee kasa.
5 Jütüjaa aaʼu sümaa jiyaawatüin maʼin saaʼu nnojoleechin niʼrüin anaa nuluwataapeena Maleiwa jee nuluwataapeena Cristo, chi wayuu aʼluwajiraakai nukuwaʼipa, chi eekai yarüttüin nukuwaʼipa otta chi wayuu keeʼireekai aaʼin naata kakorotshi, (jama müin nukuwaʼipa maʼaka naaʼin wanee wayuu aʼwaajakai shiyaakua maleiwayaasü).
6 Jalia shimeejaʼalayaai jia wayuu süka alawaa, shia jashichika anainjee tia Maleiwa namüin na wayuu nnojoliikana jaa müin.
7 Anakajaʼa nnojorüle wanaawain jaaʼin namaa.
8 Müsü kojopuʼukai saaʼin piʼyuushi jaaʼu, shiasaʼa süka paaʼinwainnapain jia nümaa chi Señotkai, müitpa chuwatuuikai jaaʼu. Ayataʼaya müin jia maʼaka nakuwaʼipa na wayuu waraitakana soʼu luusa.
9 Aneerü waaʼin sünain kasa süpüshuaʼa sutuma tia luusakat, loteerü sukuwaʼipa tü kasa waaʼinrakat jee loteeriaʼaya wakuwaʼipa sutuma.
10 Ayataʼaya jaaʼinmaain tü anakat noʼuluʼu chi Señotkai.
11 Juuʼulaa suulia aaʼinraa tü kasa nnojotkat kasain anain apüla, tü aaʼinnakat saʼaka piʼyuushi. Anashii nnojoliire juunjulajüin süchiki tia.
12 Kaluʼusü japülii aküjaa süchiki tü kasa naaʼinrakat ojuunaa.
13 Warattuuisü tü luusakat saaʼu tü kasa nnojotkalü anain, sütüjaanüitka aaʼu tü kasa nnojotkalü anain.
14 Müsüjeseʼe müin tü pütchikat: «Anashi püchijiraale pia atunkakai, pütamaa naʼakajee na outushiikana, meechika warattuuikai naaʼin Cristo paaʼu».
15 Eejeekalaka jaaʼin suulia majüin jia maʼaka naaʼin na wayuu mekiikana, wayuuinjana kekiishii jia.
16 Anasü shiale jülatirüin anain kaʼi tü kasa eekai anain, jama mojuin maʼin tü kasa alatakat maaʼutpünaa.
17 Anashii jiyaawatüle saaʼu jukuwaʼipa otta jiyaawata saaʼu tü nüchekakat Jehová.*
18 Anashii nnojoliire jipeʼrüin saaʼujee jüsüin wiino, jama nnojoleerüin jiyaawatüin saaʼu jukuwaʼipa sutuma. Shia eeinjatka jaaʼu tü nüpülainkat Maleiwa.
19 Jükatchinra jaaʼin waneʼewai jukua sünain eeʼirajaa salmos,* juʼwaaja Maleiwa, juʼwaaja nia süka jiiʼirain, jiiʼiraja nümüin Jehová* maʼaka jiiʼirajakaijaʼa suluʼu jaaʼin.
20 Jaapa analuʼut waneepia saaʼu kasa süpüshuaʼa nümüin chi Washikai Maleiwa, jaaʼinra tia saaʼu nünülia chi Waseñotsekai Jesucristo.
21 Jüüjüü jia waneʼewai jukua sümaa kojutuin jümüin Cristo.
22 Na jieyuu kaʼwayuuseshiikana, jüüjüüinjana namüin naʼwayuuse maʼaka jüüjüüin naya nümüin chi Señotkai.
23 Chi toolokoi nia shikiipüʼükai tü nuʼwayuusekat maʼaka niain Cristo nekiipüʼüin na anoujashiikana, nia oʼtteʼeraka naya süka müin naya maʼaka saaʼin nütapaʼa.
24 Maʼaka jüüjüüin na anoujashiikana nümüin Cristo, akaainjanaʼaya neʼe na jieyuu kaʼwayuuseshiikana, jüüjüüinjana sünain kasa süpüshuaʼa namüin naʼwayuuse.
25 Jia tooloyuu kaʼwayuuseshiikana, ayataʼaya alin jüpüla juʼwayuuse maʼaka alin nüpüla Cristo na anoujashiikana jee naapajiraain nikii naaʼu.
26 Wulesü nakuwaʼipa na anoujashiikana nutuma süka müin noʼoojirakai naaʼin süka wüin, tia wüinkat shiyaawase nünüiki chi Maleiwakai.
27 Naaʼinrüin tia süpüla anainjatüin maʼin nakuwaʼipa na anoujashiikana noʼuluʼu, shia nüchekaka wuleinjatüin nakuwaʼipa na anoujashiikana otta nnojoluinjatüin eein wanee kasa mojuka sünain nakuwaʼipa.
28 Akaainjanaʼaya na tooloyuu kaʼwayuuseshiikana, alinjatü napüla naʼwayuuse maʼaka alin naya napülajiraa. Chi wayuu aikai apüla nuʼwayuuse, aijiraashijaʼamata nia nüpülajiraa.
29 Nnojoishi eein wanee wayuu üttakai aaʼin nünainjiraa, niküin wanee kasa otta niisattachoin nukuwaʼipa maʼaka tü naaʼinrakat Cristo napüleerua na anoujashiikana.
30 Maʼaka kajapüin wanee wayuu, kooʼulin nia jee eein waneirua kasa nünain, akaataajaʼa neʼe wakuwaʼipa nümüin Cristo.
31 «Ojuʼiteechi wanee wayuu nümaʼanajee nüshi jee sümaʼanajee nii süpüla saʼaniraain nukuwaʼipa sümaa nuʼwayuuse, nnojoleenaka naya katataawain».
32 Alanaʼaleesia maʼin tia nütüjaakalü aaʼu Maleiwa. Nia taashajaaka achiki Cristo jee na anoujashiikana.
33 Jia tooloyuu kaʼwayuuseshiikana, alinjatü jüpüla juʼwayuuse maʼaka alin jia jüpülajiraa. Akaataajaʼa tü wayuu eekai kaʼwayuusein, kojutuinjachi maʼin suʼwayuuse sümüin.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
